பாம்பன் ரயில் பாலத்தில் 121வது தூண் வெடிவைத்து தகர்ப்பு

ராமேஸ்வரம்: கடற்படை கப்பல் மோதியதில் சேதமான பாம்பன் ரயில் பாலத்தின் 121வது தூண் நேற்று வெடி வைத்து தகர்த்து அப்புறப்படுத்தப்பட்டது. அந்த இடத்தில் இரும்பு கர்டர்களை தாங்கி நிற்க கடலுக்கு அடியில் இருந்து வலுவான சாரங்கள் அமைக்கப்பட்டுள்ளன. விரைவில் ரயில் போக்குவரத்து துவங்க ஏற்பாடுகள் நடந்து வருகின்றன.இந்திய கடற்படைக்கு புதிதாக வடிவமைக்கப்பட்ட கப்பல், கொல்கத்தாவில் இருந்து மும்பைக்கு இழுவை கப்பல் மூலம் இழுத்து வரப்பட்டது. பாம்பன் கடல் பகுதிக்கு 9ம்தேதி வந்தபோது துறைமுக அதிகாரிகளின் அனுமதி கிடைக்காததால், பாம்பன் வடகடல் பகுதி யில் நிறுத்தப்பட்டன. கடலில் வீசிய பலத்த காற்றால், கடற்படை கப்பல் நீரோட்டத்தில் இழுத்து வரப்பட்டு, பாம்பன் ரயில் பாலத்தில் மோதியது.இதில், பாம்பன் ரயில் பாலத்தில், இரும்பு கர்டர்களை தாங்கி நிற்கும் 121வது தூண் பெயர்ந்து விலகியது. பாலம் சேதமடைந்ததால், ரயில் போக்குவரத்து நிறுத்தப்பட்டது. சேதமடைந்த121வது தூணை அகற்றி விட்டு, அங்கு புதிய பில்லர் அமைக்கரயில்வே நிர்வாகம் திட்டமிட்டுள்ளது.ஆனால் ரயில் போக்குவரத்தை தொடங்க தற்காலிகமாக தண்டவாளங் களை சீரமைக்கும் பணி கடந்த 5 நாட்களாக நடந்து வருகிறது.
:-
தண்டவாளம் அமைந்துள்ள இரும்பு கர்டர்களை தாங்கி நிற்பதற்காக, சேதமடைந்த தூணின் இரு பக்கத்திலும் கடலுக்குள் இருந்து இரும்பினால் ஆன சாரங்கள் அமைக்கப்பட்டன. இந்த பணி நேற்று காலை முடிந்தது.இதையடுத்து, சேதமான தூணை அகற்றும் பணி துவங்கியது. தூணில் துளையிட்டு ஏர்கம்ப்ரசர் மூலம் அதிக காற்றழுத்தம் கொடுத்து உடைக்க செய்த முயற்சி தோல்வியடைந்தது. இதைத்தொடர்ந்து, குறைந்த சக்தி கொண்ட வெடிகுண்டுகளை,தூணின் வடபகுதியில் துளையிட்டு வைத்தனர். குண்டுகளை கார்டெக்ஸ் வயரில் இணைத்து வயரை 80 அடி தூரத்திற்கு கொண்டு சென்று அங்கிருந்தவாறு இயக்கி வெடிக்க செய்தனர். இதில் தூணில் விரிசல் ஏற்பட்டது. பின்னர் சிறிது சிறிதாக இடித்து அப்புறப்படுத்தினர். பவர் ஜாக் இயந்திரத்தை வைத்து தூணை உடைத்ததாக பணியில் ஈடுபட்ட பொறியாளர் ஒருவர் தெரிவித்தார். தற்காலிகமாகரயில் பாலம் சீரமைக்கப்பட்டுள்ளதால், இன்று சோதனை ஓட்டத்திற்கு பிறகு, ரயில் போக்குவரத்து விரைவில் துவங்கும் என அதிகாரிகள் தெரிவித்தனர்.
:-
காத்திருக்கும் கப்பல்கள்
மன்னார் வளைகுடா கடல் வழியாக மும்பையில் இருந்து தூத்துக்குடி செல்ல பாம்பன் வந்த 2 கப்பல்கள், தூக்கு பாலம் திறக்கப்படாததால் கடந்த 5 நாட்களாக குந்துகால் பகுதியில் நிறுத்தி வைக்கப்பட்டுள்ளன. ரயில் பாலம் சீரமைக்கப்பட்ட பின்னர் தான் தூக்குபாலம் திறக்கப்படும். இதன் பின்னரே 2 கப்பல்களும் பாக்ஜலசந்தி வழியாக தூத்துக்குடி செல்ல முடியும். இதற்கிடையே பாறையில் சிக்கிய இழுவை கப்பல் நேற்றும் அப்புறப்படுத்தப்படாமல் கடலில் நிலை நிறுத்தப்பட்டுள்ளது.
:-
தினகரன்

அப்பாடி இதுக்குத்தானா - நான் ஏதோ தீவிரவாதிகளின் செயலோன்னு நெனச்சுட்டேன்.

சீக்கிரம் சரி செய்யட்டும் போக்குவரத்து துவங்கட்டும்.