இலங்கைக்கு எதிராக அமெரிக்கா தீர்மானம் இன்று தாக்கல் செய்யப்படுமா?

இலங்கையில் நடந்த போர் குற்றங்கள் குறித்து விசாரிக்காத, அந்நாட்டு அரசுக்கு எதிராக, சர்வதேச மனித உரிமை ஆணையத்தில், அமெரிக்கா, இன்று தீர்மானம் கொண்டுவர திட்டமிட்டுள்ளது.இலங்கையில், 2009ல், ராணுவத்துக்கும், விடுதலை புலிகளுக்கும் இடையே, இறுதி கட்ட சண்டை நடந்தது. இதில், விடுதலைப் புலி தலைவர் பிரபாகரன் கொல்லப்பட்டார். ஏராளமான விடுதலைப் புலிகள், ராணுவத்திடம் சரணடைந்தனர்.
சரணடைந்த விடுதலை புலிகள், ரகசியமான இடங்களில் வைக்கப்பட்டு, ராணுவத்தினரால், பல்வேறு கொடுமைகளுக்கு ஆளாக்கப்பட்டதாகவும், பெண் விடுதலை புலிகள், பாலியல் பலாத்காரத்துக்கு ஆளானதாகவும், மனித உரிமை அமைப்புகள் குற்றம் சாட்டின.இலங்கையில் நடந்த போர் குற்றங்கள் குறித்தும், பாதிக்கப்பட்டவர்களுக்கான, மறுவாழ்வு நடவடிக்கைகள் குறித்தும், நல்லிணக்க ஆணைக்குழு, சில பரிந்துரைகளை செய்திருந்தது. இந்த குழு பரிந்துரைகள் மீது, இலங்கை அரசு நடவடிக்கை எடுக்க தவறி விட்டதாக கூறி, கடந்த ஆண்டு, ஜெனிவாவில் உள்ள, சர்வதேச மனித உரிமை ஆணையத்தில், அமெரிக்கா, கண்டன தீர்மானம் கொண்டு வந்தது.இதற்கிடையே, இந்த ஆண்டும், மனித உரிமை ஆணையத்தில் இலங்கைக்கு எதிராக தீர்மானம் கொண்டு வர, அமெரிக்கா முடிவு செய்துள்ளது.சுவிட்சர்லாந்தின் ஜெனிவாவில், மனித உரிமை ஆணையத்தின் கூட்டம் தற்போது நடக்கிறது.இலங்கையில் நடந்த போர்க் குற்றங்கள், கல்லம் மக்ரே என்பவர் தயாரித்துள்ள, "நோ பயர் சோன்' என்ற ஆவணப்படம், நேற்று முன்தினம், மனித உரிமை ஆணையத்தில், திரையிடப்பட்டது. இதற்கு இலங்கை அரசு கடும் எதிர்ப்பு தெரிவித்திருந்தது.இலங்கையில், போர் குற்றங்கள் நடந்துள்ளதாக தெரிகிறது. இந்த விஷயத்தில், நல்லிணக்க ஆணைக்குழுவின் பரிந்துரையை, அந்நாட்டு அரசு செயல்படுத்தவில்லை என கூறி, மனித உரிமை ஆணையத்தில் இன்று, அமெரிக்கா தீர்மானம் கொண்டு வர திட்டமிட்டுள்ளது. இந்த தீர்மானத்தை இந்தியா ஆதரிக்க வேண்டும் என, தமிழகத்தில் உள்ள பெரும்பாலான கட்சிகள், மத்திய அரசை வலியுறுத்தியுள்ளன.இந்த தீர்மானம் நிறைவேற்றப்படுவதன் மூலம், இலங்கை அரசுக்கு, மேலும் நெருக்கடி அதிகரிக்கும்.
-தினமலர்

கண்டிப்பாக இந்தியா , தமிழர்களுக்கு எதிரான முடிவை கண்டிப்பாகவே எடுக்கும் அதற்கும் நாம் தலை ஆட்டுவோம் ,தமிழனாக பிறந்ததற்கு அவமானப் படுகிறேன்