இரவு அணிந்த நிறம்

by **rameshnaga** Tue Feb 05, 2013 6:43 pm

உன்னை
எழுதுவதற்கான வரிகள்
ஒரு பெருமழையென
விளைந்துகொண்டிருக்கிறது எனக்குள்.

உனது வருகையில்...
என் இரவு அணிந்துகொள்ளும் நிறம்
அழகானது ஒரு வானவில்லை விட.

ஈரம் நிறைந்த
என் அன்பின் வார்த்தைகள்....
இளஞ்சூட்டில் சிலிர்க்கும் குழந்தையெனத்
துள்ளித் திரிகிறது என் அறையெங்கும்.

படுக்கையிலிருந்தபடி....
கால்முளைத்து
உன் கை கோர்த்து நடக்கிறேன் நான்.

எல்லாத் தவறுகளும்
எனக்கு மட்டும் புனிதமாகும் இந்தக் கணங்களில்...
விருப்பத்துடன் வெளியேறுகிறேன்
எனக்கான சுய எல்லைகளிலிருந்து.

உதிர்ந்து.....
என்னை உதிர்க்கும் காலத்தின்
புன்னகையை இரசித்தபடி....
வைகறையின் வரவில்
நானாகத் தொடங்குவேன் நான்

புல்லின் நுனியில்
பனித்துளிகளாய் இருக்கும்
என் கனவின் களைப்பை இரசித்தபடி.

by **அருண்** Tue Feb 05, 2013 6:49 pm

நீண்ட நாட்களுக்கு பிறகு உங்கள் கவிதையை ரசிக்க முடிந்தது அய்யா.! சூப்பருங்க

தலைப்பு தமிழில் வரவில்லை அய்யா.!

by **ராஜா** Tue Feb 05, 2013 6:50 pm

என்னண்ணே நீண்ட நாட்களாக காணவில்லை, கவிதை வழக்கம் போல அருமை நன்றி

by **rameshnaga** Tue Feb 05, 2013 7:01 pm

ரொம்பவும் நன்றி! அருண்....ராஜா....

தலைப்பு மட்டும் தமிழிற்கு மாறவில்லை. கட் பண்ணி பேஸ்ட் செய்தாலும் சரியாகவரவில்லை. உங்களால் இயலுமானால் தமிழிற்கு மாற்றித் தாருங்களேன்.
நன்றிகளுடன்....இரமேஷ்.