சேவைக் கட்டணம் இல்லாமல் வங்கிகளில் பணப் பரிமாற்றம்*ஏப்.,1 முதல் "சி.டி.எஸ்., செக்' அவசியம்..

மதுரை: சேவைக் கட்டணம் இல்லாமல், வங்கிகளில் பணப் பரிமாற்றம் செய்வதற்கு,ரிசர்வ் வங்கி நடைமுறையின் கீழ், அனைத்து வங்கி வாடிக்கையாளர்களும் மார்ச் 31க்குள், "சி.டி.எஸ்., (செக் டிரங்கேஷன் சிஸ்டம்) "செக்' பெற வேண்டும்."சி.டி.எஸ்.,' அறிமுகப்படுத்துவதற்கு முன்பாக, அந்தந்த மாவட்டங்களில் உள்ள முன்னோடி வங்கி செயல்பாட்டின் கீழ், "செக்'குகள் பரிவர்த்தனை மையம் செயல்பட்டு வந்தது. பல்வேறு வங்கிகளின், கிளைகளின் "செக்'குகள், இங்கு சேகரிக்கப்பட்டு, மின்காந்த முறையில் ஆய்வு செய்யப்பட்டு, அதற்கான பண வரவு, மாற்றப்படும்.

உதாரணமாக மதுரையில் ஒரு நபர், ஸ்டேட் வங்கியில் இருந்து கனரா வங்கிக்கு "செக்' அனுப்ப வேண்டுமெனில், அந்த வங்கிகளின் கிளையோ, அலுவலகமோ மதுரையில் இருக்க வேண்டும்.உதாரணமாக, மதுரையில் 46 வங்கிகளின், பல்வேறு கிளைகள் உள்ளன. இந்த 46 வங்கிகளின் கிளைகளுக்கான "செக்' பரிமாற்றம் மட்டுமே, மதுரையில் செய்ய முடியும். சில மாவட்டங்களில் வங்கிகள் எண்ணிக்கை குறைவாகவே இருக்கும். அதனால் "செக்' பரிமாற்றம் செய்வதற்கு, சென்னைக்கு அனுப்ப வேண்டும். பணம் பெறுவதற்கு ஒருவாரத்திற்கு மேலாகும்.

புதிய சி.டி.எஸ்., முறை மூலம், வங்கிகளில் புதிதாக அமைக்கப்படும் "ஸ்கேனர்' கருவி, "செக்'குகளை, உடனடியாக பதிவு செய்து, அந்த வங்கிகளின் தலைமை அலுவலகத்திற்கு அனுப்பும். அங்கிருந்து, ரிசர்வ் வங்கியின் மையத்திற்கு கம்ப்யூட்டர் மூலம் அனுப்பும். இந்த மையத்தில் பணப்பரிமாற்றம் முழுமையாக்கப்பட்டு, மறுபடியும் வங்கி தலைமை அலுவலகத்திற்கு அனுப்பப்படும். ஒரே நாளில் இந்த நடைமுறைகள் முடிந்து விடும்.

என்ன பயன்கள்:

இந்த முறையில், "செக்'குகள் எங்கும் எடுத்துச் செல்லப்படுவதில்லை. இதனால் வாடிக்கையாளர்களிடம் இதுவரை பெறப்பட்ட வெளிமாவட்ட, மாநில "செக்'குகளுக்கான, சேவைக் கட்டணம் இனிமேல் கிடையாது. வாடிக்கையாளரின் "செக்'குகளை, சில வங்கி ஊழியர்கள் தவறாக பெயர் மாற்றம் பயன்படுத்தும் மோசடியும், இனிமேல் செய்ய முடியாது. ஏனெனில் வங்கிக் கணக்கு எண், "செக்' எண், வங்கி சார்ந்த குறியீடு, தேதி, கையெழுத்திட வேண்டிய இடம் அனைத்துமே, ரிசர்வ் வங்கி பரிந்துரைப்படி "செக்'கில் மாற்றப்பட்டுள்ளது.

தமிழகம், புதுச்சேரி முழுதும் இத்திட்டம் செயல்படுத்தப்படுகிறது. "செக்' தேதியில் அடித்தல், திருத்தல் இருந்தால் மட்டும், அனுமதிக்கப்படும். பெயரில் அடித்தல், திருத்தல் இருந்தால் புதிய "செக்' தான் எழுத வேண்டும். இதை கலர் பிரதி எடுத்து, போலி "செக்' ஆக மாற்ற முடியாது. நகல் எடுக்கும் போது, பாதுகாப்பு குறித்த தகவல்கள் பதிவாகும். எனவே, ஏமாற்ற முடியாது.இது தொழிற்துறையில் உள்ளவர்களுக்கு மிகப்பெரிய வரப்பிரசாதம்.

வங்கியில் கட்டாயம் பணம் இருந்தால் மட்டுமே "செக்' தரவேண்டும். இல்லாவிட்டால், உடனடியாக திரும்பி விடும். வங்கியில் மேலாளரிடம் கூறி, "செக்'கை நிறுத்த முடியாது.வாடிக்கையாளர்கள் தங்களிடம் உள்ள பழைய "செக்'குகளை வங்கியில் கொடுத்து, "சி.டி.எஸ்.,' எழுதப்பட்ட "செக்'குகளை, மார்ச் 31க்குள் வாங்க வேண்டும்..

தினமலர்

நல்ல தகவல் அனைவருக்கும் பயன்படும் இந்த சேவை நல்ல மற்றும் பாதுகாப்பான சேவையும் கூட