6 தே.மு.தி.க.,எம்.எல்.ஏ.,க்கள் சஸ்பெண்ட்: சட்டசபை செயலருக்கு நோட்டீஸ்

http://img.dinamalar.com/data/large/Tamil_News_large_687087.jpg
சென்னை: சட்டசபையில் இருந்து, "சஸ்பெண்ட்' செய்யப்பட்டதை எதிர்த்து, தே.மு.தி.க.,- எம்.எல்.ஏ.,க்கள், ஆறு பேரும், தாக்கல் செய்த மனுவை விசாரித்த நீதிபதி சட்டசபை செயலருக்கு நோட்டீஸ் அனுப்பினார்.
கடந்த பிப்ரவரி மாதம் நடந்த சட்டசபை கூட்டத்தொடரின் போது , அதிருப்தி தே.மு.தி.க. எம்.எல்.ஏ.வை தே.மு.தி.க. எம்.எல்.ஏ.க்கள் சிலர் தாக்க முயன்றனர். இது தொடர்பாக சட்டசபையில் நடந்து கொண்ட விதம் குறித்து உரிமைக்குழுவுக்கு, பிரச்னை அனுப்பப்பட்டது. உரிமைக் குழு எடுத்த முடிவின் அடிப்படையில், தே.மு.தி.க. எம்.எல்.ஏ.க்கள் முருகேசன், பார்த்தசாரதி, நல்லதம்பி உள்ளிட்ட ஆறு பேர் சட்டசபை கூட்டத்தொடரில் 6 மாதம் பங்கேற்க சபாநாயகர் தடைவிதித்தார். இதனை எதிர்த்து 6 எம்.எல்.‌ஏ.க்களும் ஒரே மனுவாக நேற்று சென்னை ஐகோர்ட்டில் மனு ஒன்றை தாக்கல் செய்தனர். இந்த மனுவில் அரசியல் காழ்ப்புணர்ச்சி காரணமாக எங்கள் மீது நடவடிக்கை எடுக்கப்பட்டுள்ளது. சபாநாயகர் உத்தரவினை ரத்து செய்ய வேண்டும் என கூறியிருந்தனர். இந்த மனு இன்று நீதிபதி ராஜேஸ்வரன் முன் விசாரணைக்கு வந்தது.
சட்டசபை செயலருக்கு நோட்டீஸ்
இன்று நடந்த விசாரணையின் போது, மனுதாரர் சார்பில் வழக்கறிஞர் பாலாஜி வாதிடுகையில், ஜூலை மாதம் ராஜ்யசபா தேர்தலில் ஓட்டளிக்க வேண்டி உள்ளதால், கட்சி சார்பில் ஓட்டளிக்க முடியாத நிலை ஏற்படும். எனவே சட்டசபையில் 6 எம்.எல்..க்களும் கலந்து கொள்ள அனுமதிக்க வேண்டும் என்றார். இதனை ஏற்றுக்கொண்ட நீதிபதி, உரிய விளக்கம் அளிக்க வேண்டும் என சட்டசபை செயலருக்கு நோட்டீஸ் அனுப்ப உத்தரவிட்டார். இதையடுத்து, கோர்ட் நோட்டீசினை அரசு தரப்பு வழக்கறிஞர் சோமையாஜி பெற்றுக்கொண்டார். இவ்வழக்கின் விசாரணையை ஏப்ரல் 16ம் தேதிக்கு ஒத்திவைப்பதாக நீதிபதி தெரிவித்துள்ளார.
தினமலர்