சென்னையில் கேபிள்,"டிஜிட்டல்' ஒளிபரப்பு துவக்கம் : களமிறங்கியது ஆபரேட்டர்கள் கூட்டுறவு சங்கம்

கூட்டுறவு முறையில், ஆபரேட்டர்களை இணைந்து துவங்கப்பட்ட, தமிழக கேபிள், "டிவி' கம்யூனிகேசன் நிறுவனம் மூலம், சென்னை மாநகரில் டிஜிட்டல் ஒளிபரப்பு இன்று துவக்கப்படுகிறது. இதற்காக, ஒரு லட்சம்"செட்-டாப் பாக்ஸ்'களை, வாடிக்கையாளர்களுக்கு, அந்நிறுவனம் வழங்கியுள்ளது.
-
சென்னை மாநகரில், 2012 நவ., 1ம் தேதி முதல் டிஜிட்டல் ஒளிபரப்பை செய்ய வேண்டும் என, மத்திய தகவல் மற்றும் ஒளிபரப்புத் துறை கெடு நிர்ணயித்தது. தமிழக அரசு கேபிள் நிறுவனம், எம்.எஸ்.ஓ., துவங்கி, டிஜிட்டல் உரிமம் கோரியது.அரசு அல்லது அரசு நிறுவனங்கள், கேபிள் தொழில் நடத்த அனுமதியில்லை என, தொலைத் தொடர்பு ஒழுங்குமுறை ஆணையம் பரிந்துரைத்தது.
-
இதனால், தமிழக அரசு கேபிள் நிறுவனத்துக்கு, டிஜிட்டல் உரிமம் வழங்குவதை, மத்திய அரசு நிறுத்தி வைத்துள்ளது. இதற்கிடையே, அரசு கேபிள் நிறுவனத்தில் இணைந்த ஆபரேட்டர்கள், தங்கள் இணைப்புகளைத் தக்க வைத்துக் கொள்வதற்காக, தனியாக எம்.எஸ்.ஓ., அமைத்து,டிஜிட்டல் உரிமம் பெற நடவடிக்கை எடுத்தனர். இதற்காக, சென்னை மாநகரைச் சேர்ந்த, 500 ஆபரேட்டர்கள்கூட்டுறவு முறையில் இணைந்து, தமிழக கேபிள்,"டிவி' கம்யூனிகேசன் நிறுவனத்தைத் (டி.சி.சி.எல்.,) துவங்கினர். இவர்கள், சேத்துபட்டு கிளப் சாலையில், எம்.எஸ்.ஓ.,அமைத்து, டிஜிட்டல் உரிமத்தையும் பெற்றுள்ளனர். ஏற்கனவே, தங்கள் வசமுள்ள வாடிக்கையாளர்களுக்கு செட்-டாப் பாக்ஸ் கொடுப்பதற்காக, 3.5 லட்சம் செட்-டாப் பாக்ஸ்களை, சீனாவிலிருந்து இறக்குமதிசெய்ய ஆர்டர் கொடுத்தனர்.
-
இதில், ஒரு லட்சம் செட்-டாப் பாக்ஸ்களை இறக்குமதி செய்து, வாடிக்கையாளர்களுக்கு வழங்கியுள்ளனர். சாதாரண செட்-டாப் பாக்ஸ் மற்றும் எச்.டி., செட்-டாப் பாக்ஸ் என, இரு வகையான செட்-டாப் பாக்ஸ்களை வழங்கியுள்ளனர்.தமிழ், ஆங்கிலம், விளையாட்டு, சினிமா, ஷாப்பிங் உள்ளிட்ட, பல்வேறு அம்சங்களை உள்ளடக்கியதாக, செட்-டாப் பாக்ஸ்களை வடிவமைத்துள்ளனர். மேலும்,ஒரு பகுதியிலிருந்து மற்றொரு பகுதிக்கு, குடிபெயரும் வாடிக்கையாளர்கள், புதிய பகுதியிலும் பயன்படுத்தும் வகையில், செட்-டாப் பாக்ஸ்கள் தயார் செய்யப்பட்டுள்ளன. டி.சி.சி.எல்., நிறுவனம் வழங்கியுள்ள, செட்-டாப் பாக்ஸ் மூலம், இன்று மாலை, 5:00 மணி முதல் ஒளிபரப்பை துவங்குகின்றனர்.
-
தமிழகத்தில், ஆபரேட்டர்கள் இணைந்து, எம்.எஸ்.ஓ., மூலம் மிகப் பெரியளவில், டிஜிட்டல் சேவையை துவங்குவது, இதுவே முதல்முறை. இதுகுறித்து, டி.சி.சி.எல்., நிறுவன தலைவர் சகிலன் கூறியதாவது:சென்னை மாநகரின் வடக்குப் பகுதியான எண்ணூரிலிருந்து, தெற்கு பகுதியான கிழக்கு கடற்கரைச் சாலை, மேற்கு பகுதிகளான அம்பத்தூர், ஆவடி வரையும், பல பகுதிகளில் சென்னை மாநகர எல்லையைத் தாண்டியும், கேபிள் இணைப்புகளை டிஜிட்டல் மயமாக்க, செட்-டாப் பாக்ஸ்களை அளித்துள்ளோம்.செட்-டாப் பாக்ஸ் ஆர்டர் கொடுத்த அளவுக்குக் கிடைக்கவில்லை.முதல்கட்டமாக கிடைத்த, ஒருலட்சம் பாக்ஸ்களை வழங்கியுள்ளோம். அடுத்த ஒரு மாதத்தில், மேலும், 2.5 லட்சம் செட்-டாப் பாக்ஸ்களை கொடுக்க உள்ளோம். ஆபரேட்டர்கள் இணைந்து கூட்டுறவு முறையில், எம்.எஸ்.ஓ., துவங்கியுள்ளதால், அனைவரும் உரிமையாளர்களாக உள்ளனர்.
-
லாபத்தில் பங்கும் அளிக்கப்படுகிறது.அரசு கேபிள் நிறுவனத்துக்கு, டிஜிட்டல் உரிமம் கிடைப்பதில் ஏற்படும் தாமதத்தால், வாடிக்கையாளர்களை இழக்கும் சூழல் ஏற்பட்டுள்ளது. இதனால், தொழிலை காப்பாற்றிக்கொள்ள, டி.சி.சி.எல்., என்ற நிறுவனத்தைத் துவக்கி, வியாழக்கிழமை மாலை முதல், டிஜிட்டல் ஒளிபரப்பை துவங்குகிறோம். இதற்கு, தமிழக அரசு முழு ஆதரவை அளிக்கும் என, எதிர்பார்க்கிறோம்.இவ்வாறு, சகிலன் கூறினார்.
-
தினமலர்