சி.பி.ஐ., வக்கீல் - சஞ்சய் சந்திரா ரகசிய பேச்சு டேப் வெளியானது எப்படி? தெரியாது என்கிறார் சி.பி.ஐ., இயக்குநர்.

புதுடில்லி: 2ஜி வழக்கை எதிர்கொள்வது எப்படி என யுனிடெக் நிறுவன நிர்வாக இயக்குநர் சஞ்சய் சந்திராவுக்கு, சி.பி.ஐ., வக்கீல் ஏ.கே. சிங் வழங்கிய அறிவுரைகள் அடங்கிய டேப் எவ்வாறு வெளியானது என்பது தனக்கு தெரியாது என சி.பி.ஐ., இயக்குநர் ரஞ்சித் சின்கா தெரிவித்துள்ளார்.

நாட்டையே உலுக்கிய 2ஜி ஸ்பெக்ட்ரம் வழக்கு தற்போது மீண்டும் பரபரப்பான கட்டத்தை எட்டியுள்ளது. இவ்வழக்கு தொடர்பாக கைது செய்யப்பட்டு தற்போது ஜாமினில் உள்ள யுனிடெக் நிர்வாக இயக்குநர் சஞ்சய் சந்திராவிடம் ரகசிய பேச்சுவார்த்தை நடத்திய சி.பி.ஐ., வக்கீல் ஏ.கே. சிங், வழக்கை எவ்வாறு எதிர்கொள்வது என்பது குறித்து அவருக்கு டிப்ஸ் வழங்கியுள்ளார். கடந்த செப்டம்பர் மாதம் இந்த ரகசிய பேச்சு நடந்துள்ளது. இவர்கள் இருவருக்கிடையேயான ரகசிய பேச்சுக்கள் அடங்கிய டேப், சி.பி.ஐ., அதிகாரிகளுக்கு அனுப்பி வைக்கப்பட்டுள்ளது. இவற்றைப் பார்த்த அதிகாரிகள் அதிர்ச்சியடைந்துள்ளனர்.

ரஞ்சித் சின்கா மறுப்பு:


ரகசிய டேப் வெளியானது தொடர்பாக, 2ஜி ஸ்பெக்ட்ரம் வழக்கு தொடர்பாக விசாரணை நடத்தி வரும் பார்லி., குழு முன்பாக, சி.பி.ஐ., இயக்குநர் ரஞ்சித் சின்கா இன்று ஆஜராகி விளக்கமளித்தார். அதில் இந்த பேச்சை யார் பதிவு செய்தார்கள் என்றும், யார் இதை அனுப்பி வைத்தார்கள் என்பதும் தமக்கு தெரியாது என்று கூறியுள்ளார். மேலும், இந்த டேப் தடயவியல் சோதனைக்காக அனுப்பி வைக்கப்பட்டுள்ளதாகவும், இதில் உள்ள பேச்சுக்கள் உண்மை என தெரியவந்தாலும், இந்த வழக்கு தொடர்பாக சி.பி.ஐ., எந்த சமரசமும் செய்து கொள்ளாது என கூறியுள்ளார்.


ஜாமினை ரத்து செய்ய கோரிக்கை:


ஏ.கே. சிங் மற்றும் சஞ்சய் சந்திரா இடையேயான ரகசிய பேச்சுவார்த்தை அடங்கிய டேப் வெளியானது குறித்து கருத்து தெரிவித்த பிரபல வக்கீலும், சமூக ஆர்வலருமான பிரசாந்த் பூஷன், இந்த டேப் உண்மையாக இருக்கும் பட்சத்தில் சஞ்சய் சந்திராவுக்கு வழங்கப்பட்ட ஜாமினை ரத்து செய்து அவரை மீண்டும் கைது செய்ய வேண்டும் என கேட்டுக்கொண்டார்.

தினமலர்