நல்ல வாய்ப்பு இது, நழுவவிடாதீர்கள்

**Powenraj** · **Powenraj** Wed Feb 27, 2013 10:00 am

ஆங்கிலத்தில் ஒரு பழமொழி உண்டு. எல்லா சாலைகளும் ரோமாபுரியை நோக்கியே என்பார்கள். அதுபோன்ற நிலைதான் இப்போது இந்திய அரசியலிலும் ஏற்பட்டுள்ளது. எல்லா சாலைகளும் 2014-ம் ஆண்டு பாராளுமன்ற தேர்தலை நோக்கித்தான். ரெயில்கள் அனைத்தும் ஒரு இடத்தில் புறப்பட்டு மற்றொரு இடத்துக்கு போய்ச்சேரும். எடுத்துக்காட்டாக, சென்னையில் இருந்து கன்னியாகுமரி வரை போகும் ரெயிலில் செல்பவர்கள், சிலநேரம் தங்கள் பயணத்தை திருநெல்வேலியிலேயே முடித்துக்கொண்டு இறங்கவேண்டிய நிலை ஏற்பட்டுவிடும். அதுபோல, 2014-ம் ஆண்டுதான் பாராளுமன்ற தேர்தல் என்றாலும், 2013-ம் ஆண்டு இறுதியிலேயே தேர்தல் நடக்க வாய்ப்பு இருப்பதாக சில கட்சிகள் கட்டியம் கூறுகின்றன. 2014-ம் ஆண்டுதேர்தல் நடந்தாலும் சரி, 2013-ம் ஆண்டு இறுதியில் நடந்தாலும் சரி, நேற்று தாக்கல் செய்யப்பட்ட ரெயில்வே பட்ஜெட், இன்று தாக்கல் செய்யப்படவுள்ள பொருளாதார ஆய்வறிக்கை, 28-ந்தேதி தாக்கல் செய்யப்பட இருக்கும் பொது பட்ஜெட் ஆகியவைதான், பாராளுமன்ற தேர்தலுக்கு முன்பாக வெளியிடப்படும் முழுமையான அறிக்கைகளாகும்.எனவே, இந்த வாய்ப்பை ஐக்கிய முற்போக்குக்கூட்டணி அரசாங்கம் தவறவிட்டுவிடாது. என்னதான்பொருளாதார நிலை மோசமாக இருந்தாலும், அதை மேம்படுத்தும் வகையில்தான் பட்ஜெட் இருக்கவேண்டும் என்று பொருளாதார நிபுணர்கள் கூறினாலும், யதார்த்தமான நிலையில் தேர்தலை சந்திக்கப்போகும் அரசாங்கத்தால், மக்களை கவரும் பட்ஜெட்டைத்தான் இப்போது தாக்கல் செய்யமுடியும் என்பது நிதர்சனமான உண்மையாகும்.
-
பொருளாதார நிலையை மேம்படுத்த வேண்டும் என்றால், சில கசப்பான தியாகங்களை மக்கள் ஏற்றுக்கொண்டுதான் ஆகவேண்டும். ஆனால், அதெல்லாம் ஓட்டு வங்கியை பாதித்துவிடுமோ? என்ற பயத்தில், சலுகைகளையும், மானியங்களையும் அள்ளிவீசும் பட்ஜெட்டைத்தான் அரசு தாக்கல் செய்யும் என்று எல்லோரும் எதிர்பார்த்துக்கொண்டிருக்கிறார்கள். அதே ஓட்டு வங்கியை மனதில் வைத்து, எதிர்க்கட்சிகளாலும் அப்படிப்பட்ட திட்டங்களை எதிர்க்க முடியாது. இது போதாது, இன்னும் கொஞ்சம் சலுகைகளையும், மானியங்களையும் அறிவியுங்கள் என்று சொல்லித்தான் மக்கள் மனதை கவர முடியும் என்று அவர்களுக்கும் நிச்சயமாக தெரியும். ஆக, பட்ஜெட் எப்படி இருந்தாலும், அதை பயன்படுத்திக்கொள்ளும் லாவகம் அல்லது