இவ்ளோதான்யா நீங்களும் உங்க ஜாதகமும். ஆதாரங்களுடன் ஒரு அதிரடி

by **அகல்** Thu Jan 03, 2013 3:39 pm

First topic message reminder :

எனது வலைப்பூவில்: http://kakkaisirakinile.blogspot.in/2013/01/blog-post.html

இது என்னோட 2013 வது புத்தாண்டின் முதல் பதிவு ஆனா பேசப்போறது 2012 ஆண்டு புத்தாண்ட பத்தி. என்னடா சம்மந்தமே இல்லமா ஒருவருஷம் பின்னாடி போயி பேசுறேன்னு பாக்குறிங்களா ..? சம்மந்தம் இருக்குங்க. அதுவும் என்னான்னு கொஞ்சம் பாக்கலாம் வாங்க.

அது என்னவோ தெரியலைங்க. வீட்ல சாம்பார்ல இருந்து பொறியல் வரைக்கும் எதுலயாவது ஒரு சின்ன எறும்பு விழுந்தாகூட வேற யாரு கண்ணுலயும் படாது. என் கண்ணுல மாட்டிக்கும். அதுக்கப்பறம் என்ன, எங்க அம்மா காதுல பஞ்சு வச்சுக்க வேண்டிய தான் பாக்கி. இப்ப நான் வெளியூர்ல இருக்கறதால என் அம்மா கொஞ்சம் சந்தோசமா இருக்கும்னு நெனைக்கிறேன். ஏனா, வீட்ல என் அம்மாவை எப்பவும் திட்ற ஒரே ஜீவன் நானாதான் இருப்பேன் (நீ பக்கத்துல இருந்து திட்டமா இப்பல்லாம் ரொம்ப போர் அடிக்குதுடானு போன்ல அப்பப்ப காலாய்க்க வேற செய்யிறாங்க). இது மாதிரி தான் போன 2012 புதுவருட நீயா நானா ஸ்பெஷல் ஷோல சிலர் என் கண்ணுக்கு மாட்டுனாங்க (சத்தியமா இந்த வாட்டி கோபிய விமர்சிக்கலங்கோ). ஆனா அதப்பத்தி எழுதனும்னா 2012 முடியும் வரம் காத்திருந்துதான் ஆகணும். அப்படி ஒரு கட்டயாம். அதுக்கு முன்னாடிஎழுதிருந்தா என்ன முட்டாள்னு முத்திரை குத்தீருப்பாங்க. ஏனா டாபிக் அப்படி.

அது என்ன ஷோ ? தலைப்பு என்ன ? அதுல என்ன பிரச்சன ? யார் அந்த நண்பர்கள்னு பாக்கா அப்படியே ஒருவருஷம் பின்னாடி போலாமா ..?

2012 வருஷ நீயா நானா ஸ்பெசல் ஷோல பேசப்பட்ட தலைப்பு "2012 ஆண்டில் ஜோதிடம் என்ன சொல்கிறது" என்பதுதான். இந்த நிகழ்ச்சியில் பொதுப்பலன், ஒவ்வொரு ராசிக்கும் உரிய பலன் அப்படின்னு நெறைய விவாதிச்சாங்க. அதுல, கோபி ஒரு கேள்விய கேட்டாரு. 2012 இல் நான் இதைக் கணித்திருக்கிறேன். அது கண்டிப்பாக நடக்கும் என எந்த நிகழ்வையாவது உங்களால் சொல்ல முடியுமா என்று.

அதுக்கு வந்த பதில்கள் நிறைய. அதுல முக்கியமான ரெண்டு, 2012 முடியறதுக்குள்ள "ராஜபக்சே கட்டாயமாக ஆட்சியை விட்டு இறங்குவார்" , "இந்திய-சீன போர் வரும்" என்பதே.

