க

உயிர்மெய் எழுத்துக்கள் பதினெட்டில், சொல்லுக்கு முதலில் வருவதை மொழிமுதலெழுத்து என்றும் முடிவில் வருவதை மொழியீற்றெழுத்து என்றும் கூறுவர்.

மொழிக்கு முதலில் வருவன: க, ச, த, ப, ஞ, ந, ம, ய, வ என்ற ஒன்பதெழுத்துக்களாகவும்;
ஈற்றில் வருவன: ண, ம, ன, ய, ர, ல வ, ழ, ள என்ற எட்டெழுத்துக்களாகவும் அறியப்படுகின்றன.
இவற்றில் ககரமே முதலெழுத்தாக அமைந்துள்ளது எனலாம்.

க் என்ற மெய்யும் அ என்ற உயிரும் இணைத்து க வென்று நிலைபெற உயிர்மெய் எழுத்தானதால், ககரத்திற்குச் சிறப்பிடமும் உள்ளதைக் காணலாம். ஈற்றெழுத்தாக வந்து, வியங்கோள் விகுதியென்றும் அறியப்படும். எ.கா. செய்க, வருக, அறிக எனக் கூறலாம்.

முதலெழுத்தான ககரம், எண்களின் வரிசையில் எண் ஒன்றாகவும் அறியப்பட்டுள்ளது. தமிழரின் எண்ணியல் முறைக்கான வரிவடிவங்களாக ஒன்றுமுதல் தொண்டு எனப்படும் ஒன்பது வரையிலான குறியீடுகளாவன: க,உ,ங,ச,ரு,சு,எ,அ,கு என்றவாறு அமையும். இவை முறையே ஒன்று, இரண்டு, மூன்று, நான்கு, ஐந்து, ஆறு, ஏழு, எட்டு, தொண்டு அல்லது ஒன்பது என அறியப்படும். மேற்கண்ட தமிழ்வடிவங்கள் யாவும், ஏதோவொரு பொருளை உள்ளடக்கியவைகளாகும். அப்பொருளுக்கான சொல்லின் முதலெழுத்தாகவோ, குறியீடாகவோ இவை அமைந்துள்ளன.

ஒன்று எனப்படும் சொல்லை, தொடக்கத்தில் ஒரு நேர்க்கோடாகவும் பின்னர் கூட்டல் அடையாளம் போன்றும் குறித்தனர். அந்த ஒரு நேர்க்கோடும் அடையாளமும், க என்ற ஒலியைத் தந்தன. தமிழில் க என்ற எழுத்தை எழுத மேற்கண்ட குறியீடுகளே பயன்பட்டன. க என்ற முதல் உயிர்மெய் எழுத்தை எண் ஒன்றாகக் கொண்டதற்குப் பல்வேறேஉ ஆழமான சிந்தனைகள் அதனுள் அடங்கியிருப்பதாகவே தெரிகின்றது.

(தொடரும்)
(மொழியியல் அறிஞர் ம.சொ.விக்டர் எழுதியது)

தொடருங்கள் சாமி