இந்த வினோதினியையும் கண்துடைப்பு கண்டனங்களோடு கடந்து செல்லப் போகிறோமா?

ஒவ்வொரு முறையும் யாராவது ஒரு பெண்ணுக்கு பாலியல் / உடலியல் ரீதியாகக் கொடுமை நேரும்போதெல்லாம் ‘இனியொரு முறை இப்படியொரு கொடுமை எந்தப் பெண்ணுக்கும் நேரக்கூடாது’ என்ற வரிகளோடு தலையங்கம் வெளியிடாத மீடியாவே கிடையாது.

ஆனால் அந்த கொடுமை நடந்த சில தினங்களில் நாம் அடுத்த விஷயத்துக்குப் போய்விடுகிறோம்… வினோதினிகள் மறக்கப்பட்டு, அரசியல் பரபரப்போ… ஏதேனும் கள்ளக்காதல் சமாச்சாரங்களோ கவனத்தை ஈர்த்துக் கொள்வது வழக்கம்.

இது ஒட்டுமொத்த சமூகத்தின் இன்றைய வழக்கமாகிவிட்டது. நமது வாழ்க்கை முறையின் தவறால் இந்த நிலைமைக்கு வந்துவிட்டோம்.

காதல் என்பது பொழுதுபோக்கின் ஆரம்பம் என்றாகிவிட்டது இன்றைக்கு. இந்த மலிவு நிலைக்கு முக்கிய காரணம் ஊடகங்கள்தான். குறிப்பாக, சினிமா.

சினிமா பார்த்துதான் காதலிக்கிறார்களா? என்று கேட்பவர்களுக்கு.. ஒருவிதத்தில் அது உண்மைதான்.

இங்கே நல்ல பேரை வாங்க வேண்டும் பிள்ளைகளே என்று பாடுவதை ரசிக்கும் மனநிலை இல்லை. எதிர்மறையான விஷயங்களை ரசிப்பதில் ஈர்ப்பு அதிகரித்துவிட்டது. இது சினிமா ஏற்படுத்திய நீண்ட கால தாக்கம்.

சினிமா பார்த்துவிட்டு, அதே போல 9 கொலைகளைச் செய்யத் திட்டமிட்டேன் என்று சொல்லும் இந்த சமூகத்தால், எம்ஜிஆரைப் பார்த்து குடிப்பதையே விட்டுவிட்டேன் என்று சொல்ல முடியவில்லை என்பது எத்தனை பெரிய வருத்தமான உண்மை.







எனவே எவற்றிலெல்லாம் மக்களின் நாட்டம் அதிகமாக உள்ளதோ… அவற்றில் எதிர்மறையான, குரூரமான, வக்கிரமான சிந்தனைகள் உருவாகக் காரணமானவற்றை முற்றாகத் தவிர்ப்பது இன்றைய அவசியமாகிறது.

குறிப்பாக, தொலைக்காட்சித் தொடர்கள், வக்கிரமான நிகழ்ச்சிகள் கொண்ட சேனல்களை நிரந்தரமாகப் பூட்டியே வையுங்கள். மெகா சீரியல் போதைக்கு அடிமையான பெண்கள் இப்போதாவது திருந்தித் தொலைப்பார்களா…

நல்ல பணத்தை கெட்ட பணம் விரட்டும் என ஒரு வழக்குச் சொல் உண்டு. அது சமூகத்துக்கும் கூட பொருந்தும்.

சாதியற்ற, அன்பால் நிறைந்த சமூகமாக மாற மிகப் பெரிய வழி என அண்ணல் அம்பேத்கரும், பெரியாரும் முன்மொழிந்தது காதலைத்தான். காதலின் மகத்துவத்தை வக்கிரமான வழிகளில், மொழிகளில் சொல்லும் போக்கு அதிகரித்துவிட்டதுதான் நிர்பயாக்கள், வினோதினிகளின் பரிதாப மரணத்துக்கு முக்கிய காரணங்கள்.

பெண்களை தெய்வமாக வணங்கும் ஒரு நாட்டில், பெண்ணை இத்தனை கீழ்த்தரமாக அவமதிக்கும் கொடுமையை இன்னும் எத்தனை காலத்துக்கு வெறும் கண்துடைப்பு கண்டனங்களோடு கடந்து செல்லப் போகிறோம்?

வீடு, பள்ளி, கல்லூரி, அலுவலகங்கள், பொது இடங்கள், சினிமா, முக்கியமாக தொலைக்காட்சி என அனைத்து மட்டங்களிலும் மூளைச் சுத்தம் செய்ய வேண்டிய கட்டாயம் வந்திருக்கிறது.

-வினோ