அபத்தமாயில்லையா உனக்கு?

by **rameshnaga** Wed Feb 06, 2013 6:59 pm

உன்னுடைய வலிகளை எழுதுவதற்கான மொழி
என்னிடம் இல்லை.
உனது இனம், நாடு வேறாய் இருக்கையில்
உனது காயங்கள் எனக்கு வலிப்பதில்லை.
நீர் தர மறுத்து....ஒரு பயிரைப் போலவே வாடி
நீ உயிர் விடுதல் என்னைச் சலனப்படுத்துவதில்லை.
இருளில் மூழ்கி...ஆதி நாட்களுக்கு நீ திரும்பிய காலங்களில்
மின்சாரம் எனது புதைகுழியில் ஒளிந்திருந்தது.
நீயம் நானும் வேறு சாதிக்காரனாயிருக்கையில்
உனது திருமணம்...
நூறு கிராமங்களை ஒழித்துக்கட்டும் சாபமாயிருந்தது.
உனது அரசியலும்...எனது அரசியலும் வேறாய் இருந்தபோது...
ஊரெங்கும் முளைத்துக் கொண்டிருந்தன தியாகிக் கம்பங்கள்.
நீ பதவியிலிருக்கையில் என்னைச் சுரண்டுவதும்
நான் பதவியிலிருக்கையில் உன்னைச் சுரண்டுவதும்
எழுதப்படாத ஒப்பந்தங்களாய் இருந்தன.
உனது கடவுளும்...எனது கடவுளும் வேறாய் இருந்தபோது
இரண்டு கடவுள்களும்....சிறை வைக்கப் பட்டிருந்தன
நாம் விழாக் கொண்டாடுவதாய் சொன்ன காலங்களில்.
ஐந்தாண்டுகளுக்கு ஒரு முறை...
தேர்தல்நாளில் ஒரேநாளில் நானும் நீயும் முட்டாளாவதால் மட்டும்....

நீயும் நானும் ஒரே தேசம்...ஒரு தாய் மக்கள்
என்றெல்லாம் சொல்லிக் கொள்வது
அபத்தமாயில்லையா உனக்கு?