சுசீந்திரம் அருகே அம்மன் கோவிலில் தானாக சுழன்று ஆடிய சரவிளக்கு: பக்தர்கள் வழிபாடு...........

சுசீந்திரத்தை அடுத்த தேரூர், பாலகிருஷ்ணபுதூரில் உள்ள குளக்கரையில் அரச மரத்தின் கீழ் ஒரு இசக்கியம்மன் கோவில் உள்ளது. இந்த கோவிலில் செண்பகராமன்புதூரை சேர்ந்த தாணம்மாள் என்ற பெண் ஒவ்வொரு செவ்வாய் மற்றும் வெள்ளிக்கிழமைகளில் விளக்கேற்றி வழிபாடு நடத்துவது வழக்கம்.

இந்த கோவிலில் கடந்த 2 ஆண்டுகளுக்கு முன்பு சிறிய கட்டிடம் கட்டப்பட்டது. ஒரு அறையுடன் கூடிய இதன் 4 பக்கமும் இரும்பு கிரில்கள் அமைக்கப்பட்டு அறையில் இருக்கும் அம்மன் வெளியில் இருந்து பார்த்தால் தெரியும் அளவுக்கு கட்டப்பட்டிருந்தது.

மேலும் அங்கு 3 அடி உயரத்தில் கல்லால் ஆன சிறிய இசக்கியம்மன் சிலையும் அமைக்கப்பட்டிருந்தது. இதன் இருபுறமும் இரண்டு சரவிளக்குகள் போடப்பட்டிருந்தன.

இந்த விளக்குகளில் செவ்வாய், வெள்ளி கிழமைகளில் தாணம்மாள் வந்து விளக்கேற்றி செல்வார். நேற்று திங்கள் கிழமை என்றாலும் சில பக்தர்கள் கோவிலுக்கு வந்தனர். அவர்கள் கட்டிடத்திற்கு வெளியே நின்றபடி சாமி கும்பிட்டனர். அப்போது திடீரென சிலையின் ஒருபுறம் போடப்பட்டு இருந்த சர விளக்கு அங்குமிங்கும் ஆடியது.

அது காற்றால் ஆடியது என்றால் இரண்டு சரவிளக்குகளுமே ஆடி இருக்க வேண்டும். ஆனால் ஒரு விளக்கு மட்டும் ஆடியது பக்தர்களுக்கு வியப்பை ஏற்படுத்தியது. இதனை அவர்கள் ஊருக்குள் சென்று மற்றவர்களிடம் தெரிவித்தனர்.

இதனால் சந்தேகம் அடைந்த அவர்கள் மீண்டும் ஊர் மக்களுடன் கோவிலுக்கு வந்து பார்த்தனர். அப்போதும் ஒரு விளக்கு மட்டும் அங்குமிங்கும் ஆடிக்கொண்டு இருந்தது. சில நேரங்களில் அது அம்மன் சிலையை உரசியபடி ஆடியது. இதனால் பரவசம் அடைந்த பக்தர்கள் கோவிலுக்கு விளக்கிடும் பெண் தாணம்மாளுக்கு தகவல் தெரிவித்தனர். அவரும் விரைந்து வந்து அந்த விளக்கை கையால் பிடித்து நிறுத்தினார். அவர் கையை எடுத்ததும் மீண்டும் விளக்கு ஆடியது. இந்த அதிசயம் பக்தர்களை பரவசத்தில் ஆழ்த்தியது.

உடனே அங்கு சிறப்பு வழிபாடுகள் நடத்தப்பட்டன. தகவல் அறிந்து அக்கம்பக்கத்து கிராம மக்களும் கோவிலுக்கு வந்தனர். இன்று காலையிலும் கோவில் விளக்கு ஆடிக்கொண்டு இருந்ததால் ஏராளமானோர் திரண்டு சிறப்பு வழிபாடுகள் நடத்தி பரவசத்தில் ஆழ்ந்தனர்.

மாலைமலர்