நீலகேசி

குண்டலகேசி எனும் பவுத்த காப்பியத்திற்கு எதிராக எழுதப்பட்ட சமணநூல் இது. இதன் ஆசிரியர் யார் என்பது தெரியவில்லை. இந்த நூல் பத்துச் சருக்கங்களாய் (பகுதி) 894 பாடல்களைக் கொண்டது. இதில் வரும் நீலி எனும் பெண் சமண முனிவரின் மாணவி ஆகிறாள். அவள் குண்டலகேசியை எதிர்த்து வாதிட்டுத் தோல்வியுறச் செய்கிறாள். நூல் முழுவதும் பவுத்தம் மற்றும் பிற சமய எதிர்ப்பும், சமண சமயப் போற்றுதலுமாகவே அமைந்துள்ள இந்த நூலில் இலக்கியச் சிறப்பு குறைவு.

சூளாமணி

இந்த காப்பியத்தை இயற்றியவர் தோலா மொழித்தேவர். சீவக சிந்தாமணிக்கு அடுத்ததாக இந்த சமணக் காப்பியம் போற்றப்பட்டது. இந்த நூல் பத்தாம் நற்றாண்டின் பிற்பகுதியில் தோன்றியது என்பர். இது பன்னிரண்டு காண்டங்களால் 2,230 விருத்தப்பாக்களைக் கொண்டுள்ளது. வடமொழிச் சமண நூலில் உள்ள தவிட்டன், விசயன் என்பவரின் கதையை விளக்கும் காப்பியம் இது. இந்த நூலின் முடிவில் துறவு, முத்தி பற்றி பேசப்படுகின்றன.

உதயணகுமார காவியம்

இந்த நூல் உதயணன் கதை என்றும் வழங்கப்படுகிறது. வங்க தேசத்து அரசன் உதயணன் கதையினை விருத்தப்பாவில் கூறுகிறது. ஆறு காண்டங்களும், 367 செய்யுள்களும் இந்த நூலில் உள்ளன. இந்த நூல் காப்பிய அமைதி உடையதன்று என நூலாய்வாளர்கள் கூறுவர்.

யசோதர காவியம்

330 விருத்தப்பாக்கள் கொண்ட இந்த நூல் ஒரு சமண நூலாகும். உயிர்க் கொலைக் கூடாது என்னும் கருத்து இதில் வலியுறுத்தப்படுகிறது. ஆசிரியர் பெயர் தெரியவில்லை.

நாக குமார காவியம்

இது மற்றொரு சமண நூல். ஆசிரியர் பெயர் தெரியவில்லை. நாக குமாரன் வரலாற்றை ஐந்து சருக்கங்களில், 180 விருத்தங்களால் பாடிய நூல் இது.

தமிழ் இலக்கியங்களை பெருங்காப்பியங்கள் என்றும், சிறுகாப்பியங்கள் என்றும் பிற்கால அறிஞர்கள் ஏற்பாடு செய்தனர். இப்பாகுபாட்டிற்கு தக்க காரணங்கள் இல்லை. அறிஞர்கள் வகைப்பாட்டின்படி மேற்காணும் நூல்கள் ஐஞ்சிறுங்காப்பியங்களாக பகுக்கப்பட்டுள்ளன. இவை அனைத்துமே சமண நூல்களாகும்.

ஐஞ்சிறு காப்பியங்கள் பற்றி அறிஞர்கள் பலர், ஆய்வு செய்துள்ளனர். சிந்தாமணியை ஒத்த இடம் பெறத் தகுதியான சூளாமணியைச் சிறுகாப்பியம் என்று அமைத்தது பொருத்தமல்ல. சமயவாதம் மிகுந்த குண்டலகேசியைப் பெருங்காப்பியத்துள் சேர்த்ததும் பொருத்தமாகத் தோன்றவில்லை. பிற்காலத்து அறிஞர் எவரோ செய்த இந்தப் பாகுபாடு புறக்கணிக்கத் தக்கதே என்று கருத்துரைக்கிறார் மு.வரதராசனார்.

தகவலுக்கு நன்றி அண்ணா

தகவலுக்கு நன்றி அண்ணா