இதுல எதாச்சும் நடந்ததா ..? அவர்கள் பேசிய பகுதியை மட்டும் இந்த காணொளில் ஒரு முறை பார்க்கவும். மீதியை பிறகு பேசுவோம்.

அதுமட்டுமில்லாம, அந்த ஜோசியர்களிடே கூட சரியான உடன்பாடில்லை. ஒருவர் ராஜபக்சே ஆட்சியை விட்டு விலகுவார்னு சொல்றாரு, மற்றொருவர் கண்டிப்பா இல்லன்னு எதிர்கிறாரு. அவங்களுக்குள்ளேயே எது சாரின்னு தெரியல. எல்லாரும் ஒரே ஜாதகத்தத்தான படிச்சிருப்பாங்க.? அப்ப ஏன் இந்த மாறுபட்ட கருத்துக்கள் .? இவர்கள் எப்படி நம்மளுடைய வாழ்கைய ஜாதகம் என்கிற போர்வையில தீர்மானிக்க முடியும். இவர்களை நம்பி நாம் ஏன் போகவேண்டும். இவர்கள் என்ன கடவுளா..? நாமளும் கொஞ்சம் யோசிக்க வேண்டாமா ..?

அதோட இங்க நீங்க இன்னும் ஒன்ன சரியா புரிஞ்சுக்கணும். இந்த நிகழ்ச்சியில் கலந்துகொண்ட ஜோசியர்கள் எல்லாரும் தமிழ் நாட்டில் பிரபலமான பெரிய ஜோசியர்கள் என்று சொல்லப்படுபவர்கள். ஷெல்லி என்கிறவர் அடிக்கடி டிவில வாரத பாத்துருப்பிங்க. அவர்தான் ராஜபக்சே 2012 குள்ள ஆட்சியை விட்டு வெளியேற்றப்படுவார்னு சொன்னார். ஆனா நமது உறவுகளை ஈவு இரக்கமின்றி கொன்று குவித்த அவன் என்னவோ சுகபோகமாகத்தான் வாழ்ந்து கொண்டிருக்கிறேன். ஜோசியத்தில் அனைத்தையும் அறிந்த, தமிழ் நாட்டின் பெரிய ஜோசியர்கள் என்று சொல்லப்படும் இவர்கள் வார்த்தைகளே பொய்த்து போகிறதே, அப்ப நம்ம ஊரு அரைகுறை ஜோசியர்களின் கதி என்ன ..? அவர்களை நம்பி நாம ஏன் ஊர் ஊரா கோவில் கோவிலா சுத்தணும், வாழ்க்கைய அழிச்சுக்கணும் ..?

அடுக்கடுக்காக வைக்க என்னிடம் நிறைய கேள்விகள் இருந்தது. அந்த கேள்விகளை ஒட்டுமொத்தமாக "சங்கரி ராஜ்குமார்" என்ற ஒரு இயக்குனர் தன்னோட படத்து கடைசி காட்சில சமூதாயத்திற்கு ஒரு சாட்டையடியாக பதிவு செய்தார். அந்தப் படம் வேற எதுவும் இல்ல. யாருமே பெருசா கவனிக்காத, இப்படி ஒரு படம் வாந்துச்சானு கூட பலருக்கு தெரியாத படம் "வெங்காயம்". நான் பார்த்த சமூக கருத்துள்ள படங்களில் மிக முக்கியமான இடத்தை பிடிக்கும் படம் இது.

அந்த படத்தின் ஐந்து நிமிட கடைசி காட்சியை இங்கு இணைக்கிறேன். கட்டாயம் பாருங்கள்.

