போலீசுக்கு, "டிமிக்கி' கொடுத்தவரை பிடிக்க உதவிய, "பேஸ்புக்' இணையதளம்

மும்பை: அலுவலக பணம், இரண்டு லட்ச ரூபாயுடன் ஓடிய, தனியார் நிறுவன ஊழியரை, "பேஸ்புக்' இணையதளம் உதவியுடன், மும்பை போலீசார் பிடித்துள்ள, சுவாரசிய சம்பவம் நடந்துள்ளது.

குற்றவாளிகளையும், போலீசுக்கு, "டிமிக்கி' கொடுப்பவர்களையும் பிடிக்க, மொபைல் போன், "பேஸ்புக்' இணையதளம் போன்ற, தகவல் தொழில்நுட்ப அம்சங்கள், சமீப காலமாக, சிறப்பாக பயன்படுகின்றன

.தெற்கு மும்பையின், கல்பா தேவி பகுதியில், தனியார் எலக்ட்ரானிக் நிறுவனத்தில், விஜய் சவுத்ரி, 27, என்பவர் வேலை பார்த்து வந்தார். இரண்டு மாதங்களுக்கு முன், அவரிடம், 2.20 லட்ச ரூபாயை கொடுத்து, வங்கியில் செலுத்துமாறு, நிறுவன மேலாளர் ஒப்படைத்தார்.வங்கிக்கு சென்ற சவுத்ரி, அலுவலக பணத்தை, வங்கியில் செலுத்தாமல், பணத்துடன் ஓடிவிட்டார்

. அவரை காணாத நிர்வாகம், போலீசில் புகார் கொடுத்தது. சவுத்ரியை பிடிக்க, போலீசார், பல முறைகளையும் பின்பற்றினர்.எனினும், அவர், அந்த நடவடிக்கைகளில் இருந்து, சமயோஜிதமாக தப்பித்து வந்தார்.

இதனால், அந்த நபரை, "இணையதள வலை' விரித்து பிடிக்க, போலீசார் முடிவு செய்தனர்.அவர் நண்பர்கள் மூலம், சவுத்ரியின், "பேஸ்புக்' சமூக வலைதள முகவரியை அறிந்தனர். பெண் போல அந்த முகவரியை தொடர்பு கொண்ட போலீசார், சவுத்ரியுடன் இரண்டு மாதங்களாக பேசி, அவர் இருப்பிடம், போன் எண் போன்ற தகவல்களை பெற்றனர்.வசமாக அவரை பிடிக்க வேண்டும் என்பதற்காக, பெண் போல் தொடர்பு கொண்டு வந்த போலீசார், குறிப்பிட்ட இடத்திற்கு வருமாறு, கெஞ்சலுடன் அழைத்தனர்.

தன்னை, இரண்டு மாதங்களாக, இணையத்தில் தொடர்பு கொள்ளும் பெண் தான் அழைக்கிறார் என, நினைத்து, நேற்று முன்தினம் அந்த இடத்திற்கு சவுத்ரி வந்தார்.மறைந்திருந்த போலீசார், அந்த நபரை, கோழி அமுக்குவது போல அமுக்கினர். இரண்டு மாதங்களில், 2 லட்ச ரூபாயை, "காலி' செய்திருந்த அந்த நபரிடம், எஞ்சியிருந்த, 20 ஆயிரத்தை மட்டும் கைப்பற்றிய போலீசார், சவுத்ரியை கைது செய்து சிறையில் அடைத்தனர்.

தினமலர்

இணைய தளம் நல்லவற்றையும் செய்கிறது என்பதற்கு இது ஒரு ஆதாரம்.