தமிழகமே தத்தளிக்கும்போது, தாரை வார்ப்பது நியாயமா?

by **krishnaamma** Sat Feb 16, 2013 9:02 pm

தமிழகம், பல மாதங்களாக இருளில் மூழ்கி தத்தளித்துக் கொண்டிருக்கிறது. சென்னையைத் தவிர, மற்ற மாவட்டங்கள், 12 மணி நேரம் மின்சாரம் இல்லாமல் தவித்துக் கொண்டிருக்கின்றன. மின்சாரம் இல்லாமல் நூற்றுக்கணக்கான தொழிற்சாலைகள் மூடப்பட்டு, லட்சக்கணக்கான மக்கள், வாழ்வாதாரத்தைத் தொலைத்துள்ளனர்.

நெறி கெட்ட போக்கு :

தமிழகத்தில் செயல்பட்டு வரும், மத்திய அரசின், நெய்வேலி பழுப்பு நிலக்கரி நிறுவனம், இங்கு ஈட்டிய பணத்தை வைத்து, உத்திர பிரதேசம், கான்பூர் அருகே, 2,000 மெகா வாட் உற்பத்தி திறன் கொண்ட, அனல் மின் நிலையத்தை அமைக்க இருக்கிறது. இந்த நிறுவனமும், உத்தர பிரதேச அரசும் இணைந்து, 15 ஆயிரம் கோடி ரூபாய் முதலீட்டில், இந்நிலையத்தைத் துவக்க இருக்கின்றன. கான்பூர் எம்.பி., தான், மத்திய நிலக்கரித் துறை அமைச்சர் ஸ்ரீ பிரகாஷ் ஜெய்ஸ்வால்.

அதே நேரத்தில், இரண்டு ஆண்டுக்கு முன் அறிவிக்கப்பட்ட, சீர்காழி அருகே, 1,800 மெகா வாட் திறன் கொண்ட, அனல் மின் நிலையத் திட்டத்தையும், 2,000 மெகா வாட் திறன் கொண்ட ஜெயங்கொண்டம் அனல் மின் திட்டத்தையும், நெய்வேலி நிறுவனம், கிடப்பில் போட்டு, உத்திர பிரதேச திட்டத்தில் முனைப்பு காட்டி வருகிறது.

பி.எச்.இ.எல்.,லின் பாரபட்சம் :

இதே போல், மத்திய அரசின், பி.எச்.இ.எல்., நிறுவனம், ஆந்திர பிரதேசத்திலும், கர்நாடகத்திலும், அனல் மின் நிலையங்களை அமைத்துள்ளது. ஆனால், ஏழு ஆண்டுகளுக்கு முன் அறிவிக்கப்பட்ட, 1,800 மெகா வாட் உற்பத்தி திறன் கொண்ட, உடன்குடி அனல் மின் நிலையத் திட்டத்தை கிடப்பில் போட்டுள்ளது. இவ்வளவுக்கும், பி.எச்.இ.எல்.,லின் மொத்த வருமானத்தில், 40 சதவீதம், திருவெறும்பூர் யூனிட்டிலிருந்து தான் கிடைக்கிறது. இந்தியாவில் உள்ள, அனைத்து அனல் மின்நிலையங்களுக்கும் தேவையான பாய்லர்களை, திருவெறும்பூர் பிரிவு தான் தயாரித்து வழங்குகிறது.

"வடக்கு வாழ்கிறது; தெற்கு தேய்கிறது' என, கோஷம் எழுப்பிய, தி.மு.க., தற்போது, மத்திய அரசில் இடம் பெற்றுள்ளது; ஆனால், தமிழக மின் பிரச்னையில், மவுனம் சாதித்து வருகிறது. ஜாதி, மத, அரசியல் வேறுபாடுகளை மறந்து, தமிழக மக்கள், வீதியில் இறங்கிப் போராடினால் தான் தீர்வு கிடைக்கும் என, சமூக நல விரும்பிகள் எதிர்பார்க்கின்றனர்.

நன்றி: தினமலர்