உலகக்கோப்பை துப்பாக்கி சுடும் போட்டி: இந்திய வீராங்கனை தங்கம் வென்றார்

DERAR BABU · DERAR BABU Fri 5 Apr 2013 - 19:53

தென்கொரியாவின் சங்வான் நகரில் உலகக்கோப்பை துப்பாக்கி சுடும்போட்டி நடைபெற்று வருகிறது. இன்று நடைபெற்ற 25 மீட்டர் துப்பாக்கி சுடும் போட்டியில் பெண்கள் பிரிவில் இந்தியாவைச் சேர்ந்த ரஹீ சர்நோபாத் தங்கம் வென்றார்.

இவர் தன்னுடன் போட்டியிட்ட தென்கொரிய வீராங்கனை கியோங்கே கிம்மை 8- 6 என்ற புள்ளிகளில் தோற்கடித்து முதலிடத்தைப் பெற்றார். ரஹீ, 2012-ம் ஆண்டு லண்டனில் நடைபெற்ற ஒலிம்பிக் பந்தயத்தில் கலந்துகொண்ட இளம் போட்டியாளர் ஆவார். இது அவர் பெரும் உயரிய விருது ஆகும்.

வியாழன் அன்று, நடைபெற்ற போட்டிகளில் ஆண்கள் பிரிவில் ஒலிம்பிக்கில் தங்கம் வென்ற அபினவ் பிந்த்ரே உட்பட அனைவருமே பின்தங்கினர். 50மீ துப்பாக்கி சுடும் போட்டியில், பிரகாஷ் நிஞ்சப்பா மட்டுமே முதல் எட்டு பேருக்குள் வந்தார் என்பது குறிப்பிடத்தக்கது.

வெற்றி குறித்து ரஹீ கூறும்போது, ''இதற்காக நான் கடுமையாக உழைத்தேன். இந்த வெற்றியின் மூலம் எனது கனவு நனவாகியிருக்கிறது. எனக்கு உதவிய அனைவருக்கும் நன்றி கூற கடமை பட்டிருக்கிறேன்'' என்றார்.

மாலைமலர்