மனச்சோர்வினை அறிந்து கொள்ள உதவும் அறிகுறிகள்

by **Powenraj** Fri Mar 01, 2013 8:59 am

http://media.dinamani.com/article1478298.ece/ALTERNATES/w460/child_sun.jpg
எப்போதும் துயரத்தில் இருப்பவர்களை நாம் பார்த்திருக்கிறோமா? பெரும்பாலும் இல்லை என்பதுதான் நமது பதில். சிலர் அடிக்கடி சோகமாக இருப்பார்கள் என்று வேண்டுமானால் கூறலாம். சிலர் எப்போதும் கடுகடுவென இருப்பார்கள். ஆனால் அது அவர்கள் இயல்பு.
-
ஆனால், எப்போதுமே ஏதாவது ஒரு விஷயத்தைப் பற்றி சிந்தித்து கவலைப்படுபவர்களாக இருப்பவர்களைத் தான் மனச் சோர்வுக்கு உள்ளானவர்கள் என்று கூறுவர்.
ஒரே ஒரு விஷயத்தை வைத்துக் கொண்டு எப்போதுமே கவலைப்படுபவர்களாகவோ அல்லது அவ்வப்போது நிகழும் ஏதாவது ஒரு விஷயத்தை நினைத்து கவலைப்படுபவர்களாகவோ இருப்பார்கள்.
மகிழ்ச்சியான சமயத்திலும், மற்றவர்கள் அடையும் மகிழ்ச்சியின் அளவுக்கு இவர்களது மகிழ்ச்சி இருக்காது.
மற்றவர்களோடு ஒத்துப் போவதில் சிக்கல் ஏற்படுவது,இது பொதுவாக இளைஞர்களுக்கு ஏற்படும் மனச்சோர்வின் போது அதிகமாக ஏற்படும் அறிகுறியாக இருக்கும்.
-
பள்ளி, கல்லூரி, பணியிடங்களில் சிலர் தங்களது மனச்சோர்வினை வெளிப்படுத்துவார்கள். ஆனால் வீட்டில் அவர்களது மனச்சோர்வினைப் பற்றி குடும்பத்தார் அறிந்திருக்க மாட்டார்கள். இதற்குக் காரணம், அவர்களுக்கு மனச்சோர்வினை ஏற்படுத்தும் பிரச்னையே வீட்டில்தான் இருக்கிறது.
சிலருக்கு ஏற்படும் உடல் உபாதைகள் காரணமாகக் கூட மனச்சோர்வு ஏற்படலாம். அவ்வப்போது ஏதேனும் உடல் உபாதைகள் ஏற்பட்டால், அதனை குடும்பத்தார் உதாசீனப்படுத்தலாம். அதனாலும் மனச்சோர்வு ஏற்படுகிறது.
சிலர் தங்களது மனச்சோர்வினை உடல் உபாதைகளாக வெளிப்படுத்துவார்கள். தலை வலி, காய்ச்சல், வயிற்று வலிபோன்றவை வந்ததாகக் கூறுவார்கள். ஆனால் அவர்களுக்கு அவ்வாறு எதுவும் ஏற்படுவதில்லை. ஆனால் மற்றவர்களின் கவனத்தை தம் மீது திசை திருப்ப அவ்வாறு கூறுவதும் உண்டு.
-
அவர்கள் எப்போதும் விரும்பிச் செய்யும் வேலை அல்லது விளையாட்டு, பொழுதுபோக்கு விஷயங்களில் கூட ஆர்வம் இல்லாமல் இருப்பது.
ஒரு சிலர் விளையாடப் போகும்போது அங்கு அதற்கான சூழ்நிலை இல்லாமல் இருந்தால் திரும்பி வந்து கவலை அடைவது மனச்சோர்வு அல்ல. விளையாட வாய்ப்பிருந்தும், அவற்றில் பங்கெடுக்க விரும்பாமல் இருந்தால் அது மனச்சோர்வுக்கான காரணியாக இருக்கலாம்.
-
இரவில் அதிக நேரம் கண்விழித்திருப்பது, நடு இரவில் முழிப்பு வருவது, பகல் நேரத்தில் களைப்போடு காணப்படுவது போன்றவை மனச் சோர்வின் அறிகுறிகளாக இருக்கலாம். ஆனால் இதெல்லாம் அவர்களது இயல்பான தூக்க அளவு மாறுபட்டு இந்த நிலையை அடைந்தால் மட்டுமே இது மனச்சோர்வின் அறிகுறியாக இருக்கும்.
இவை அனைத்துமே மனச்சோர்வு ஏற்பட்டிருக்குமோ என்று சந்தேகத்தினை ஏற்படுத்திய பிறகு ஆராயப்பட வேண்டியவை. ஆனால் இவற்றில் ஒன்று இருந்தாலே அவர்கள் மனச்சோர்வுக்கு உள்ளாகி இருப்பார்கள் என்று கூற முடியாது.
-
சில பிள்ளைகள் பள்ளியில் குறும்புத் தனம் செய்வதை வழக்கமாக வைத்திருக்கும். ஆனால், எப்போதும் வகுப்பில்அமைதியாக, கவனமாக இருக்கும்பிள்ளை, வகுப்பறையில் திடீரென கத்துதல், அழுதல் கவனம் இன்றி இருத்தல் போன்றவை ஏற்பட்டு அது நீடித்தால் அக்குழந்தைக்குமனச்சோர்வு ஏற்பட்டிருக்குமோ என்று கண்காணிக்கலாம்.
சிறியவர்கள் முதல் பெரியவர்கள் வரை தற்போது குடும்பத்தோடு ஒட்டுதல் இன்றி, தனித்தும், ஒரே குடும்பத்தில் வாழ்ந்தாலும், ஒருவரை ஒருவர் கவனிக்க வழி இன்றியும் வாழும் சூழ்நிலை இப்போது உள்ளது. இதனால் மனச்சோர்வை கண்டறிவது கடினமாகியுள்ளது. எனினும், நீங்கள் உங்களைச் சுற்றியுள்ள நபர்களிடம் மனச்சோர்வுக்கான அறிகுறிகளைக் கண்டால், உடனடியாக அவர்களுக்கு ஏற்பட்டுள்ள பிரச்னையில் இருந்து விடுவித்து அவரை மீட்பது அவசியமான ஒன்று என்பதை உணருங்கள்.
-
தினமணி