கடவுள் வாழ்த்து

by **சாமி** Fri Mar 15, 2013 7:43 am

அகர முதல எழுத்தெல்லாம் ஆதி
பகவன் முதற்றே உலகு

பொழிப்புரை: எல்லா எழுத்துக்களும் ‘அ’ என்ற எழுத்தை முதலாக உடையன. அது போல எல்லா உலகங்களும், உயிர்களும் ஆதி பகவன் ஆன சிவபெருமானை முதல்வனாக உடையன.

விளக்கம்: எந்த ஓர் எழுத்தை சொல்லத் தொடங்கும்போதும், வாய் திறந்தவுடன் முதலில் இயல்பாக வெளிவருவது ‘அ’ என்ற ஒலிதான். பின்னர்தான் அந்த எழுத்துக்கு உரிய ஒலியாக மாற்றிக் கொள்ளப்படுகிறது. இது நுட்பமான ‘அ’கரம் என்று சொல்லப்படும்.

‘அ’ என்று சொல்லிப்பாருங்கள். ‘அ’ என்ற ஒலி வெளிப்படுகிறது. இதைப் போல் வேறு ஏதாவது ஒரு எழுத்தைச் சொல்லிப் பாருங்கள். முதலில் நுட்பமாக வெளிவருவது ‘அ’ தான்.

இந்த நுட்பமான ‘அ’கரமே பிற எழுத்துக்கள் எல்லாம் எழுவதற்கு அடிப்படையாய் உள்ளது. இந்த ‘அ’ என்ற எழுத்து வாயிலிலுள்ள கருவிகள் எதையும் அசைக்காமல் ஒலிக்கிறது; அதாவது இயற்கையாக எழுகிறது. இதை அங்காத்தல் என்பர்.
இந்த அங்காத்தலோடு பிற முயற்சிகளையும் செய்யும்போது மற்ற எழுத்துக்கள் உருவாகிறது.

இக்காரணங்களால் எழுத்துக்களெல்லாம் ‘அ’கரத்தை முதலாக உடையன என்று அறிகிறோம்.
(தொடரும்)

by mbalasaravanan Fri Mar 15, 2013 11:49 am

by **சாமி** Sun Mar 17, 2013 9:09 am

பகவன் என்ற சொல் தூய தமிழ்ச்சொல்.
‘பகு –> பகவு –> பகவன்.
பகவன் என்பது ‘பகுத்துக் காப்பவன்’ அல்லது ‘எல்லாவுயிர்கட்கும் படியளப்பவன்’ என்று பொருள்படும். எல்லாவுயிர்க்கும் படியளப்பவன் நம்பெருமான் ஈசன்.

ஆதி என்ற சொல்லும் தூய தமிழ்ச் சொல்லே. ‘ஆதல்’ என்ற தொழிற்பெயரடியாகப் பிறந்ததே ஆதி என்ற தமிழ்ச்சொல்.
செய்தல் -> செய்தி;
உய்தல் -> உய்தி,
தான்தோன்றி - தோற்றுவிப்பாரின்றித் தானே தோன்றிய இறைவனைத் தான்தோன்றி (சுயம்பு) என்பர்.
ஆதி என்பது முதல், மூலம், தொடக்கம், அடிப்படை எனவும் முதல்வன், முதலி, முன்னவன், மூலவன் எனவும் பொருள்படும் தமிழ்ச்சொல்லே.

பகவன் என்ற சொல் பழங்காலத்தில் கடவுளையே குறித்தது. பிற்காலத்தில் சிவபெருமானின் ஐந்தொழில்களைச் செய்யும் மேம்பட்ட ஆன்மாக்களான நான்முகன், திருமால் போன்றவர்களையும் பயன்படுத்தக் குறிக்கப்பட்டது. அதேபோல் சிறுதெய்வங்களைக் குறிக்கவும், பிற சமயத்தார்களாலும் பயன்படுத்தப்பட்டது. இதை வேறுபடுத்திக் காட்டவே ‘முதல்’ அல்லது தான்தோன்றி (ஆதி) என்னும் அடைமொழி கொடுக்க வேண்டியதாயிற்று. அதாவது முதற்கடவுள் என்றும், தான்தோன்றி என்றும், முழுமுதற்கடவுள் (ஆதி பகவன்) என்றும் பரம்பொருள் சிவபெருமானை அடைகொடுத்துச் சொல்ல வேண்டியதாயிற்று.
(தொடரும்)

by Kuzhali Mon Mar 18, 2013 12:03 pm

சாமி wrote:
பகவன் என்ற சொல் பழங்காலத்தில் கடவுளையே குறித்தது. பிற்காலத்தில் சிவபெருமானின் ஐந்தொழில்களைச் செய்யும் மேம்பட்ட ஆன்மாக்களான நான்முகன், திருமால் போன்றவர்களையும் பயன்படுத்தக் குறிக்கப்பட்டது. அதேபோல் சிறுதெய்வங்களைக் குறிக்கவும், பிற சமயத்தார்களாலும் பயன்படுத்தப்பட்டது. இதை வேறுபடுத்திக் காட்டவே ‘முதல்’ அல்லது தான்தோன்றி (ஆதி) என்னும் அடைமொழி கொடுக்க வேண்டியதாயிற்று. அதாவது முதற்கடவுள் என்றும், தான்தோன்றி என்றும், முழுமுதற்கடவுள் (ஆதி பகவன்) என்றும் பரம்பொருள் சிவபெருமானை அடைகொடுத்துச் சொல்ல வேண்டியதாயிற்று.
(தொடரும்)

நல்ல விளக்கம்!