இத்தனை கேள்விகள் உதாரணங்கள் கொடுத்தும், நீ என்ன அவ்ளோ பெரியாளா .? உனக்கு அப்படி என்ன தெரியும் ..? உன்ன பெரிய அறிவாளின்னு காட்டிக்க முயற்சி பண்ட்ரியானு தலைப்ப மட்டும் பாத்துட்டு கல்ல விட்டு அடிக்க நம்ம ஊர்ல பல நண்பர்களும் இருப்பாங்க. அடிக்கறதா இருந்தா கொஞ்சம் சின்ன கல்லா வச்சு அடிங்க பாஸ். ஆனா அடிச்சிட்டு, குறைந்த பட்சம் இந்த மூட நம்பிக்கைகளை விட்டு விலகினா ரொம்ப சந்தோசப்படுவேன்.

இத்தனை சொல்லியும்.. உனக்கு என்ன தெரியும், இந்த கட்டுரை உன்னோட அறியாமையைக் காட்டுது அப்படின்னு நம்மாளுக கமெண்ட் அடிக்காம இருக்க மாட்டாங்க. அவங்களுக்கு மட்டும் என் வாழ்கையை ஒரு உதாரணமாகச் சொல்லி இந்த பதிவை முடித்துக்கொள்கிறேன்.

2011 ஆகஸ்ட் 18 தேதி, நான் இந்த உலகில் ஒரு தனிமரம் என்று நினைத்துக் கொண்ட நாள். என் வாழ்க்கையில், ஈடு செய்ய முடியாதா ஒன்றை இழந்த நாள். என் வாழ்வில் இதற்கு மேலும் ஒரு பெரிய இழப்பு வர இயலாத, அந்த இழப்பு என் அண்ணன் என்பதை இன்னும் ஜீரணித்துக் கொள்ள முடியாத நாள். ஒரு விபத்தில் சிக்கி, சில லட்சங்கள் செலவு செய்தும் இரண்டு நாட்கள் மருத்துவமனையில் இருந்தபின் 29 வது வயதில் எனது அண்ணனின் உயிர் பிரிந்தது. என் அப்பாவிற்கு ஜாதகத்தில் அதீத நம்பிக்கை. ஆனால் எனக்கு எப்போதுமே இருந்ததில்லை.

அந்த நம்பிக்கையால் உயிர் பிரிவதற்கு சில மணி நேரங்களுக்கு முன்னும் என் அப்பா, என் மாமாவிடம் சொல்லி எனது அண்ணனின் ஜாதகத்தைப் பார்க்கச் சொன்னார். ஜோசியர் சொன்னது, "இவரின் ஆயுள் கெட்டியானது. எதற்கும் பயப்படாதீர்கள். இப்போது எதுவும் ஆகாது. கண்டிப்பாக திரும்பிவருவார் என்பதே". என் அண்ணனும் திரும்பி வந்தார், ஆனால் உயிர் மட்டும் இல்லை.

என் அண்ணனின் ஆயுள் ஜாதகம், எங்களுடைய சுற்றுப்புற ஊர்களிலேயே மிகவும் பிரபலமான ஜோசியர் ஒருவரால் முத்தான எழுத்துக்களில் 73 வயதுவரை வாழ்வார் என எழுதப்பட்டு, அதற்கு மேலும் ஆயுள் உண்டு என்ற குறிப்போடு இன்னும் எங்கள் வீட்டில் உறங்கிக் கொண்டிருக்கிறது.

இத்தனை மாதங்களாகியும் உயிருக்கு இணையான என் அண்ணனைப் பற்றி சிந்திக்கவே எனது மனம் இன்னும் பக்குவப்படவில்லை. இருந்தும் இந்த உதாரணத்தைத் தர காரணம், சிலருக்காவது உதவும் என்ற நம்பிக்கையில்.

யோசிப்பீர்கள் என்று நம்புகிறேன்..!

நன்றி,

அன்புடன்,
அகல்

by **ரா.ரா3275** Fri Jan 04, 2013 5:23 pm

என்னதான் ஜோதிடத்தில் ஏற்பு/எதிர்க் கருத்துக்கள் உலா வந்தாலும் சிற்சில கணிப்புகள் வெகு சுவாரஸ்யமாக இருக்கும் என்பதையும் மறுப்பதற்கில்லை...

