தமிழகத்தில் 100 டிகிரியை தாண்டியது வெயில்

by **Muthumohamed** Mon Apr 08, 2013 1:42 pm

மதுரை, ஏப். 8-

தமிழ்நாட்டில் கோடையின் உச்சகட்டமான அக்னி நட்சத்திரம் வருவதற்கு இன்னும் 3 வாரங்களுக்கு மேல் இருக்கிறது. ஆனால் அதற்குள்ளாகவே தமிழகத்தின் பல மாவட்டங்களில் வெயில் சதத்தை தாண்டி சுட்டெரிக்கிறது.

திருச்சியில் கடந்த சனிக்கிழமை அதிகபட்ச வெயிலான 107 டிகிரியை எட்டியது. இதனால் வெயிலை தாங்க முடியாமல் திருச்சி நகரில் வசிக்கும் மக்கள் அனலில் இட்ட புழு போல் துடித்தார்கள். தொட்டதெல்லாம் சுட்டது, அடித்த காற்றெல்லாம் அனலாக வீசியது. திருச்சி நகர வாசிகள் வீடுகளில் உட்கார முடியாமலும், சாலைகளில் நடந்து செல்ல முடியாமலும் தவித்தார்கள்.

அதனைத் தொடர்ந்து நேற்று மதுரை, ஈரோட்டில் வெயில் 107 டிகிரியை தொட்டது. மதுரையில் கடந்த ஒரு வாரமாகவே வெயில் கொளுத்தி வருகிறது. நேற்று முன்தினம் 106 டிகிரி அடித்த வெயில் நேற்று 107.42 டிகிரியை எட்டியது. அதேபோல ஈரோட்டில் நேற்று அதிகபட்சமாக 107.6 டிகிரி வெயில் கொளுத்தியது.

தமிழ்நாட்டில் நேற்று பல ஊர்களில் வெயில் 100 டிகிரியை தாண்டியது. சென்னை மீனம்பாக்கத்தில் நேற்று முதல் நாளாக வெயில் 100 டிகிரியை தொட்டது.

ஈரோடு (107.6), மதுரை (107.42), திருச்சி, தஞ்சை, அரியலூர், கரூர் (104), வேலூர், திருவண்ணாமலை, பெரம்பலூர், நெல்லை (103), தர்மபுரி, கிருஷ்ணகிரி, திண்டுக்கல் (102), சேலம், புதுக்கோட்டை (101), சென்னை மீனம்பாக்கம், நாமக்கல் (100) ஆகிய இடங்களில் வெயில் 100 டிகிரியை தாண்டியது.

ஒரு பக்கம் வெயில் வாட்டி வதைத்தாலும், சில இடங்களில் மழையும் பெய்துள்ளது. ஏற்காட்டில் நேற்று பகலில் திடீரென்று இடி-மின்னலுடன் மழை கொட்டியது. இதனால் வெப்பம் தணிந்து குளிர்ச்சி நிலவியது.

சேலம் மாவட்டம் ஆத்தூரில் ஆலங்கட்டி மழை பெய்தது. திருச்சி மாவட்டம் துறையூர் பகுதியில் மாலையில் சூறைக்காற்றுடன் லேசான மழை பெய்தது. காற்றில் பல வீடுகளின் கூரைகள் பறந்தன.

திண்டுக்கல் மாவட்டத்தில் கொடைரோடு, அம்மையநாயக்கனூர், பள்ளப்பட்டி, காமலாபுரம், சின்னாளப்பட்டி ஆகிய பகுதிகளில் ஒரு மணி நேரம் மழை பெய்தது.

மதுரை வாடிப்பட்டியில் பெய்த மழையில் வாழை மரங்கள் சேதமடைந்தன. சிவகாசியை அடுத்த தாயில்பட்டியில் இடி, மின்னல் தாக்கியது. இதில் ஒரு பட்டாசு ஆலையில் கட்டிடம் இடிந்து விழுந்தது.

முக்கிய செய்தி .காம்

by **ரா.ரமேஷ்குமார்** Mon Apr 08, 2013 8:18 pm

வெயிலின் தாக்கத்தை தணிக்க நீச்சல் அடிக்கலாம் என்று பார்த்தால் மழையின்மை காரணமாக கிணறுகள் அனைத்திலும் நீர் மட்டம் வெகுவாக குறைந்து விட்டது மதிய நேரங்களை சமாளிக்கவே முடிவதில்லை இதில் மின் தடை வேறு... சோகம்