திறமை நமது பாராளுமன்ற உறுப்பினர்களிடம்தான் இருக்கிறது. ரெயில்வே பட்ஜெட்டைப் பொறுத்தமட்டில், சமீபத்தில்தான் பயணிகள் கட்டணத்தை உயர்த்தியிருக்கிறார்கள். ஆனால், சில நாட்களுக்கு முன் உயர்ந்துள்ள டீசல் விலை உயர்வால், ரூ.3 ஆயிரம்கோடி கையைக்கடிக்கிற நிலையில், ரெயில் கட்டணத்தை மேலும் உயர்த்தவேண்டியது அத்தியாவசியமான தேவை என்றாலும், தேர்தலை மனதில்வைத்து, அதைச் செய்வார்களா? என்பது சந்தேகத்துக்குரியதாகும். ஆனால், ரெயில்வே துறையின் வருமானத்தை உயர்த்தினால்தான், உள்கட்டமைப்பு வசதிகளை மேம்படுத்துவதற்கும், நவீனப்படுத்துவதற்கும் ரெயில்வே இலாகாவால் முடியும். இப்போதுள்ள சூழ்நிலையில், ஒவ்வொரு ரெயில் நிலையத்துக்கும் அருகேயுள்ள ரெயில்வேக்குச் சொந்தமான, ஆனால், எதற்கும் பயன்படுத்தப்படாமல் இருக்கும் நிலங்களை, பயன்பாட்டுக்குக் கொண்டுவரும் வகையில் ரெயில்வே நிர்வாகமே முயற்சிகளை மேற்கொண்டால் மட்டுமே ஓரளவு வருவாயைப் பெருக்க முடியும்.
-
சீனாவில், அதிவேக ரெயில்கள், அதாவது மணிக்குகுறைந்தது 360 கிலோ மீட்டர் வேகத்தில் செல்லும் புல்லட் ரெயில் போல, இன்றைக்கு இந்தியாவில் ரெயில்கள் விடப்படுமா? என்பது கனவாகத்தான் இருக்கிறது. ஆனால், பயணிகளுக்கு வசதிகளை இன்னும் மேம்படுத்தினால் அதுவே போதும். ஒவ்வொரு ரெயில்வே பட்ஜெட்டிலும் ஏராளமான திட்டங்கள் தமிழகத்துக்காக அறிவிக்கப்பட்டு, பல திட்டங்கள் நிறைவேற்றப்படாமல் இருக்கின்றன. பல திட்டங்களுக்கு போதிய நிதி உதவி அளிக்கப்படாமல் நத்தை வேகத்தில் ஊர்ந்து கொண்டிருக்கின்றன. இப்போது, ரெயில்வே பட்ஜெட்டில் எங்களுக்கு அந்த திட்டம் வேண்டும், இந்த திட்டம் வேண்டும், இந்த திட்டத்துக்கு கூடுதல் நிதி தாருங்கள் என்றெல்லாம் கேட்டுப்பெற முடியாது. ஏனெனில், பட்ஜெட் ஏற்கனவே தயாரிக்கப்பட்டு, இன்று தாக்கல் செய்யப்பட்டுவிடும். ஆனால், ரெயில்வே பட்ஜெட் மீதான விவாதத்தில், தமிழக எம்.பி.க்கள் அனைவரும் கட்சி வேறுபாடின்றி மிக உறுதியான குரலில், டிக்கெட் எடுத்தே பயணம் செய்து பழக்கப்பட்ட, அதிக வருமானத்தை ஈட்டித்தருகிறதென்னக ரெயில்வேக்கு, குறிப்பாக தமிழகத்துக்கு, நல்ல பல திட்டங்களை நிறைவேற்றி வைப்பதற்கான நல்லவாய்ப்பு இது. நழுவவிட்டுவிடாதீர்கள் என்றுதான் தமிழக மக்கள் ஒட்டுமொத்தமாக கூறுகிறார்கள். எங்களுக்குவசதிகளை பெருக்குங்கள் என்பதுதான் ரெயில் பயணிகளின் கோரிக்கை.
-
தினந்தந்தி