உதாரணமாக...செவ்வாய்தோஷம் இருக்கும் ஜாதகர்களுக்கு நெகட்டிவ் ரத்த வகை இருக்கும் என்பதாகக் கூறுவார்கள்...
சிலவேளைகளில் இது சிலருக்குப் பொருந்தியும் போயிருக்கிறது என்று விஜய் டிவி-யில் நடந்த ஒரு 'நீயா?நானா?'-வில் கூறினார்கள்...
இப்படி சுவாரஸ்யமும் தருகிற துறைதான் ஜோதிடத் துறை...
இருந்தும் கருத்து முரண்பாடுகள் இல்லாமலும் இல்லை...

by **ரா.ரா3275** Fri Jan 04, 2013 5:27 pm

சூப்பர் ஸ்டாரும் பிறந்த நாள் முதலாக சூப்பர் ஸ்டாரை வலம் வரவில்லையே, அவரும் ஒரு கால நேரத்துக்கு பின்பே மாறுகிறார்

உண்மைதானே...தனது நாற்பது வயதுவரை அவர் ததிங்கனத்தோம் ஆடியது உண்மைதானே...

by **கே. பாலா** Fri Jan 04, 2013 5:27 pm

ஜோதிடம் பொய்யல்ல....
பொய்யானவர்கள் ஜோதிடம் பார்பவர்களில் அதிகம் ...

ஜோதிடத்தை நம்புங்கள்
ஆனால் ஜோதிடத்தை மட்டுமே நம்பாதீர்கள் சிரி

by சதாசிவம் Fri Jan 04, 2013 5:30 pm

அகல் wrote:நன்றிகள் அண்ணே .. // இன்றைக்கு அனைத்தும் வர்த்தகமாக மாறிவிட்டது, ஆகையால் உண்மையில் சொல்லப்படாத பல விஷயங்கள் இன்று பரிகாரங்களாக உலவுகிறது// இது முற்றிலும் உண்மை என்று அறியும் பட்சத்தில் நம்பலாம் . ஆனால் பல பொய்கள் கலந்துள்ளது அல்லது கலந்து விட்டார்கள் என்பதை நீங்களே ஒப்புக்கொள்கிறீர்கள். பிறகு எதன் அடிப்படையில் நான் அதை நம்ப வேண்டும். நம்ப முடியும் .! நீங்களே சொல்லுங்கள் ..

அது உங்களின் தேடலைப் பொறுத்து தான் அமையும்,

வீடு வாங்குவதில் சில சிக்கல்கள் இன்றைய கால கட்டத்தில் இருப்பதால், நாம் வக்கீலை நாடுவதற்கு முன்பே சில தகவல்களை சரி பார்க்கிறோம். அது போல் தான் ஜோதிடம் என்ன என்ன சொல்ல இயலும், எதற்குப் பயன்படும் என்ற அடிப்படையை தெரிந்து வைத்து கொள்ள வேண்டும், இது போலிகளை குறைக்கும். ஒரு பொருளின் மெய்ப் பொருளைக் காண்பதே அறிவு, அப்பொருளின் முழுமையை உணரும் வரை அதை சந்தேகிக்கலாம், ஆனால் ஆராயாமல் பொய் என்று முடிவுக்கு வரக்கூடாது. இன்றைக்கு நாம் படிக்கும் பல அறிவியல் கூற்றுகளும் அனுமானமே, தீர்மானம் அல்ல என்பதை நாம் உணர வேண்டும்.

