சொல்ல மறந்த செய்தி

சென்னையின் மின்சார ரயில்களில் கையடக்க மான மலிவு விலை புத்தகங்கள், ரேஷன் கார்டு கவர், பேனா போன்ற பொருட்கள் விற்று பிழைக்கும் மாற்றுத் திறனாளிகளை தினமும் சந்திக்கலாம். சுமித்ரா (29), முருகன் (35) தம்பதியின் தொழில் அதுதான்.இருவருக்கும் பார்வை கிடையாது. சுமித்ரா மீது இரக்கம் கொண்ட ஒரு இளம்பெண், அவருக்கு பார்வை கிடைக்க உதவுவதாக சொல்லி வண்டலூருக்கு அழைத்து செல்கிறாள்.
:-
எப்போதுமே ஆள் அரவம் இல்லாதஒரு ரயில் நிலையம் அது. ஏழை என்றால்தான் இலவசமாக ஆபரேஷன் செய்வார்கள் என்பதால் கம்மலை கழற்றி கொடு; செல்போனையும் தந்துவிடு என்று கேட்டு வாங்கிக் கொள்கிறாள் அப்பெண். அதோடு அவள் மாயம். சுமித்ரா புகாரை பெற்ற ரயில்வே போலீஸ், செல்போன் கம்பெனி உதவியுடன் திருடியை கண்டுபிடித்து, அவள் அடகு வைத்திருந்த நகையை மீட்டுக் கொடுத்தது. சுமித்ராவின் அரசு பென்ஷன் அட்டையையும் பார்வையற்றவர் என்பதற்காக கோவையிலுள்ள ஆஸ்பத்திரி கொடுத்திருந்த சான்றிதழையும் திருடி தூக்கி எறிந்துவிட்டாள். அதற்கும் மாற்று ஏற்பாடு செய்தார்கள் இன்ஸ்பெக்டரும், டிஎஸ்பியும்.
:-
காவல்துறையை பற்றி நாடு முழுவதும் கடுமையான விமர்சனம் நிலவும் காலகட்டத்தில் இந்த செய்தியை வாசிப்பவர்கள் இன்ப அதிர்ச்சிக்கு ஆளாவது நிச்சயம். இந்த இடத்தில் சின்னதாக ஒரு நெருடல். நெகிழ்ச்சியூட்டும் விதமாகஅந்த செய்தியை வழங்கியுள்ள ஆங்கில நாளிதழின் நிருபர், ஒரே ஒரு தகவலை மட்டும் குறிப்பிடவில்லை.
:-
இரண்டு காவல் நிலையங்களிலும் பின்னர் ரயில்வே போலீஸ் தலைமையகத்திலும் அடுத்தடுத்து உதாசீனம் செய்யப்பட்டதால் பார்வையற்றோர் சங்க நிர்வாகிகள் உதவியுடன் முதலமைச்சரின் தனிப்பிரிவில் சுமித்ரா புகார் அளித்து அங்கிருந்து கேள்விகள் வந்த பிறகுதான் மேற்சொன்ன அதிகாரிகள் செயலில் இறங்கியிருக்கிறார்கள் என்பது அவர் சொல்லாத தகவல். அல்லது சம்பந்தப்பட்ட அதிகாரிகள் அவருக்கு சொல்ல மறந்த செய்தி. பாலியல் பலாத்காரம் குறித்து ஊடகங்களில் வெளியாகும் செய்திகளை எவ்வாறு கட்டுப்படுத்துவது என்று தெரியாமல் திண்டாடும் டெல்லி போலீஸ், சென்னைக்கு ஒரு குழுவை அனுப்பி வைத்தால் பாடம் படிக்கலாம்.
:-
தினகரன்

நல்லவங்க நிறைய இருக்காங்க ஆனா செய்தி தான் வருவதில்லை.

கெட்டது என்னிக்குமே வைரஸ் பேக்டீரியா போல் சீக்கிரம் பரவிடும் என்பது மெய்தான்.