நிதிநிலை அறிக்கையால் ஏழை, எளிய விளிம்புநிலை மக்களுக்கு எந்தப் பயனும் இல்லை: வைகோ கருத்து

http://mmimages.maalaimalar.com/Articles/2013/Feb/973bee83-ef1b-4687-9848-b036750fc3bd_S_secvpf.gif
மதிமுக பொதுச் செயலாளர் வைகோ வெளியிட்டுள்ள அறிக்கையில் கூறியிருப்பதாவது:-
மத்திய நிதி அமைச்சர் ப.சிதம்பரம் தாக்கல் செய்து உள்ள 2013-2014 ஆம்ஆண்டுக்கான நிதிநிலை அறிக்கை, அனைத்துத் தரப்புமக்களையும் அதிருப்தி அடையச் செய்து உள்ளது. உலக நாடுகளில் பொருளாதார மந்தநிலை இருந்தாலும், இந்தியப் பொருளாதார வளர்ச்சியில் நல்ல நிலையில் இருப்பதாக நிதி அமைச்சர் கூறி உள்ளார். ஆனால், இதன் பயன் மக்களுக்குப் போய்ச் சேரவில்லை.
-
கடந்த நிதி ஆண்டில் பொருளாதார வளர்ச்சி 6.9 சதவிகிதம் என்று இலக்கு நிர்ணயிக்கப்பட்டது; ஆனால், 5 சதவிகித வளர்ச்சியையே எட்ட முடிந்தது. நடப்பு ஆண்டில்இது 6.7 சதவிகிதம் என்பது எப்படி சாத்தியம் ஆகும்?
பணவீக்க விகிதம் 6.6 சதவீதம் உள்ள நிலையில், அதனைக் குறைத்து, விலைவாசிஏற்றத்தைக் கட்டுக்குள் கொண்டுவர உருப்படியான திட்டம் இல்லை. விலைவாசி உயர்ந்திடக் காரணமாக இருக்கும் பெட்ரோலியப் பொருட்கள் விலை குறைக்கவோ,சேவை வரி விதிப்பு, இணையதள வர்த்தகம் ஆகியவற்றை இரத்து செய்யவோ நடவடிக்கை இல்லை.
-
வேளாண்மைத் துறை வளர்ச்சி 1.8 சதவீதமாகச் சரிந்து உள்ளது. ஆனால், இதற்கான நிதி ஒதுக்கீடு மிகவும் குறைவு. விவசாயக் கடன்களுக்கான வங்கி வட்டி விகிதம் 4 சதவீதமாக குறைக்க வேண்டும், பயிர்க்காப்பீட்டுக்கு அதிக நிதி ஒதுக்கீடு, இரசாயன உரங்களின் விலையைக் குறைக்க வேண்டும் என்று விவசாயிகள் மிகவும் எதிர்பார்த்து இருந்தனர். ஆனால், இதை எதையும் நிதி அமைச்சர் கண்டுகொள்ளவில்லை என்பது வேதனை அளிக்கிறது. காவிரிப் படுகை விவசாயிகள் மற்றும் வறட்சியால் பாதிக்கப்பட்டதமிழக விவசாயிகளின் வங்கிக் கடன்களை தள்ளுபடி செய்யவேண்டும் என்ற கோரிக்கையும் ஏற்கப்படவில்லை.
-
உற்பத்தி தொழில்துறை பல நெருக்கடிகளைச் சந்தித்துவருகிறது. கச்சா எண்ணெய் விலை உயர்வு, மூலப் பொருட்கள் விலை உயர்வு, மின்சாரத் தட்டுப்பாடு, அரசின் பல்வேறு வரி விதிப்புகள் ஆகியவற்றால் பாதிக்கப்பட்டு உள்ளது. தொழில் துறை வளர்ச்சிக்கு எதிர்பார்க்கப்பட்ட அறிவிப்புகள் இல்லாதது தொழில்துறையினருக்கு ஏமாற்றம் அளிக்கும். தொழில் வளர்ச்சிக்கு இன்றியமையாத மின்சாரத்துறை வளர்ச்சிக்கான அதிக முதலீடுகள், திட்டங்கள் நிதிநிலை அறிக்கையில் இல்லை. சூரிய ஒளி மற்றும் காற்று மின் உற்பத்தித் திட்டங்களை ஊக்குவிக்க, மானியத்துடன் கூடிய அறிவிப்புகளை மத்திய அரசு செய்து இருந்தால், மின்சாரப் பற்றாக்குறையைப் போக்கப் பயன்படுவதாக இருக்கும்.
-
கட்டுக்கு அடங்காத விலைவாசி உயர்வும், அதிகரித்து வரும் செலவினங்களும் தனிநபர் சேமிப்பு குறைந்து வருதற்குக் காரணங்கள் ஆகும். இந்நிலையில், சேமிப்பை ஊக்குவிக்கத் திட்டங்கள் இல்லை. தனிநபர்வருமான வரி விலக்கு அடிப்படை உச்ச வரம்பை தற்போதுள்ள விலை இரண்டு இலட்சத்தில் இருந்து, ஐந்து இலட்சமாக உயர்த்த வேண்டும் என்ற எதிர்பார்த்து இருந்த. நடுத்தர வருமானம் உள்ள மக்களுக்கு நிதி நிலை அறிக்கை பெரும் ஏமாற்றத்தை அளித்து உள்ளது.
கல்வித்துறை வளர்ச்சிக்குஉள்நாட்டு மொத்த உற்பத்தியில் 6 சதவீதம் ஒதுக்கீடு செய்ய வேண்டும் என்பது நீண்டகாலக் கோரிக்கை ஆகும். ஆனால், ரூபாய் 65,867 கோடி மட்டுமே ஒதுக்கப்பட்டு உள்ளது. சுகாதரத்துறைக்கு ஒதுக்கீடு ரூபாய் 21,239 கோடி மிகவும் குறைவு.
-
தொழிலாளர் நலன்களுக்கான திட்டங்களோ, புதிய வேலைவாய்ப்புகளை உருவாக்கவோ திட்டங்கள் இல்லை. கருப்புப் பணத்தை மீட்க, கடந்த ஆண்டு அறிவிக்கப்பட்ட ஐந்து அம்சத் திட்டம் என்னவாயிற்று? வெளிநாட்டுவங்கிகளில் பதுக்கி வைக்கப்பட்டு உள்ள கருப்புப் பணத்தைத் திரும்பக் கொண்டுவரவும் நடவடிக்கை இல்லை.
ஒட்டுமொத்தமாக மக்கள் விரோத நிதிநிலை அறிக்கையைத் தான் ப.சிதம்பரம் தாக்கல் செய்து இருக்கிறார். சாதாரண ஏழை, எளிய விளிம்புநிலை மக்களுக்கு எந்தப் பயனும் இல்லை.
இவ்வாறு அதில் கூறப்பட்டுள்ளது.
-
மாலைமலர்

சரியா சொன்னீங்க!