இது தான் சமத்துவம்

"உங்களுடைய கர்ம பலன்கள் எதற்கும் நீங்கள் சொந்தம் கொண்டாட வேண்டாம். அவற்றுக்கு நானே காரணகர்த்தா..." என்கிறார் கிருஷ்ண பகவான்.

எனவே, நம்முடைய ஆக்ஷன்களுக்கு கிடைக்கும் பலன்கள் எப்படி அமைந்தாலும் நமக்கு அளிக்கும் பிரசாதமாகத்தான் கருதப்படுகிறது. பலன்களைப் பொறுத்தவரை இதுவே சமத்துவம். இந்த சமத்துவம் அல்லது சமநிலை 'புரிந்து கொள்ளுதலால்' மட்டுமே ஏற்படுகிறது. உண்மை பற்றிய ஞானம் இதற்குத் தேவை. மற்றபடி யார் மீதும் இதை திணிக்க முடியாது. அதனாலேயே, ஆக்ஷனுக்கு மட்டுமே நாம் காரணம்! அதன் முடிவு ஆண்டவன் கையில் என்பதை வலியுறுத்துவார்கள்.

ஆகவே, எதிர்பார்த்தது கிடைக்காமல் போனால் ஏமாற்றமடையவோ, வருத்தப்படவோ வேண்டாம். கிடைத்ததை ஏற்றுக்கொண்டு, பிறகு அந்த முயற்சியிலிருந்து கற்றுக் கொள்ள வேண்டியதைக் கற்றுக்கொண்டு, அந்த அறிவுடன் தொடர்ந்து உழைக்க வேண்டும்.

"சுவாமிஜி, இப்படிப் பலன்கள் எல்லாவற்றையும் பிரசாதமாக ஏற்றுக்கொண்டு விட்டால் நான் செயலற்றுப் போய், வாழ்க்கையில் தாழ்ந்து போய் விட மாட்டேனா ?" என்று நிறைய பேர் என்னிடம் கேட்பது உண்டு.

கிடைப்பதையெல்லாம் பிரசாதமாக ஏற்றுக் கொண்டு விட்டால் தாழ்ந்து போய் விடுவோம் என்று நினைப்பதே தவறு. அது மட்டுமல்ல, கிடைப்பது எதுவாக இருந்தாலும் அதைப் பிரசாதமாக கருதாவிட்டால் எப்படி அதை ஏற்றுக் கொள்ள முடியும் ? பலன்களை உற்சாகமாக ஏற்றுக்கொள்ளாவிட்டால் அதை வருத்தத்துடனும், விரக்தியுடனும் தான் ஏற்றுக் கொள்ள வேண்டியிருக்கும். அப்படியானால், நீங்கள் மாறுவது எப்படி..? எதையும் பிரசாதமாக ஏற்கும் மனநிலை ஏற்படும் போது தான், எந்த முடிவையும் முகம் சுளிக்காமல் எதிர் கொண்டு தொடர்ந்து செயல்பட முடியும்.

உங்கள் நண்பருக்கு திருமணம் நடக்கிறது. மண்டப வாசலில் விருந்தினர்களை வரவேற்கும் பொறுப்பை உங்களுக்குக் கொடுத்து விடுகிறார் நண்பர். முகத்தில் புன்னகையைத் தேக்கி வைத்துக் கொண்டு நீங்கள் வருபவர்களையெல்லாம் இன்முகத்துடன் வரவேற்று உள்ளே அனுப்புகிறீர்கள். இதில் தெரிந்தவர், தெரியாதவர் என்றெல்லாம் பாகுபாடு பார்ப்பதில்லை. உங்களுக்கு நெருங்கிய நண்பர் ஒருவர் வந்தால் கூட, அவருடன் நின்று நிதானித்துப் பேசவெல்லாம் நேரம் கிடைப்பதில்லை. 'ஹலோ, ப்ளீஸ் கம்..' என்று ஒற்றை வரியில் முகம் மலர வரவேற்றுவிட்டு, அடுத்தவரை கவனிக்க சென்று விடுவகிறீர்கள். இதே திருமணத்துக்கு உங்களுடைய பரம எதிரி ஒருவரும் வருகிறார் என்று வைத்துக் கொள்வோம்.

அவரை நீங்கள் எப்படி வரவேற்பீர்கள்...?

அந்த இடத்தில் மணமகனின் பிரதிநிதியாக நீங்கள் நின்று கொண்டு இருக்கிறீர்கள் என்பதையும், உங்கள் சொந்த விருப்பு-வெறுப்புகளுக்கு இங்கு இடமில்லை என்பதையும் உணர்ந்து, ஒரு புன்னகையை வரவழைத்துக் கொண்டு உங்கள் எதிரியையும் நண்பனாகக் கருதி வரவேற்கிறீகள் இல்லையா ?

- சுவாமி தயானந்த சரஸ்வதி அவர்களின் தொகுப்பிலிருந்து

நல்லது.