இந்திய வீரர்களை கொன்ற பாக்., ராணுவத்துக்கு பதிலடி: பைக்ராம் சிங் எச்சரிக்கை

புதுடில்லி:"" இந்திய ராணுவ வீரர்களின் தலையை, பாகிஸ்தான் ராணுவத்தினர் துண்டித்ததை, ஒருபோதும் மன்னிக்க முடியாது. பாக்., ராணுவத்துக்கு, சரியான நேரத்தில், இந்திய ராணுவம், தகுந்த பதிலடி கொடுக்கும்,'' என, இந்திய ராணுவ தளபதி, பைக்ராம் சிங் எச்சரிக்கை விடுத்துள்ளார்.

இந்தியா-பாக்., எல்லையில், காஷ்மீர் மாநிலம், பூஞ்ச் மாவட்டத்தில், பாகிஸ்தான் ராணுவத்தினர், சமீபத்தில் அத்துமீறி, இந்திய எல்லைக்குள் ஊடுருவினர். அங்கு, கண்காணிப்பு பணியிலிருந்த, இந்திய வீரர்கள் மீது, தாக்குதல் நடத்தினர்.இதில், இரண்டு இந்திய வீரர்கள் உயிரிழந்தனர். அவர்களின் தலைகளை துண்டித்த பாக்., ராணுவத்தினர், இருவரில் ஒருவரின் தலையை, தங்களுடன் எடுத்துச் சென்றனர். இந்த சம்பவம், நாடு முழுவதும் பெரும் அதிர்ச்சியை ஏற்படுத்தியது. பாக்., ராணுவத்தின் இந்த கொடூர நடவடிக்கைக்கு, மத்திய அரசு கண்டனம் தெரிவித்தது.இந்திய ராணுவம் நடத்திய பதிலடி தாக்குதலில், பாக்., ராணுவ வீரர் ஒருவர் உயிரிழந்தார். இதைத் தொடர்ந்து, எல்லை பகுதியில் பதற்றம் ஏற்பட்டது. இரு நாட்டு வீரர்களும் குவிக்கப்பட்டனர்.



இதுகுறித்து, இந்திய ராணுவ தளபதி, பைக்ராம் சிங், நேற்று கூறியதாவது:இந்திய வீரர்கள் மீது, பாகிஸ்தான் ராணுவம் தாக்குதல் நடத்தியது மற்றும் இந்திய வீரரின் தலையை, துண்டித்து எடுத்துச் சென்றது எல்லாம், பாகிஸ்தான் ராணுவத்தால், முன் கூட்டியே திட்டமிட்டு நடத்தப்பட்டவை.இந்திய வீரர்கள், கொடூரமாக கொல்லப்பட்டதை, ஒருபோதும் மன்னிக்க முடியாது. பாகிஸ்தான் ராணுவத்துக்கு, சரியான நேரத்தில், தகுந்த பதிலடி கொடுக்கும் உரிமை, இந்திய ராணுவத்துக்கு உள்ளது. பாக்., ராணுவம், இதுபோன்ற அத்துமீறல்களை தொடர்ந்தால், இந்திய ராணுவம், தகுந்த பதிலடி கொடுக்கும்.

இந்த விவகாரத்தில், இந்திய அரசு, பெருந்தன்மையையும், முதிர்ச்சியையும், கையாண்டு வருகிறது. எல்லையில், 2003லிருந்து, போர் நிறுத்த ஒப்பந்த விதிமுறைகள் அமலில் உள்ளன. ஒரு சில நேரங்களில், விதிமுறைகள் மீறப்பட்டாலும், அதற்கு பாகிஸ்தான் தான் காரணமே தவிர, இந்திய ராணுவம், காரணமில்லை."இந்திய ராணுவம் தாக்கியதால் தான், கடந்த, 6ம் தேதி, நாங்கள் திருப்பி தாக்கினோம்' என, பாக்., தரப்பில் கூறப்படுவது உண்மை அல்ல. இந்திய ராணுவம், அதுபோன்ற தாக்குதல் எதையும் நடத்தவில்லை. பாக்., ராணுவத்தின் தாக்குதலுக்கு பின், லஷ்கர் அமைப்பின், சதித் திட்டம் இருக்கலாம் என்ற தகவலையும் மறுக்க முடியாது.

பாகிஸ்தான் ராணுவம், இதுபோன்ற அத்துமீறல்களை தொடர்ந்தால், உடனடியாக பதிலடி கொடுக்கும்படி, ராணுவத்துக்கு உத்தரவிடப்பட்டுள்ளது. பாக்., ராணுவத்தின் விஷமச் செயலை, இனியும் வேடிக்கை பார்த்துக் கொண்டிருக்க மாட்டோம். எல்லை பகுதியில் உள்ள இந்திய வீரர்கள், மிகவும் பொறுமையாக இருக்கின்றனர். இது, பாராட்டதக்க செயல். சமீபத்தில் நடந்த சம்பவம் காரணமாக, இரு நாடுகளுக்கும் இடையே, தீவிரமான போர் நடக்கும் என்றும், அணு ஆயுதப் போர் நடக்கும் என்றும், கூறப்படுவது தவறு. அதற்கான அறிகுறி எதுவும் இல்லை.இவ்வாறு ராணுவ தளபதி பைக்ராம் சிங் கூறினார்.

போராட்டம் தீவிரம் :

பாகிஸ்தான் ராணுவத்தால், தலை துண்டித்து கொலை செய்யப்பட்ட, இந்திய வீரர் ஹேம்ராஜின், சொந்த ஊர், உ.பி., மாநிலத்தில் உள்ளது. ஹேம்ராஜின் தலையை துண்டித்த, பாக்., வீரர்கள், அந்த தலையை தங்களுடன் எடுத்துச் சென்று விட்டனர்.அந்த தலையை, தங்களிடம் ஒப்படைக்கும் வரை, காலவரையற்ற உண்ணாவிரதம் இருக்கப் போவதாக, ஹேம்ராஜின் தாயாரும், மனைவியும் அறிவித்தனர். இதன்படி, ஆறாவது நாளாக, அவர்களின் உண்ணாவிரதம் நேற்றும் தொடர்ந்தது. நேற்று, அவர்களின் உடல் நிலை மோசமானது. ஹேம்ராஜின் மனைவி, தரம்வதி கூறியதாவது:என் கணவரின் தலையை, திரும்ப எங்களிடம் ஒப்படைக்க வேண்டும். அதுவரை போராட்டத்தை தொடருவோம். இந்திய ராணுவ தளபதி, நேரடியாக இங்கு வந்து, இதுகுறித்து எங்களுக்கு உறுதி அளிக்க வேண்டும்.இவ்வாறு தரம்வதி கூறினார்.இதற்கிடையே, உண்ணாவிரதம் இருந்து வரும், ஹேம்ராஜின் குடும்பத்தினரை, பா.ஜ., மூத்த தலைவர்கள், நிதின் கட்காரி, சுஷ்மா சுவாஜ் ஆகியோர், நேற்று நேரில் சந்தித்து, ஆறுதல் கூறினர்.

-தினமலர்