தோல் சதையை அகற்றி சிகிச்சை: அமிலக்காயம் உடலை அழித்து விடும்- அரசு டாக்டர் தகவல்

அமிலக்காயமும், தீக்காயமும் உடலை அழித்து விடும் என்று அரசு டாக்டர் விளக்கம் அளித்துள்ளார். அமிலம் வீச்சில் மாணவி வினோதினி பலியானது போல், வித்யாவும் இன்று பலியாகி இருக்கிறார். அவர்களது உயிரை காப்பாற்ற டாக்டர்கள் போராடினார்கள். கீழ்ப்பாக்கம் அரசு ஆஸ்பத்திரியில் தீக்காய சிகிச்சை பிரிவில் வித்யாவுடன் மேலும் பலர் தீக்காயத்துக்கு சிகிச்சை பெற்று வந்தனர். அவர்கள் ஒவ்வொருவராக இறந்ததைப் பார்த்து வித்யாவுக்கு 3 நாட்களுக்கு முன் மரண பயம் ஏற்பட்டதாகவும் இதனால் மனநலம் பாதிக்கப்பட்டு தாயைப் பார்த்து “ஆன்ட்டி” என்று கூப்பிடும் நிலைக்கு தள்ளப்பட்டதாகவும் உறவினர்கள் வேதனையுடன் தெரிவித்தனர்.

ஆசிட் வீச்சுக்கு பலியான இளம்பெண் வித்யாவுக்கு சிகிச்சை அளித்த கீழ்ப்பாக்கம் அரசு ஆஸ்பத்திரி தீக்காயத் துறை தலைவர் டாக்டர் ஜெகன்மோகன் கூறியதாவது:-

அமிலம் வீச்சால் பாதிக்கப்பட்ட வித்யா சிகிச்சைக்கு வரும் போது 34 சதவீதம் உடல் வெந்து போய் இருந்தது. இடுப்பு முதல் பாதம் வரை பாதிக்கப்பட்டு இருந்தது. அமிலத்தால் ஏற்படும் காயம் உடலில் மிக ஆழமாக பாதிக்கும். அதே போல் வித்யாவிற்கும் உடல் தோலையும் தாண்டி சதைப் பகுதியும் வெந்து விட்டது. அழுகிய சதை மற்றும் தோலை அகற்றினோம். உடனடியாக உடலின் வேறு பாகத்தில் இருந்து தோலை எடுத்து மூடும் நிலையில் இல்லை. எனவே காயத்திற்கு சிகிச்சை அளிப்பது உள்பட பல்வேறு தீவிர சிகிச்சைகள் அளிக்கப்பட்டு வந்தன.

தீக்காயம் பட்டு வருபவர்களை காயத்தின் தன்மையை பொறுத்து மிகத் தீவிர சிகிச்சை பிரிவில் அனுமதிக்கப்படுகிறார்கள். உடனடியாக உயிருக்கு ஆபத்து இல்லாதவர்களை ஆஸ்பத்திரிக்கு வந்த உடனேயே “ஐ.சி.யூ.” பிரிவில் சேர்ப்பது இல்லை. ஏனென்றால் அங்கு உயிருக்கு போராடும் மற்ற நோயாளிகளை பார்த்து இவர்களும் மன அழுத்தத்திற்கு உள்ளாகி விடுவார்கள்.

வித்யாவிற்கு ஆஸ்பத்திரியில் தண்ணீர் நிரப்பிய படுக்கை வசதி மற்றும் ரத்தம், பிளாஸ்மா உடலில் செலுத்தியது உள்ளிட்ட உயர் சிகிச்சைகள் அனைத்தும் கொடுக்கப்பட்டது. பொதுவக மிகப் பெரிய தீக்காயம் அடைந்தவர்களுக்கு நோய் தொற்று ஏற்படும். அதே போல் தான் வித்யாவிற்கும் தீவிர சிகிச்சையையும் மீறி ரத்தத்தில் தொற்று ஏற்பட்டது. கடந்த 10 நாட்களாக அவரை ஐ.சி.யூ. பிரிவில் வைத்து தீவிரமாக கண் காணித்து சிகிச்சை அளிக்கப்பட்டது. ஆனாலும் ரத்தத்தில் ஏற்பட்ட தொற்று காரணமாக உடல் உறுப்புகள் ஒவ்வொன்றாக செயல் இழக்க தொடங்கியது. இதனால் தான் வித்யா சிகிச்சை பலனின்றி இன்று உயிர் இழக்க நேரிட்டது.

இவ்வாறு அவர் கூறினார்.