அரச விருந்தினராக வரவேண்டுமென ரஜினிக்கு அமெரிக்கா அழைப்பு

ஹர்ஷித் · ஹர்ஷித் Wed Jan 30, 2013 11:01 pm

நடிகர் ரஜினிகாந்த் அரச விருந்தினராக அமெரிக்கா வர வேண்டுமென்று அந்நாட்டின் மேரிலான்ட் மாகாண அரசு அழைப்பு விடுத்துள்ளது.
மேரிலான்ட் மாகாணத்தின் வெளியுறவுத் துறை துணைச் செயலர் அமைச்சர் டாக்டர் ராஜன் நடராஜன் இந்த அழைப்பினை ரஜினியை அவரது இல்லத்தில் சந்தித்து வழங்கினார்.
அத்துடன் மேரிலான்ட் மாகாண கவர்னர் மார்ட்டின் ஓமாலி, ரஜினிக்கு பிறந்த நாள் வாழ்த்துச் செய்தி ஒன்றையும் அனுப்பியுள்ளார்.

அதில் ஓமாலி கூறியிருப்பதாவது; சூப்பர் ஸ்டார் ரஜினிகாந்த் நீங்கள் இந்திய சினிமாவில் சூப்பர் ஸ்டாராக நீண்ட காலம் வெற்றிகரமாகத் திகழ்வது மகிழ்ச்சியை அளிக்கிறது. அதற்கு எங்களது வாழ்த்துகளைத் தெரிவித்துக் கொள்கின்றோம்.

மேலும் இந்தத் துறையில் பல சாதனையைச் செய்து அளவிலா புகழை அடைந்துள்ளீர்கள் என்பதில் மகிழ்ச்சி. உலகமெல்லாம் பரவி இருக்கும் உங்கள் பல கோடி ரசிகர்களின் ஆதரவுடன் மேலும் வெற்றி பெற எங்கள் மேரிலான்ட் மாகாண அரசாங்கம் வாழ்த்துகிறது என்று குறிப்பிட்டுள்ளார்.

சுமார் அரை மணி நேரம் நடந்த இந்த சந்திப்பின்போது அமெரிக்க வாழ் தமிழர்கள் குறித்து ராஜனிடம் ரஜினி கேட்டறிந்தார். மேரிலான்ட் அரசின் பிரதிநிதி டாக்டர் ராஜனின் வாழ்த்தையும் அழைப்பையும் ஏற்ற ரஜினி அமெரிக்காவுக்கு வருவதாக அப்போது உறுதியளித்துள்ளார்.
நன்றி:http://www.thinakkural.com