உழவனுக்கோர் ஒப்பாரி

ச. சந்திரசேகரன் · 16/09/2012

உழவனுக்கோர் ஒப்பாரி

வாடிய பயிரைக் கண்டதனால்
வானுலகம் நீ சென்றாயோ?
நாடிய உம் மக்களையே
நட்டாற்றில் விட்டுச் சென்றாயோ?
கூடிய மட்டும் பார்த்தாயோ
கூட்டை விட்டுப் பறந்தாயோ?
ஆடிய ஆட்டம் போதுமென
ஆண்டவன் நோக்கிச் சென்றாயோ?

ஊருக்கே நீ உணவளித்தாய்
உண்பதைக் கண்டு உளமகிழ்ந்தாய்
பாருக்கே நீ பசியாற்ற
பார்த்துப் பார்த்து பயிர்வளர்த்தாய்
யாருக்கும் நீ தெரியாமல்
யமனைக் காண விரைந்தாயோ?
சோறுக்கே நீ வழியின்றி
சொர்க்கம் நோக்கிச் சென்றாயோ?

வங்கித் தவணை செலுத்திடவே
வருவாய் வந்த பாடில்லை
ஏங்கித் தவிக்கும் ஏழைக்கு
ஏற்றம் வந்த பாடில்லை
தந்து வட்டிக் காரனுக்கோ
தந்ததை தளர்த்த மனமில்லை
நொந்து போன மனநிலையில்
நொடியில் பயணம் சென்றாயோ?

உந்தன் பின்னால் உறவுண்டு
உழவா அதைநீ மறந்ததென்ன?
பந்த பாசம் மறந்துவிட்டு
பர லோகம்நீ சென்றதென்ன?
உந்தன் உறவாய் வந்தவளை
உதறி விட்டுச் சென்றதென்ன?
சந்த திகளைத் தவிக்கவிட்டு
சொர்க்கம் நீயும் சென்றதென்ன?

காவிரி மன்றத் தீர்ப்பதனை
கன்னடர் ஏற்று நடப்பாரோ?
ஆவி பிரிந்த வேதனையை
ஆட்சியர் உணர்ந்து நடப்பாரோ?
பாவப்பட்ட உழவனுக்கு
பயிர்க்கடன் தந்து மகிழ்வாரோ?
நாவலர் நடுவர் சேர்ந்திங்கு
நதிநீர் இணைப்பு நல்குவரோ?
ச.சந்திரசேகரன்

**T.N.Balasubramanian** · **T.N.Balasubramanian** Thu Jan 05, 2017 8:05 am

வங்கித் தவணை செலுத்திடவே
வருவாய் வந்த பாடில்லை
ஏங்கித் தவிக்கும் ஏழைக்கு
ஏற்றம் வந்த பாடில்லை
தந்து வட்டிக் காரனுக்கோ
தந்ததை தளர்த்த மனமில்லை
நொந்து போன மனநிலையில்
நொடியில் பயணம் சென்றாயோ?

அருமை சந்திரசேகரன் அன்பு மலர்

ரமணியன்

ச. சந்திரசேகரன் · 16/09/2012

T.N.Balasubramanian wrote:
வங்கித் தவணை செலுத்திடவே
வருவாய் வந்த பாடில்லை
ஏங்கித் தவிக்கும் ஏழைக்கு
ஏற்றம் வந்த பாடில்லை
தந்து வட்டிக் காரனுக்கோ
தந்ததை தளர்த்த மனமில்லை
நொந்து போன மனநிலையில்
நொடியில் பயணம் சென்றாயோ?

அருமை சந்திரசேகரன்

ரமணியன்

மேற்கோள் செய்த பதிவு: 1230598 உழவனுக்கோர் ஒப்பாரி 1571444738