புல் சாப்பாடு-முக நூலில் ரசித்தது

ஃ)
============
அவர் அந்த ஊர் பெரிய மனிதர், ஒரு நாள் தன் காரில் எங்கேயோ போய்விட்டுத் திரும்பி வந்துகொண்டிருந்தார், வழியில் சாலை ஓரமாக இருந்த புல்வெளியில் இரண்டு பேர் புல்லைப் பறித்து வேகமாகத் தின்றுகொண்டிருந்தார்கள், அதைப் பார்த்த அந்தப் பெரிய மனுதர் தன் கார் ஓட்டுநரிடம், “வண்டியை நிறுத்திட்டு, போய் அந்த ரெண்டு பேரும் ஏன் புல் தின்னுக்கிட்டிருக்காங்கன்னு விசாரிச்சுட்டு வா,” என்று ஆணையிட்டார்.

“ஓட்டுநர் அவர்கள் அருகில் சென்றார். ஏனப்பா ரெண்டு பேரும் இப்படி புல் சாப்பிடுறீங்க,” என்று கேட்டார்,

இருவரும், “நாங்க ஏழைங்க. வருமானமில்லை, அதனால சாப்பாட்டுக்கே வழியில்லை. அதனாலதான் புல்லைச் சாப்பிட்டு பசியாத்திக்கிட்டு இருக்கோம்,” என்றார்கள்,

ஓட்டுநர் இதை அந்தப் பெரிய மனிதரிடம் தெரிவித்தார், உடனே அவர், “அடப்பாவமே,” என்ற சொல்லிக்கொண்டே, அந்த இரண்டு பேரையும் தன்னிடம் அழைத்து வரச்சொன்னார். ஓட்டுநர் அந்த இருவரையும் அழைத்து வந்தார், அவர்களிடம் பெரிய மனிதர், “என்னப்பா இப்படி இங்கே உக்காந்து புல் சாப்பிட்டுக்கிட்டு இருக்கீங்க... எங்கூட என் வீட்டுக்கு வந்து நல்லா சாப்பிடுங்க,” என்றார்,

இருவரில் ஒருவர், “அய்யா, நான் மட்டும் இல்லீங்கய்யா, என் பெஞ்சாதி, மூணு பசங்க இருக்காங்க,” என்றார்.

“தாராளமா அவங்களையும் அழைச்சுக்கிட்டு வா,” என்றார் பெரிய மனிதர்,

உடனே இன்னொருவர், “அய்யா நானும் தனியாளு இல்லீங்க, என் பெஞ்சாதியும் ஆறு புள்ளைங்களும் இருக்காங்கய்யா,” என்றார்.

“பரவாயில்லப்பா, அவங்களையும் கூட்டிக்கிட்டு வா, நீங்க எல்லாருமே தாராளமா சாப்பிடலாம்,” என்றார் பெரிய மனிதர்.

அவர் சொன்னது போலவே இருவரும் தங்களது குடும்பத்தினரை அழைத்து வந்தார்கள். அவர்களை அனைவரையும் தன் காரிலேயே ஏறிக்கொள்ளச் சொன்னார் அவர்,

கார் போகும் வழியில் அந்த இருவரில் ஒருவர், “அய்யா பெரிய மனுசன் பெரிய மனுசன்தான்னு நிரூபிச்சிட்டீங்க... உங்களுக்கு எப்படி நன்றி சொல்றதுன்னே தெரியலை... இப்படி திடீர்னு எங்களை வீட்டுக்குக் கூட்டிட்டுப் போறீங்களே, அங்கே சிரமப்பட மாட்டாங்களா,” என்று கேட்டார்.

“இதிலே ஒரு சிரமமும் இல்லை... நீங்க பசியாறணும்கிறதுதான் முக்கியம்... என் வீட்டுத் தோட்டத்திலே நிறைய புல் முளைச்சிருக்கு,” என்றார் பெரிய மனிதர்.

-இன்று நான் படித்த பட்டினி பற்றிய நகைச்சுவைக் கதை இது. இந்தக் கதையையும், ஏழைகளின் உணவு நெருக்கடிக்குத் தீர்வு என்ற பெயரில் மன்மோகன் சிங் அரசு அறிவிக்கிற ஏமாற்றுத் திட்டங்களையும் ஒப்பிட்டுப்பார்ப்பதோ, ஒப்பிட்டுப்பார்க்காமல் இருப்பதோ உங்கள் விருப்பம்.

“இதிலே ஒரு சிரமமும் இல்லை... நீங்க பசியாறணும்கிறதுதான் முக்கியம்... என் வீட்டுத் தோட்டத்திலே நிறைய புல் முளைச்சிருக்கு,” என்றார் பெரிய மனிதர்.

பெரிய மனிதர்