இரவு அணிந்த நிறம்

by **rameshnaga** Tue 5 Feb 2013 - 20:13

First topic message reminder :

உன்னை
எழுதுவதற்கான வரிகள்
ஒரு பெருமழையென
விளைந்துகொண்டிருக்கிறது எனக்குள்.

உனது வருகையில்...
என் இரவு அணிந்துகொள்ளும் நிறம்
அழகானது ஒரு வானவில்லை விட.

ஈரம் நிறைந்த
என் அன்பின் வார்த்தைகள்....
இளஞ்சூட்டில் சிலிர்க்கும் குழந்தையெனத்
துள்ளித் திரிகிறது என் அறையெங்கும்.

படுக்கையிலிருந்தபடி....
கால்முளைத்து
உன் கை கோர்த்து நடக்கிறேன் நான்.

எல்லாத் தவறுகளும்
எனக்கு மட்டும் புனிதமாகும் இந்தக் கணங்களில்...
விருப்பத்துடன் வெளியேறுகிறேன்
எனக்கான சுய எல்லைகளிலிருந்து.

உதிர்ந்து.....
என்னை உதிர்க்கும் காலத்தின்
புன்னகையை இரசித்தபடி....
வைகறையின் வரவில்
நானாகத் தொடங்குவேன் நான்

புல்லின் நுனியில்
பனித்துளிகளாய் இருக்கும்
என் கனவின் களைப்பை இரசித்தபடி.