இலங்கை அரசு பறிமுதல் செய்த நிலங்களை தமிழர்களிடம் ஒப்படைக்க வேண்டும்: அமெரிக்க தூதர்

by **இளமாறன்** Wed Apr 10, 2013 12:13 am

கொழும்பு, ஏப். 9-

இலங்கை அரசால் பறிமுதல் செய்யப்பட்ட தமிழர்களின் நிலங்களை மீண்டும் தமிழர்களிடம் வழங்க இலங்கை அரசு நடவடிக்கை எடுக்க வேண்டும் என இலங்கைக்கான அமெரிக்க தூதர் மிச்சேல் ஜே.சிசன் வற்புறுத்தியுள்ளார்.

கொழும்புவில் உள்ள அயல்நாட்டு பத்திரிகையாளர்கள் சங்கத்தில் பேசிய அவர் கூறியதாவது:-

போருக்கு பிந்தைய சமரசம் மற்றும் போர் குற்றங்களுக்கான நடவடிக்கை ஆகியவற்றில் அன்னிய நாடுகள் தலையிடக்கூடாது என்று கூறி வருவதை இலங்கை அரசு நிறுத்திக் கொள்ள வேண்டும்.

சமரசம் மற்றும் மறுசீரமைப்பு தொடர்பாக சரியான நடவடிக்கை எடுக்க மறுத்த நாடுகள் சந்தித்துள்ள சரிவுகளை கடந்த கால வரலாறு நமக்கு உணர்த்தியுள்ளது. இவற்றை நடைமுறைப்படுத்துவதில் சிரமம் உள்ளது என்றாலும் இலங்கையின் நிரந்தரத் தன்மைக்கு இந்த நடவடிக்கைகள் மிகவும் அவசியமானதாகும்.

இவற்றை வலியுறுத்தி ஒபாமா தலைமையிலான அமெரிக்க அரசு ஐ.நா. மனித உரிமை கவுன்சிலில் 2012-லும் இந்த ஆண்டும் தீர்மானங்களை கொண்டு வந்தது.

தமிழ் தேசிய கூட்டணி கட்சியுடன் பேச்சு வார்த்தை நடத்தி, சரியான அரசியல் தீர்வு காண இலங்கை அரசு முன்வர வேண்டும். ராணுவத்தால் ஆக்கிரமிக்கப்பட்ட தமிழர்களின் வீடு மற்றும் நிலங்களை திருப்பி ஒப்படைக்க வேண்டும்.

போரினால் முன்னர் பாதிக்கப்பட்ட பகுதிகளில் வாழும் மக்கள் எவ்வித தலையீடும் இல்லாமல் இலங்கையின் மற்ற மக்களைப் போல் நிம்மதியாகவும் அமைதியாகவும் வாழ வழி வகை செய்ய வேண்டும்.

இலங்கையில் நடந்து வரும் அத்துமீறல்கள் தொடர்பான செய்திகளை வெளியிடுபவர்கள் தாக்கப்படுகிறார்கள். இதனால் பலர் இலங்கையை விட்டு வெளியேறி விட்டனர்.

எஞ்சியிருப்பவர்களை தாக்கும் நபர்களை அரசு கைது செய்வதில்லை. மீறி கைது செய்தாலும் குற்றம் நிரூபிக்கப்படவில்லை என விடுதலை ஆகி விடுகிறார்கள்.

கடந்த வாரம் கிளிநொச்சியில் உள்ள 'உதயன்' பத்திரிகை அலுவலகத்தின் மீது நடத்தப்பட்ட தாக்குதல் தொடர்பாக பாரபட்சமற்ற முழு விசாரணை நடத்த வேண்டும். இந்த தாக்குதலை நடத்தியவர்கள் மீது உடனடியாக நடவடிக்கை எடுக்க வேண்டும்.

இஸ்லாமியர்கள் மீது சமீப காலமாக நடத்தப்படும் தாக்குதல்களால் ஏற்படும் மத கசப்புணர்வு மேலும் வலுக்காமல் தடுக்க வேண்டும். கற்ற பாடங்களும் பிந்தைய சீரமைப்பும் என்ற இலங்கை அரசின் கொள்கையில் 2009ம் ஆண்டிலிருந்து எந்த முன்னேற்றமும் ஏற்படவில்லை.

எல்.எல்.ஆர்.சி.யில் போர் குற்றங்கள் தொடர்பான எந்த பரிந்துரையும் முன் வைக்கப்படவில்லை. போர் குற்றவாளிகளை நீதியின் முன் நிறுத்துவது உள்ளிட்ட நடவடிக்கைகளை எவ்வளவு விரைவாக தொடங்கி, எவ்வளவு விரைவாக முடிக்க வேண்டுமோ, அதை இலங்கை அரசு செய்து முடிக்க வேண்டும்.

மாலைமலர்