ஒரு கோயில் வைரம் ஏற்படுத்திய கோர விளைவுகள்!

by **சிவா** Wed Jan 23, 2013 4:24 pm

https://i.servimg.com/u/f12/13/02/10/42/hop10.jpg

வாஷிங்டனில் உள்ள ஸ்மித்சோனியன் கழகத்தில் ஹோப் என்ற வைரம் உள்ளது. அந்த வைரம் ஏற்படுத்திய கோர விளைவுகள் ஒரு நீண்ட கதை.

500 ஆண்டுகளுக்கு முன்பு இந்தியாவில் ஒரு கோவில் சிலையில் நெற்றியில் திலகமாகத் திகழ்ந்த அதை ஒரு பூசாரி திருடி அகப்பட்டுக் கொண்டு மரண தண்டனை பெற்றார்.

அது ஒரு பிரெஞ்சு கடத்தல்காரன் கையில் எப்படியோ சிக்கி 1642 ல் ஐரோப்பாவுக்கு வந்தது. அவன் அதை நல்ல விலைக்கு விற்று தனக்கு ஒரு வீடு வாங்கிக் கொண்டான். அவனுடைய மகன் சூதாடி, சொத்தைத் தொலைத்துவிட்டான்.

கடத்தல்காரன் மீண்டும் இந்தியா வந்தான். இங்கு வெறி நாயால் கடிபட்டு இறந்தான்.

வைரம் 12 ம் லூயியிடம் வந்து சேர்ந்தது. அவன், 112 கேரட்டாக இருந்த அதை 67 கேரட்டாக பட்டை தீட்டினான். போரில் பல தோல்விகளைக் கண்டு மனமுடைந்து இறந்தான்.

அந்த வைரத்தை அணிந்த 16 ம் லூயியும், அவன் மனைவி மேரி அண்டனாய்ட்டும் புரட்சிக்காரர்களால் கொல்லப்பட்டனர்.

அடுத்த 40 வருடங்களுக்கு ஹோப் வைரம் இருந்த இடம் தெரியவில்லை. பிறகு அதை வைத்திருந்த பிரெஞ்சு நகை வியாபாரி ஒருவர் பைத்தியம் பிடித்துத்தற்கொலை செய்து கொண்டார்.

பின் அதற்கு உரிமைமயாளர் ஆன ரஷ்ய இளவரசர் கொலை செய்யப்பட்டார்.

பிறகு அந்த வைரம் ஒரு டச்சு வைரம் பட்டை தீட்டுபவரிடம் வந்து சேர்ந்தது. அதை அவர் 44 கேரட்டாக தீட்டினார். அதைத் தன் மகன் திருடிவிட்டதை அறிந்து தற்கொலை செய்துகொண்டார்.

பலர் கை மாறி தாமஸ் ஹோப் என்ற ஐரீஷ்காரரிடம் அந்த வைரம் வந்தது. அவர் அதை 30 ஆயிரம் பவுனுக்கு மிகவும் மலிவாக வாங்கினார். அவருடைய மகன் காலத்தில் பெருஞ்சொத்து முழுவதும் கரைந்து விட்டது.

1908 ல் துருக்கி சுல்தான் 4 லட்சம் பவுனுக்கு ஹோப் வைரத்தை வாங்கினார். அடுத்த ஆண்டு பதவி இழந்தார்.

மீண்டும் வைரம் அமெரிக்கா வந்து சேர்ந்தது. மெக்லின் என்பவர் 1911 ல் வாங்கினார். அவர் மகன் கார் விபத்தில் இறந்தான். அவர் தனது சொத்தையெல்லாம் இழந்து, மனநல மருத்துவமனையில் இறந்தார். மகள் போதை மாத்திரையை அதிகமாக உட்கொண்டு இறந்தாள்.

அமெரிக்க நகை வியாபாரியான ஹாரி வில்சன் மட்டுமே அந்த வைரத்தால் பாதிக்கப்படாதவர். மக்லின் குடும்பத்தாரிடம் இருந்து வைரத்தை விலைக்கு வாங்கிய அவர், ஸ்மித்சோனியன் கழகத்துக்கு அதைக் கொடுத்துவிட்டார்.