*** நிதானம் ***

பூர்ணகுரு · பூர்ணகுரு Sat 30 Mar 2013 - 0:56

எவரேனும் ஒருவருக்காவது

இறந்து உயிர் கொடுக்க

அந்த விதி வரம் தந்தால்

நான் ...

இன்றே இப்பொழுதே இக்கணமே

உயிர் இழக்கத் தயார்

இதில் பொய்யேதும் இல்லை

என் தாய் என்னைப் பெற்ற அளவு

சத்தியம் அசாத்தியம் !

கருவிலேயே கலையும் உயிருக்கு உயிர் கொடுக்க முடியும் என்றால் ...

கருவில் வளர்ந்து சாகும் ஜீவனுக்கு ஜீவன் அளிக்க முடியும் என்றால் ...

பிறக்கும் குழந்தை இறந்து பிறக்க நேரும்பொழுதோ

பிறந்த குழந்தை வளரும் நேரத்தில் உயிர் பிரியும்போதோ

வளர்ந்த குழந்தை மனிதனாகி மரிக்கும் தருணத்திலோ

என்னுயிர் நீங்கி அவர்க்கு இன்னுயிர் நல்குவேன் !

ஆனால் ,

அவ்வாறு வரம் அளிக்க விதிக்கு மனமும் இல்லை

வீணாக உயிர் போகாது எனும் விதியும் இல்லை !

இருந்தும் ...

இறந்தும் என்னால் பல்லுயிர்க்கு நல்லுயிராகும்

நன்னிலை விதி தந்துள்ளதே

இதை விட பெரும் வரம் ஏது ?

ஆம் !

என் கண்களினால் ஒளி பெறுவார்,

கல்லீரலினால் நலம் பெறுவார்,

சிறுநீரகங்கள் சுகம் தரும்

சிறு இதயமோ சுவாசமே தரும் ...

இன்னும் பலவை பலது தரும்

தருவதற்கு என் மனமும் முன் வரும் !

இதனை சிலர் முட்டாள்தனம் என்றால்

முட்டாள் தான் ... அவர்கள் !

சிலர் தானம் என்றால் எனக்கது தனம் தான் !

என்னைப் பொறுத்த வரையில்

இதன் பெயர் தானமோ முட்டாள்தனமோ இல்லை

நிதானம் ! ஆம் !

என் வாழ்வு முடிவுறும் வரையில்

உதவும் குணம் தந்து

என் வாழ்வு முடிந்த பின்னும்

வாழவைக்கும் விதி என் நிதானம் !

காதலித்து தோல்வி கண்டாலும்

முயற்சியில் தோற்க நேரிட்டாலும்

வாழ்வில் காயங்கள் பல பட்டாலும்

முட்டாள்தனமான முடிவுகள் எடுக்காத மனம்

விதி தந்த தானம் என் நிதானம் !

நான் நிதானம் கொண்டிருக்கிறேன் ...

நீங்கள் ... ?

நிதானம் கொள்வீரா இல்லை கொல்வீரா ...?

* அழுகும் உடலுக்கு அங்கங்கள் எதற்கு ... ?

அளிப்போம் அதனை பிறர் வாழ்வதற்கு ! *