புதுடில்லி: மத்திய அரசின் புதிய விதிமுறைகளால், நுகர்பொருட்களின் "பேக்கிங்' வடிவம் மாறுவதுடன், இவற்றின் விலையும் உயரும் என, எதிர்பார்க்கப்படுகிறது. அதேசமயம், இது நுகர்வோருக்கு பயன் அளிப்பதாக இருக்குமென, ஆய்வாளர்கள் தெரிவித்துள்ளனர்.

விற்பனைமத்திய அரசின் புதிய சட்டத்தின்படி, நுகர்பொருள் நிறுவனங்கள், 19 வகையான உணவுப் பொருட்களை, தற்போதுள்ள அளவுகளில் இனி விற்பனை செய்ய முடியாது.அதாவது, 65 கிராம், 73 கிராம், 85 கிராம், 92 கிராம், 175 கிராம், 425 கிராம் அல்லது மி.லி., அளவுகளில், உணவுப் பொருட்களை பாக்கெட்டுகளில் அடைத்து விற்கக்கூடாது.

அதற்கு பதிலாக, 25 கிராம், 50 கிராம், 100 கிராம் மற்றும் அதற்கு மேல், 100 கிராம் அல்லது மி.லி., என்ற மடங்குகளில் மட்டுமே விற்பனை செய்ய வேண்டும்.மேற்கண்ட, ஒரே சீரான அளவுகளில் மட்டுமே உணவுப் பொருட்களை விற்பனை செய்யும் நடைமுறை, கடந்த 2012ம் ஆண்டு, நவம்பரில் அமலுக்கு வந்தது

இதன்படி, நுகர்பொருள் வர்த்தகத்தில் ஈடுபட்டு வரும் நிறுவனங்கள், விருப்பம் போல், பல்வேறு அளவுகளில், உணவுப் பொருட்களை அடைத்து விற்க முடியாது. மத்திய அரசு, நிர்ணயித்துள்ள அளவுகளில் மட்டுமே, உணவுப் பொருட்களை விற்பனை செய்ய வேண்டும்.பல்வேறு நிறுவனங்கள், பிஸ்கட் உள்ளிட்ட உணவுப் பொருட்களின் விலையைக் குறைத்து, அதே சமயம், அவற்றின் எடையை குறைத்து விற்பனை செய்து வருகின்றன.வெளிப்புறத்தில் பெரிய "பாக்கெட்' போன்று தோற்றமளித்தாலும், அதன் உள்ளே குறைவான உணவுப் பொருட்களே உள்ளன.

மத்திய அரசின் புதிய விதிமுறைகளால், நுகர்வோரை ஏமாற்றும் இத்தகைய செயல்பாடுகள் முடிவிற்கு வந்துள்ளது.நுகர்பொருள் துறையில் உள்ள அனைத்து நிறுவனங்களும், ஒரே சீரான அளவுகளில், அதற்கேற்ற வடிவத்தில் உணவுப் பொருட்களை விற்பனை செய்வதற்கான சூழல் உண்டாகியுள்ளது.

இது, நுகர்வோருக்கு, உணவுப் பொருட்களின் அளவு குறித்து ஏற்படும் குழப்பத்தையும் குறைக்கும்.இத்தகைய மாற்றத்தையொட்டி, உணவுப் பொருட்களின் விலையை நிறுவனங்கள் உயர்த்த திட்டமிட்டுள்ளன. எனினும், சந்தையில், ஆரோக்கியமான போட்டி உருவாகும் என்பதால், அது நுகர்வோருக்கே சாதகமாக இருக்கும் என, எதிர்பார்க்கப்படுகிறது.

விலையில் மாற்றம்மத்திய அரசின் புதிய விதிமுறையை அமல்படுத்தும் வகையில், பார்லே புராடெக்ட்ஸ், ஐ.டி.சி., புட்ஸ், பிரிட்டானியா இண்டஸ்ட்ரீஸ் போன்ற நிறுவனங்கள் ஏற்கனவே, அவற்றின் உணவுப் பொருட்களின் "பேக்கிங்' வடிவத்தை மாற்றும் பணியில் ஈடுபட்டுள்ளன. அதே சமயம், உணவுப் பொருட்களின் விலையிலும் மாற்றம் செய்துள்ளன.

பார்லே பிஸ்கட்டுகளை தயாரிக்கும் பார்லே-ஜி நிறுவனம், "ஹைடு அண்டு சீக்' உள்ளிட்ட அதன் பிரிமியம் பிராண்டுகளின் "பேக்கேஜ்'-ஐ அடியோடு மாற்றியுள்ளது.புதிய விதிமுறைகளின்படி, தற்போது, இந்நிறுவனம், 25 கிராம் மற்றும் 50 கிராம் பிஸ்கட் பாக்கெட்டுகளை, முறையே 2 ரூபாய் மற்றும் 4 ரூபாய் என்ற விலையில் விற்பனைக்கு விட்டுள்ளது.முன்னர், இந்நிறுவனம், 66.7 கிராம் கொண்ட பிஸ்கட் பாக்கெட்டை, 5 ரூபாய்க்கு விற்பனை செய்து வந்தது.

அது போன்று, ஐ.டி.சி., புட்ஸ் நிறுவனம், அதன் "சன் பீஸ்ட்' உள்ளிட்ட பிராண்டுகளின் கீழ் தயாரிக்கும் பிஸ்கட்டுகளின் பேக்கிங் வடிவமைப்பை மாற்றியமைத்துள்ளது.தேயிலைபிரிட்டானியா இண்டஸ்ட்ரீஸ் நிறுவனம், அதன் பிஸ்கட், ரொட்டி, ரஸ்க் மற்றும் பால் பொருட்களின் பேக்கிங்கை மாற்றியமைத்துள்ளது.

பெப்சிகோ இந்தியா நிறுவனம், அதன் நொறுக்குத் தீனி வகைகளை, புதிய நெறிமுறைக்கேற்ப தயாரிக்கப்பட்ட பேக்கில் அடைத்து விற்பனை செய்து வருகிறது. கோல்கட்டாவை சேர்ந்த டன்கன் டீ நிறுவனம், அதன் 50 கிராம் தேயிலை "பேக்கிங்'-ஐ சீரமைத்துள்ளது.

தினமலர்

பகிர்தலுக்கு நன்றி.மக்களுக்கு நன்மை நடந்தால் சரி