உலகின் திரையரங்கம் – ஈழம்

by bavanvijayaraja Sun Mar 24, 2013 5:43 pm

எல்லோருக்கும் இயற்கையாகவே
கொடுமைகளைப் பார்ப்பதில்
ஏதோ ஒரு விருப்பம் இருக்கத்தான் செய்கிறது.
தமிழனின் சதைப் பிளப்பில்
மீண்டும் பழமொழி உயிர் பெறுகிறது.
விலங்கிலிருந்து பிறந்தவன் மனிதன்

கலியுகத்தில் துப்பாக்கி முனையில்
பாடம் படிப்பார்கள் என நான் கனவு கண்டதுண்டு
மெய்யானது ஈழத்தில் துப்பாக்கி முனையில்
தமிழ்ப்பிள்ளைகளுக்கு சிங்களக் கல்வி
தமிழ் உணர்வாளர்கள் தலை
தலையணைக்குள் சிக்கிக் கொண்டது

தமிழ் மக்கள் தான்
வாழ வைத்த தெய்வங்கள்
சொல்லாத அரசியல்வாதிகளும்
திரைக்கலைஞர்களும் இங்கு முயல்கொம்பு

திரைப்படங்களில் தமிழர் மானம் காக்க
காலந்தோறும் எரிமலையாய்
இங்கே தளபதிகளும் நாயகன்களும்
பொங்கிக் கொண்டே புறப்படுகிறார்கள்
ஈழப்படங்களைக் கண்ட பின்னரும்
மூச்சு விடக் கூடத் தயங்குகிறார்கள்

தங்கள் குழந்தைகளுக்கு பால் வாங்க
பணமில்லாதவர்கள் கூட
உங்கள் திரைப்படக் கட்அவுட்டுகளுக்கு
பாலூற்ற மறந்ததில்லை.
உங்கள் உதட்டிலிருந்து வரும்
எச்சில் தெறிக்கும் வார்த்தைகளைக் கேட்டு
மண்ணெண்ணெய் ஊற்றிக் கொண்ட
தீவிர ரசிகர்கள் ஏராளம்.

உணர்வுடைய தமிழனுக்காக நீங்கள்
ஒரு வார்த்தைக் கூடவா சொல்லக்கூடாது.
உங்கள் நாக்குகள்
நாளைய எதிர்காலத்துக்காக
கட்டப்பட்டிருக்கலாம்
ஆனால் உங்களுக்காகவே வாழ்ந்தவர்கள்
நாதியற்றவர்களாக சாக்கடைத் தண்ணீரை
குடிநீராய்க் குடிப்பதைக் கண்டேனும்
கொஞ்சம் பேசுங்கள். நீங்கள் பேசினால் உலகமே கேட்கும்
ஏனெனில் நீங்கள் செருப்பணிய மறந்தாலும்
அது நாளை நடுப்பக்கச் செய்தியாகி விடும்

பன்னிரண்டு வயது தாண்டாத
பிஞ்சுக் கைகள் பின்னால் கட்டப்பட்டிருக்கிறது
இரும்புச் சங்கிலியால்
கோலி குண்டுகள் விளையாடும் சிறுவர்களிடம்
துப்பாக்கிக் குண்டால் விளையாடுகிறது சிங்களம்.

உலகில் தயாரிக்கப்படும் அனைத்து ஆயுதங்களின்
பரிசோதனைக் கூடமானது தமிழனின் மார்பு
தமிழ்ப்பேசினால் சுடப்படுவோம் என்னும் அச்சம்
எல்லோர் மனதிலும் ஆழவே பதிந்துவிட்டது

பெயர்களும் மாறின பண்பாடுகளும் மாறின
ஆண் பெண் யாருடைய சட்டையிலும்
தமிழ் மொழி இல்லை
மீண்டும் உயிர்பெறுகிறது பழமொழி
அகத்தின் அழகு முகத்தில் தெரியும்

கரை காண முடியாத தமிழனின் துயரை
கரைகளாகச் சுமந்த என் கவிதையை
கரை கடந்து எடுத்துச்சென்ற
ஈகரையே தமிழரின் மானம் காக்கப்படுமானால்
தமிழர் பக்கங்களில் ஈகரையின் புகழ்
அணில் கோடுகள் போல் அழியாமல்
நிலைத்திருக்கும் நாளை தலைமுறைக்கு