படித்ததில் பிடித்தது............

அணுகுண்டை மிஞ்சும் ஆயுதம்!

முதல் அணுகுண்டைத் தயாரிப்பதில் மும்முரமாக ஈடுபட்டுக் கொண்டிருந்தார் டாக்டர் ஓப்பன் ஹீமர்.

அவரிடம், "நீங்கள் இவ்வளவு பயங்கரமான ஆயுதத்தைக் கண்டுபிடிக்கிறீர்களே, இதை எதிர்த்து நிற்கக்கூடிய பாதுகாப்பான ஆயுதம் ஏதாவது இருக்கிறதா?' என்று அவரது நண்பர் ஒருவர் கேட்டார்.

"ஓ... இருக்கிறதே..!' என்றார் ஹீமர்.

"என்ன அது?' கேட்டார் நண்பர்.

"சமாதானம்தான்..!' என்றார் ஹீமர் சிரித்துக் கொண்டே.

-தேனி முருகேசன்

--------------------------------------

எளிமை!

பிரபல கம்யூனிஸ்ட் தலைவர் ஜீவானந்தம், எம்.எல்.ஏ. ஆக இருந்தபோதுகூட குடிசை வீட்டில் வாடகைக்குத்தான் வசித்து வந்தார்.

அவருடைய திருமணம் சென்னையில் கம்யூனிஸ்ட் கட்சி ஊழியர்கள் தங்கியிருந்த சிறிய விடுதி ஒன்றில்தான் நடந்தது.

திருமணத்துக்கு முப்பது பேர் மட்டுமே வந்திருந்தனர்.

திருமணத்துக்குத் தலைமை தாங்கியவர் கொடுத்த இரண்டு மாலைகளை ஒருவர் கழுத்தில் ஒருவர் அணிந்து கொண்டனர். அத்துடன் திருமணம் முடிந்தது.

பத்துப் பதினைந்து லட்டுகளை வாங்கி வந்து, தூளாக்கி ஆளுக்குக் கொஞ்சம் கொடுத்தார்கள். அனைவருக்கும் தேநீர் வழங்கப்பட்டது.

வாழ்த்துரைகளோ, நன்றியுரைகளோ நிகழ்த்தப்படவில்லை.

நாடறிந்த கம்யூனிஸ்ட் தலைவர் ஜீவாவின் திருமணம் நான்கைந்து நிமிடங்களிலேயே முடிந்து விட்டது.

இந்தத் திருமணத்துக்கு ஆன மொத்தச் செலவே வெறும் பத்து ரூபாய்தான் என்கிறார்கள்.

-மு.பெரியசாமி, விட்டுக்கட்டி.

-------------------------------------

வேதனையா சாதனையா?

ஒருசமயம் எழுத்தாளராக விரும்பி, எழுதித் தோற்றுப் போன இளைஞன் ஒருவன் புகழ்பெற்ற எழுத்தாளர் மார்க் ட்வெயினிடம் வந்தான்.

""நீங்கள் எப்போதாவது, இனிமேல் எழுதிப் பயனில்லை என்று எண்ணியதுண்டா?'' என்று கேட்டான்.

மார்க் ட்வெயின் தயக்கமின்றி, ""ஆமாம், நான் ஒருநாள் மிகவும் வேதனையோடு யோசித்தேன். பதினைந்து ஆண்டுகள் எழுதியும் ஒரு எழுத்தாளனுக்கு வேண்டிய திறமைகள் கொஞ்சம்கூட எனக்கு இயலாமல் போனது ஏன்....?'' என்று சொல்லிக் கொண்டிருக்கும்போது, இளைஞன் குறுக்கிட்டு,

""அப்படியே எழுதுவதை நிறுத்த எண்ணினீர்களா?'' என்று கேட்டான்.

""இல்லையில்லை... அந்த சிந்தனை வந்ததும் நான் சிறந்த எழுத்தாளனாக வேண்டிய திறமைகளை வளர்த்துக் கொண்டு திரும்பவும் எழுத வேண்டும் என்று உறுதி எடுத்தேன். அப்படியே செய்தேன். இப்போது நீயே பார்....'' என்று பதில் சொன்னார் மார்க் ட்வெயின்,

மேலும், ""தோல்வியின் உச்சகட்டம் வருகின்றபோதுதான் செயலில் தீவிரத்தன்மையும் ஏற்படும் என்பதை உணர்ந்து கொண்டேன்...'' என்றார் மார்க் ட்வெயின்.

-சி.இராஜேஸ்வரி, தூத்துக்குடி.

தினமணி

மூன்றுமே அருமை

நல்ல செய்திகள்