பழநியில் "சுரண்டல் டோக்கன்' ஒரு ரூபாய்க்கு ரூ.100 பரிசுங்க!

by **krishnaamma** Sat Feb 16, 2013 2:51 pm

பழநி : பழநியில் அரசு மற்றும் தனியார் பள்ளிகள் அருகே ஒரு கும்பல், "ஒரு ரூபாய்க்கு டோக்கன் வாங்கி சுரண்டினால், 100 ரூபாய் பரிசு' என விளம்பரப்படுத்தி, மாணவர்களை ஏமாற்றுகிறது.

பழநி பகுதியில் ஒரு கும்பல், சுரண்டல் லாட்டரி, டோக்கன், புதிய பரிசுத் திட்டங்கள் என்ற பெயரில், தொடர்ந்து பக்தர்கள், உள்ளூர்வாசிகளை ஏமாற்றி வருகிறது. இக்கும்பல் தற்போது, பள்ளிகளின் அருகில் மோசடி வேலையில் ஈடுபட்டுள்ளது. நடிகைகளின் படங்களில், 5, 10, 20, 50, 100 ரூபாய் நோட்டுகளின் படங்களை அச்சிட்டும், காசு போன்ற வட்ட வடிவிலான டோக்கன்களில் குறிப்பிட்ட எண்ணை அச்சிட்டும் விளம்பரப்படுத்துகின்றனர்.

மாணவர்கள் ஏமாற்றம் :

ஒரு ரூபாய் கொடுத்து டோக்கன் வாங்கி சுரண்டினால், அதில் உள்ள எண்ணுக்கு பரிசுத் தொகை வழங்கப்படுகிறது. எண் இல்லாமல் ஸ்டார் மட்டும் இருந்தால், பரிசு கிடையாது. பழநி - திண்டுக்கல் தேசிய நெடுஞ்சாலையில் உள்ள நகராட்சி மேல்நிலைப் பள்ளி அருகே, நேற்று இந்த சுரண்டல் டோக்கன் விற்பனை, அமோகமாக நடந்தது.

மாணவர்கள் ஆர்வத்துடன், சுரண்டல் டோக்கனை வாங்கி, பரிசு விழும் என்ற ஏக்கத்தில், பணத்தை இழந்து, ஏமாற்றத்துடன் பள்ளி சென்றனர். லாட்டரி விற்பனையை, தமிழக அரசு தடை செய்துள்ளது. ஆனால், இது போன்ற சுரண்டல் டோக்கன் (லாட்டரி) விற்பனையை தடை செய்யவில்லை.

பழநியில் மளிகை கடைகள், மக்கள் அதிகமாக கூடும் பஸ் ஸ்டாண்ட், பள்ளிகள் ஆகிய இடங்களில், தாராளமாக சுரண்டல் லாட்டரி விற்பனை நடக்கிறது. இதனால், அப்பாவி மக்கள், மாணவர்கள் பணத்தை இழந்து தவிக்கின்றனர்.