தமிழ்ப் படங்களில் நடிக்க நயன்தாராவுக்கு தடை!

சென்னை: தமிழ்ப் படங்களில் நடிக்க நடிகை நயன்தாராவுக்கு தடை விதிக்கப்படுவதாக, திரைப்பட தயாரிப்பாளர்கள் சங்கமும் தென்னிந்திய நடிகர் சங்கமும் கூட்டாக அறிவித்துள்ளன.

இது தொடர்பாக தமிழ் திரைப்பட தயாரிப்பாளர்கள் சங்கம் வெளியிட்ட அறிக்கையில், "தமிழ் திரைப்பட தயாரிப்பாளர் சங்கமும் தென்னிந்திய நடிகர் சங்கமும் ஏற்கனவே செய்துள்ள ஒப்பந்தப்படி, தயாரிப்பாளரிடம் இருந்து நடிகர் - நடிகைகள் அட்வான்ஸ் பணம் வாங்கிய பிறகு சம்பந்தப்பட்ட படத்தில் ஒரு நாளாவது நடித்து இருந்தால் அந்த பணத்தை தயாரிப்பாளருக்கு திருப்பி தர வேண்டியதில்லை.

ஆனால், ஒரு நாள் கூட நடிக்காத பட்சத்தில் அட்வான்ஸ் பணத்தை தயாரிப்பாளரிடம் திருப்பி தந்து விட வேண்டும். அதன்படி தயாரிப்பாளர் சுபாஷ் சந்திரபோஸ், நடிகை நயன்தாரா ஆகிய இருவருக்கும் இடையிலான கால்ஷீட் பிரச்சனை தொடர்பாக இரண்டு மாதங்களுக்கு முன் நயன்தாராவுக்கு அறிவுறுத்தப்பட்டது.

எனினும், அட்வான்ஸ் திரும்ப தர முடியாது என்றும் தான் கொடுத்த தேதிகளை தயாரிப்பாளர் பயன்படுத்தவில்லை என்றும் பத்திரிகைகள் வாயிலாக பேட்டியாக நயன்தாரா தெரிவித்தார். இதையடுத்து இரண்டு சங்கங்களின் கூட்டு கூட்டத்தில் விரிவாக பேசி எடுத்த முடிவின்படி, குறிப்பிட்ட காலத்துக்குள் அட்வான்ஸ் பணத்தை திரும்ப கொடுத்துவிடுமாறு நயன்தாராவிடம் கூறப்பட்டது.

இதுவரை அவர் திரும்ப கொடுக்கவில்லை. அது குறித்து கேட்டபோது, 'நான் வாங்கிய அட்வான்ஸ் பணத்தை திரும்ப தர மாட்டேன்' என்று தகவல் அனுப்பி இருக்கிறார். எனவே, மீண்டும் இரண்டு சங்கங்களின் கூட்டு கலந்தாய்வு கூட்டம் நடந்தது.

இந்த கூட்டத்தில் எடுத்த முடிவின்படி, நடிகை நயன்தாராவை இனிமேல் தமிழ் திரைப்படங்களில் ஒப்பந்தம் செய்யக் கூடாது என்றும் மற்ற மொழி படங்களில் அவரை நடிக்க வைக்க கூடாது என அந்தந்த மொழி தயாரிப்பாளர் சங்கங்களில் பேசுவது என்றும் முடிவு செய்யப்பட்டுள்ளது.

தமிழ் திரைப்பட தயாரிப்பாளர் சங்கமும், தென்னிந்திய நடிகர் சங்கமும் இணைந்து நடத்திய கூட்டுக் கலந்தாய்வு கூட்டத்தில் எடுக்கப்பட்ட இந்த முடிவினை தயாரிப்பாளர்கள் அனைவரும் கடைப்பிடிக்க வேண்டும் என்று கேட்டுக் கொள்ளப்படுகிறார்கள்," என்று அந்த அறிக்கையில் கூறப்பட்டுள்ளது.

பையா விவகாரம்!

லிங்குசாமியின் 'பையா' திரைப்படத்தில் நடிப்பதற்காக நயன்தாராவுக்கு ரூ.1 கோடி சம்பளம் பேசப்பட்டது. மேலும், அட்வான்சாக ரூ.15 லட்சம் அளிக்கப்பட்டதாக தெரிகிறது. இந்த படத்தை லிங்குசாமியின் சகோதரர் சுபாஷ் சந்திரபோஸ் தயாரிக்கிறார்.

கால்ஷீட் பிரச்சனை தொடர்பாக அந்த படத்தில் இருந்து நயன்தாரா விலகிவிட்டார். ஆனால் அட்வான்ஸ் பணத்தை அவர் திரும்ப கொடுக்க மறுத்துவிட்டார்.

இது தொடர்பாக அளித்த புகாரின் அடிப்படையில்தான் தமிழ் திரைப்பட தயாரிப்பாளர்கள் சங்கமும் தென்னிந்திய நடிகர் சங்கமும் இணைந்து கூட்டு கலந்தாய்வு கூட்டத்தை நடத்தின.

அப்போது, 'பையா' படத்திற்கு வாங்கிய அட்வான்ஸ் தொகையை நடிகை நயன்தாரா திரும்ப கொடுக்க மறுப்பது குறித்து விவாதிக்கப்பட்டது. இறுதியில், 'இனி எந்த தமிழ் படத்திலும் நடிப்பதற்கு நடிகை நயன்தாராவை ஒப்பந்தம் செய்யக்கூடாது' என்று முடிவு எடுக்கப்பட்டது.

லிங்குசாமியின் 'பையா' படத்தில் இப்போது கார்த்திக்கு ஜோடியாக நடிகை தமன்னா நடித்துவருவதும் குறிப்பிடத்தக்கது.