நாளைய உலகம் : மருத்துவத் துறையில் உலகளவில் புதிதாக சில கண்டுபிடிப்புகள்

கீதா


மலேரியாவுக்கு மருந்து


மலேரியா நோயை விரைந்து குணப்படுத்தக் கூடிய புதிய மாத்திரையை கான்பூரில் உள்ள ஐ.ஐ.டி., ஆராய்ச்சியாளர்கள் கண்டுபிடித்து உள்ளார்கள். தற்போது நடைமுறையில் இருக்கும் மருந்துகளைவிட நேனோ தொழில்நுட்பத்தில் கண்டுபிடிக்கப்பட்ட இந்தப் புதிய மருந்து அதிக எதிர்ப்பு சக்தியை உடலுக்குத் தருவதோடு, ரத்த சிவப்பணுக்களில் மலேரியா ஒட்டுண்ணி ஏற்படுத்தும் பாதிப்பை விரைவாக குறைக்கும் வலிமையுடையது" என்கிறார், இந்த ஆராய்ச்சியை முன்னின்று நடத்தும் வேதியியல் துறையைச் சேர்ந்த சந்தீப் வர்மா. பொதுவாக நடைமுறையில் உள்ள மலேரியா மருந்து விநியோகிக்கப்படும்போது, 10 மி.கிராமில் 2 மி.கிராம் மட்டுமே பயன்பாட்டிற்கு வருகிறது. மற்றவை பலவிதங்களில் வீணாகி விடுவதால், வலிமையுடன் நோயைக் கட்டுப்படுத்த முடிவதில்லை. இதைத் தடுக்கும் விதமாக மிக நுண்ணிய அளவில் உள்ள இந்தப் புதிய மருந்து, கேப்ஸ்சியூல்லில் அடைக்கப்பட்டு பயன்பாட்டிற்கு வர உள்ளது.



மாதம் ஒரு இன்சுலின்


சர்க்கரை நோய்க்கு தரப்படும் இன்சுலின், செல் மூலக்கூறில் எப்படி செயல்படுகிறது என்ற ஆஸ்திரேலிய மருத்துவ ஆராய்ச்சியாளர்களின் கண்டுபிடிப்பு, சர்க்கரை நோய் சிகிச்சையில் புதிய நம்பிக்கையை தந்துள்ள நிலையில், டைப் 2 சர்க்கரை நோயாளிகள் தினமும் இன்சுலின் ஊசி போட்டுக்கொள்ளத் தேவை இல்லை. மாதம் ஒரு முறை போட்டுக்கொண்டால் போதும்" என்கிறார்கள், கனடாவில் உள்ள மவுண்ட் சினாய் மருத்துவ மையத்தின் ஆராய்ச்சியாளர்கள். கணையத்தில் உள்ள இன்சுலின் சுரக்கும் செயலிழந்த பீட்டா செல்கள் ஒரு முறை ஊசி மூலம் இன்சுலின் செலுத்தி தூண்டப்படும். இதைத் தொடர்ந்து 2, 3 வாரங்களுக்குள் தானாகவே இன்சுலினை சுரக்கச் செய்யும்" என்கிறார்கள், மருத்துவ ஆராய்ச்சியாளர்களான ரவி ரத்தனாகர் மற்றும் கரோலின் க்ரானர். ஆரம்ப நிலையிலேயே டைப் 2 சர்க்கரை நோய்க்கு சிகிச்சை செய்யும்போது, முடிந்த அளவு பீட்டா செல்களை அழியாமல் காப்பாற்ற முடியும் என்பதும் அவர்கள் தரும் நம்பிக்கை.



டிஜிட்டல் மூளை அட்லஸ்


சம கால அறிவியலால் முழுமையாக புரிந்துகொள்ள முடியாத சிக்கலான விஷயம் மனித மூளை. பெர்க்லே சோதனைக் கூடத்தில் (Berkeley lab) நடந்த ஆராய்ச்சியில், மூளையின் முன் பகுதி (cerebrum) எப்படி வேலை செய்கிறது, ஆட்டிசம், எபிலெப்சி, சிசோபிரீனியா (கற்றலில் குறைபாடு) போன்ற மூளை நரம்பியல் தொடர்பான கோளாறுகள் ஏற்பட, மூளையின் எந்தப் பகுதி காரணம் போன்றவற்றைக் கண்டறிந்து உள்ளார்கள். மிகப் பெரிய திருப்புமுனையாக கருதப்படும் இந்த ஆராய்ச்சி முடிவைத் தொடர்ந்து, மரபியல் மூலக்கூறினால் ஆன மூளையின் முன் பகுதி போலவே டிஜிட்டல் அட்லஸ் ஒன்றையும் உருவாக்கி உள்ளார்கள். இந்த டிஜிட்டல் அட்லஸ் உதவியுடன் எப்படி ஒரு தனி மரபணுவிலிருந்து மூளை உருவாகிறது,மரபியல் மாற்றங்களால் எப்படி நரம்பியல் கோளாறுகள் வருகின்றன என்பதை தொடர்ந்து ஆராய முடியும்" என்கிறார், அக்ஸ்சல் விசல் என்ற மருத்துவ ஆராய்ச்சியாளர்.