பில் வைத்திருப்பது கட்டாயம் அமலுக்கு வந்தது புகையிலை சட்டம்

http://www.dinakaran.com/data1/DNewsimages/Tamil-Daily-News_6732904912.jpg
சென்னை : புகையிலை பொருட்களைவிற்பனை செய்வோர் உரிய பில்வைத்திருக்க வேண்டும் என்ற சட்டம் அமலுக்கு வந்ததால் அவற்றை மறைத்து விற்கின்றனர்.
தமிழகத்தில் புகையிலை சார்ந்த சிகரெட், பான் மசாலா, குட்கா, மெல்லும் புகையிலை மற்றும் பொருட்களுக்கு 20 சதவீத வரிகடந்த 12.7.2011 முதல் விதிக்கப்படுகிறது. 2011ல் பான் மசாலா, குட்கா போன்ற பொருட்களிலிருந்து ரூ.14.49 கோடியும், 2012ல் (டிசம்பர் வரை) ரூ.27.63 கோடியும் வரி வசூல் செய்யப்பட்டது என்றாலும் அதிக அளவில் வரி ஏய்ப்பு நடந்ததால் அரசுக்கு பல கோடி ரூபாய் வரி இழப்பு ஏற்பட்டது.
இதையடுத்து வணிகவரித் துறையினர் பான் மசாலா, குட்கா போன்ற பொருட்கள் விற்கப்படும் கடைகள், குடோன்களில் திடீர் ஆய்வு மேற்கொண்டனர். மேலும் வாகன தணிக்கை மற்றும் தணிக்கை சாவடிகள், சரக்கு அலுவலகங்கள், ரயில்வே சரக்கு மையங்கள், பேருந்து நிலையங்களிலும் தணிக்கை மேற்கொள்ளப்பட்டது. இதில் ரூ.6.86 கோடி மதிப்புள்ள பொருட்கள் பறிமுதல் செய்யப்பட்டு ரூ.2 கோடி வரி மற்றும் அபராதம் வசூலிக்கப்பட்டது.
இந்நிலையில் புகையிலை சார்ந்த பொருட்களை விற்பவர்கள் கொள்முதல் செய்த ரசீதை கட்டாயம் வைத்திருக்க வேண்டும். இருப்பின் அளவும் பில்லில் உள்ள அளவும் சரியாக இருத்தல் வேண்டும். விற்பனைசெய்யும் போது பில் போட்டு விற்க வேண்டும். சில்லரை வணிகர்கள் எனில் பொருட்கள் வாங்கிய பில்லை கடையில் வைத்திருக்க வேண்டும். அவ்வாறு இல்லையெனில் பொருட்கள் பறிமுதல் செய்யப்படும். சட்டப்படியானநடவடிக்கையும் எடுக்கப்படும் என்று வணிக வரித்துறை கடந்த 17ம் தேதி எச்சரிக்கை நோட்டீசைவெளியிட்டது. தொடர்ந்து இந்த உத்தரவு மார்ச் மாதத்தில் அமலுக்கு வரும் என்றும் எச்சரிக்கை விடுக்கப்பட்டது.
இந்த உத்தரவு அமலுக்கு வந்ததையடுத்து மயிலாப்பூரில் உள்ள கடைகளில் வணிகவரித்துறை அதிகாரிகள் நேற்று அதிரடியாக ஆய்வு நடத்தி புகையிலை பொருட்கள், சிகரெட் பாக்கெட்டுகள், ஹான்ஸ் பாக்கெட்டுகள் போன்றவற்றை பறிமுதல் செய்தனர். வணிகவரித்துறையினரின் இந்தநடவடிக்கைகள் குறித்து தகவலறிந்த பெரும்பாலான வணிகர்கள் தங்கள் கடைகளில் மக்கள் பார்வையில் படும்படி அடுக்கி வைத்திருந்த சிகரெட் பாக்கெட்டுகளை மறைவான இடங்களில் வைத்து வியாபாரம் செய்யத்தொடங்கியுள்ளனர்.
மேலும் பார்வையில் படும்படி தொங்கவிடப்பட்ட ஹான்ஸ், கைனி போன்ற புகையிலை வகைகளும் மாயமாகியுள்ளன. வணிக வரித்துறை அதிகாரிகள் சாதாரண உடையில் கடைக்கு வந்து சிகரெட் வாங்குபவர் போல நடித்து, உரிய பில்களை கேட்டு அபராதம் விதிப்பதால் கடைக்கு வந்தது அதிகாரியா, வாடிக்கையாளரா என்று தெரியாமல் கடைக்காரர்கள் புலம்புகின்றனர்.
விலை உயர்த்தி விற்பனை
வணிகவரித்துறையினர் அதிரடிநடவடிக்கை எடுத்து வரும் நிலையில் சுகாதாரத்துறையினர், புகை பிடிப்பவர்கள், சிகரெட்டுக்கு தீப்பெட்டி கொடுத்த கடைக்காரர்களுக்குஅபராதம் விதித்து வருவதால் சிகரெட்டின் விலையை கடைக்காரர்கள் 50 பைசா வரை உயர்த்தி விற்கின்றனர்.
-
தினகரன்