கன்னியாகுமரி பகவதி அம்மன் கோவில் மகாகும்பாபிஷேக விழா:கலசபூஜையுடன் 20–ந் தேதி தொடங்குகிறது

கன்னியாகுமரி பகவதி அம்மன் கோவில் மகாகும்பாபிஷேக விழா வருகிற 20–ந் தேதி கலசபூஜையுடன் தொடங்குகிறது.

15 ஆண்டுகளுக்கு பிறகு...

முக்கடலும் சங்கமிக்கும் கன்னியாகுமரியில் பிரசித்தி பெற்ற பகவதி அம்மன் கோவில் உள்ளது. இந்த கோவிலில் கடந்த 1998–ம் ஆண்டு மகாகும்பாபிஷேகம் நடைபெற்றது. அதைத் தொடர்ந்து 15 ஆண்டுகளுக்கு பிறகு வருகிற 27–ந் தேதி அஷ்டபந்தன மகாகும்பாபிஷேகம் நடைபெறுகிறது. இதையொட்டி ரூ.2 கோடி செலவில் கோவிலில் திருப்பணிகள் நடைபெற்று உள்ளன.

20–ந் தேதி தொடக்கம்

இதைதொடர்ந்து வருகிற 20–ந் தேதி கும்பாபிஷேக விழா தொடங்குகிறது. இந்த விழா அடுத்தமாதம் (மார்ச்) 2–ந் தேதி வரை 10 நாட்கள் நடைபெறுகிறது.

20–ந் தேதி அதிகாலை 4.30 மணிக்கு கணபதி ஹோமம், மாலை 6 மணிக்கு ராதாகிருஷ்ணனின் சிறப்பு நாதஸ்வரம், கணேசன் குழுவினரின் சிறப்பு தவுல் மங்கள இசை நிகழ்ச்சி ஆகியவை நடக்கிறது. மாலை 6.30 மணிக்கு ஆச்சார்ய வர்ணம், பசுதானம், வாஸ்து ஹோமம், கலசபூஜைகள், வாஸ்து கலசாபிஷேகம், அத்தாளபூஜை போன்றவை நடக்கிறது. தொடர்ந்து பல்வேறு சிறப்பு பூஜைகள் நடைபெறுகின்றன.

27–ந் தேதி மகாகும்பாபிஷேகம்

27–ந் தேதி அதிகாலை 5 மணிக்கு கணபதிஹோமம், கலசத்திற்கு உஷபூஜை, அஷ்டபந்த ஸ்தாபனம், 6 மணிக்கு வேத பாராயணம், 7 மணிக்கு முக்கூடல் வெங்கடேஷ் குழுவினரின் சிறப்பு நாதஸ்வர கச்சேரி ஆகியவை நடைபெறும். காலை 8.45 மணிக்கு மேல் 9.45 மணிக்குள் பகவதி அம்மன் மற்றும் பரிவார விமானங்களுக்கு அஷ்டபந்தன மகாகும்பாபிஷேகம் நடக்கிறது.

இந்த கும்பாபிஷேகத்தை தேவசம் தந்திரி மாத்தூர் மடத்தை சேர்ந்த சங்கர நாராயணரூ நடத்துகிறார். பின்னர் மங்கள ஆரத்தியும், உச்சபூஜை– தீபாராதனையும் நடைபெறும்.

அமைச்சர்கள்– மடாதிபதிகள்

விழாவில் தமிழக இந்து அறநிலையத்துறை அமைச்சர் ஆனந்தன், வனத்துறை அமைச்சர் பச்சைமால், திருவாவடுதுறை ஆதினம் அம்பலவாண தேசிக பரமாச்சாரிய சுவாமிகள், திருப்பனந்தாள் காசி மடத்தின் மடாதிபதி முத்துக்குமார சுவாமி தம்பிரான், பெருங்குளம் செங்கோல் ஆதினம் கல்யாண சுந்தர சத்யஞான தேசிக பண்டார சன்னதி, வெள்ளிமலை விவேகானந்த ஆசிரம தலைவர் சைதன்யானந்தஜி மகராஜ், குமரி மாவட்ட வள்ளலார் பேரவை தலைவர் சுவாமி பத்மேந்திரா, ஹெலன்டேவிட்சன் எம்.பி., செய்தி மற்றும் அறநிலையத்துறை செயலாளர் ராஜாராம், இந்துஅறநிலையத்துறை ஆணையர் தனபால், குமரி மாவட்ட கலெக்டர் நாகராஜன், போலீஸ் சூப்பிரண்டு மணிவண்ணன், இந்து அறநிலையத்துறை கூடுதல் ஆணையர்கள் ராஜா (பொது), இளங்கோ (விசாரணை), கவிதா (திருப்பணி), நெல்லை இணை ஆணையர் அன்புமணி, உதவி ஆணையர் கண்ணதாசன், துணை ஆணையர் பொன்சுவாமிநாதன், கன்னியாகுமரி பேரூராட்சி தலைவர் பிரபா வின்ஸ்டன் உள்பட பலர் கலந்து கொள்கிறார்கள்.

அன்னதானம்

காலை 10 மணிக்கு அன்னதானம் நடக்கிறது. கன்னியாகுமரி சங்கம் குரூப் ஓட்டல் உரிமையாளர் ஜி.மணி, சீஷோர் ஓட்டல் உரிமையாளர் எம்.கோபாலகிருஷ்ணன் ஆகியோர் அன்னதானம் வழங்குகிறார்கள்.

மாலை 6 மணிக்கு எஸ்.பி.சண்முகத்தின் ஆன்மிக உரையும், இரவு 7 மணிக்கு அங்குரபூஜை, பகவதி சேவை, லலிதாசகஸ்ரநாம ஜெபம், வேதஜெபம், அதிவாச ஹோமம், அத்தாளபூஜை போன்றவையும், இரவு 9 மணிக்கு அம்மன் வெள்ளிக்கலைமான் வாகனத்தில் வீதியுலா வருதலும் நடக்கிறது. அதைத் தொடர்ந்து முக்கடல் சங்கமத்தில் அம்மனுக்கு ஆராட்டும், கிழக்கு வாசல் வழியாக அம்மன் கோவிலுக்கு பிரவேசிக்கும் நிகழ்ச்சியும் நடைபெறும்.

கும்பாபிஷேக விழா ஏற்பாடுகளை குமரி மாவட்ட திருக்கோவில்களின் இணை ஆணையர் இரா.ஞானசேகர், நாகர்கோவில் தேவசம் தொகுதி கோவில்களின் கண்காணிப்பாளர் ஸ்ரீமூலவெங்கடேசன், கன்னியாகுமரி பகவதி அம்மன் கோவில் மேலாளர் சோணாச்சலம், உதவி கோட்ட பொறியாளர் சுப்பிரமணியன், மராமத்து பொறியாளர் இரா.ராஜ்குமார், கோவில் தலைமை கணக்காளர் ராஜேந்திரன் ஆகியோர் செய்து வருகிறார்கள்.

-தினத்தந்தி