நீர்த்துப் போன அமெரிக்கத் தீர்மானம்

by **சிவா** Wed Mar 20, 2013 10:41 pm

https://fbcdn-sphotos-a-a.akamaihd.net/hphotos-ak-ash3/24455_10201018250323608_1563471286_n.jpg

இலங்கைக்கு எதிரான அமெரிக்காவின் முதல் வரைவு தீர்மானத்தில் இருந்த பல்வேறு முக்கிய ஷரத்துகள், இறுதித் தீர்மானத்தில் நீக்கப்பட்டு, தீர்மானத்தின் நோக்கமே நீர்த்துப் போகச் செய்யப்பட்டுள்ளது.

அமெரிக்கத் தீர்மானத்தின் முதல் வரைவு அறிக்கையில், இலங்கை குறித்து இடம்பெற்றிருந்த கடுமையான வாசகங்கள் இறுதி அறிக்கையில் பாராட்டாக மாறியிருக்கிறது.

அமெரிக்காவின் முதல் தீர்மானத்தில் முக்கிய அம்சமாக கருதப்பட்ட, வெளிநாட்டு பார்வையாளர்கள் குழு மற்றும் நிபுணர்கள், இலங்கையில் எவ்வித கட்டுப்பாடுமின்றி விசாரணை நடத்த அனுமதிப்பது குறித்த பத்தி, தற்போதைய இறுதிய அறிக்கையில் முழுமையாக நீக்கப்பட்டுள்ளது.

அடுத்ததாக, இலங்கையில் நடைபெற்ற இறுதிக் கட்டப் போரின் போது நடைபெற்ற மனித உரிமை மீறல்கள் குறித்து நம்பத்தகுந்த மற்றும் பன்னாட்டு விசாரணை நடத்த வேண்டும் என்ற அம்சத்தை அமெரிக்கா திருத்தியுள்ளது.

அதற்குப் பதிலாக, வெளிநாட்டு விசாரணை என்று குறிப்பிட்டு விட்டு, அடுத்த பத்தியிலேயே, இலங்கையே உள்நாட்டு விசாரணையை தாமாக நடத்திக் கொள்ளும் முடிவை எடுக்கலாம் என்றும் குறிப்பிடப்பட்டுள்ளது.

மற்றொரு பத்தியில், சர்வதேச மனித உரிமைச் சட்டங்கள் மற்றும் சர்வதேச மனிதாபிமான சட்டங்கள் மீறப்பட்டது குறித்து, இலங்கை அரசு சுதந்திரமான நம்பகத்தகுந்த விசாரணை நடத்த வேண்டும் என்ற வாக்கியத்தில், 'சர்வதேச' என்ற வார்த்தை நீக்கப்பட்டுள்ளது.

இதுதவிர, தீர்மானம் முழுவதும் கண்டனம் தெரிவிக்கும் வகையிலான வார்த்தைகளுக்குப் பதிலாக, மிகவும் மென்மையான வார்த்தைகள் பயன்படுத்தப்பட்டுள்ளன. இலங்கை அரசை வலியுறுத்துகிறது என்ற வார்த்தை கூட மாற்றப்பட்டு, இலங்கை அரசை ஊக்குவிக்கிறோம் என்ற வார்த்தை சேர்க்கப்பட்டுள்ளது.

இதுதவிர, தேர்தல் நடத்தியது, உள்கட்டமைப்பு வசதிகளை மேற்கொண்டது, இடம்பெயர்ந்த மக்களை மீள குடியமர்த்தியது உள்ளிட்ட மேம்பாட்டுப் பணிகளை செய்ததற்காக இலங்கை அரசை பாராட்டுவதாக தீர்மானத்தில் ஒரு பத்தி இடம்பெற்றுள்ளது.

முதலில் வெளியான வரைவு தீர்மானத்தில் இந்த குறிப்பு இடம்பெறவில்லை.

புதிய தலைமுறை!