இன்றைய தமிழர்கள் கவிதைகளை வைத்து தமிழின் ஆழத்தை எடை போடக் கூடாது. அது போல் தான் ஜோதிடத்தின் முழுமை தெரியாமல் அது வீணானது என்று முடிவுக்கு வரக்கூடாது.

by **ரா.ரா3275** Fri Jan 04, 2013 5:31 pm

பங்குச் சந்தையில் எப்படி ஒருவரின் அறிவும் அனுபவமும் கைகொடுக்கிறதோ, அதைப் போல் தான் ஜோதிடமும்,,நீங்கள் முதலீடு செய்வதில் லாபம் வந்தால் நீங்கள் அறிவாளி, இல்லையென்றால் ஏமாளி, ஜோதிடம் சொல்வது நடந்தால் அது உண்மை நடக்கவில்லை என்றால் பொய் என்ற எண்ணம் நிலவுகிறது....பங்குச் சந்தையில் லாஜிக் இருக்கும் போது அதில் கணிக்கப்படும் அனைத்தும் உண்மையாக நடப்பதில்லையே, உடனே கணித்தவர்கள் பித்தலாட்டக்காரர்கள், அறிவில்லாதவர்கள் என்று கூறலாமா ?

அருமையான வாதத்தை எடுத்து வைத்துள்ளீர்கள் சதாசிவம்...
இதுதான் நிஜம்-யதார்த்தம்...

by **T.N.Balasubramanian** Fri Jan 04, 2013 5:55 pm

எனக்கு தெரிந்து குணநலன்கள் கூறமுடியும். எனக்கு தெரிந்த ஒரு ஜோசிய வல்லுநர் நடந்த விஷயங்கள் சரியாக சொல்லுவார். ஜாதகரின் குணங்கள் , அவர் வீட்டில் நடந்த துன்ப நிகழ்ச்சி /துர்மரணம் எல்லாம் சரியாக சொல்லுவார். பரிகாரங்கள் கூறுவார் --மனது சாந்தி அடைய .பரிகாரங்களால் விதியை மாற்றமுடியுமானால் . ஊர் முழுதும் பரிகார நிலையங்கள் சக்கை போடு போடும். பிறக்கும் போதே எழுதி வைத்தாகிவிட்டது. மாற்றவே முடியாது.
கோயில்கள் சுற்றுவது / பரிகாரங்கள் /பூஜைகள் செய்தல் எனக்கு உடன் பாடு இல்லை.

ரமணியன்

by **கரூர் கவியன்பன்** Sat Jan 05, 2013 5:39 am

முற்றிலும் ஒதுக்கிவிட முடியாது இவ்விசயத்தை ஆனால் இதையே நம்பிக்கொண்டிருந்தால் அதைவிட முட்டாள் இவ்வுலகில் இருக்க முடியாது

by சதாசிவம் Sat Jan 05, 2013 7:28 am

கரூர் கவியன்பன் wrote:முற்றிலும் ஒதுக்கிவிட முடியாது இவ்விசயத்தை ஆனால் இதையே நம்பிக்கொண்டிருந்தால் அதைவிட முட்டாள் இவ்வுலகில் இருக்க முடியாது

இதைக்கூட நம் பெரியவர்கள் முன்பே கூறிவிட்டனர் நண்பரே, அதிர்ஷ்டம் ஒரு சக்கரமே, வாழ்க்கை என்ற வண்டி ஓட முயற்சி என்ற இன்னொரு சக்கரமும் தேவை என்று .....

ஜோதிடம் மட்டுமல்ல, இன்றைக்கு எந்த ஒன்றை மட்டும் நம்பி வாழ்க்கையை ஓட்ட முடியாது..

by **அகல்** Sat Jan 05, 2013 10:18 am

சதாசிவம் wrote:[அது போல் தான் ஜோதிடத்தின் முழுமை தெரியாமல் அது வீணானது என்று முடிவுக்கு வரக்கூடாது.

நடைமுறையில் பல நிகழ்வுகளை மேற்கோள் காட்டியுள்ளேன் எபதை நீங்கள் கவனிக்க வேண்டும்.

by **அகல்** Sat Jan 05, 2013 10:20 am

ரா.ரா3275 wrote:
பங்குச் சந்தையில் எப்படி ஒருவரின் அறிவும் அனுபவமும் கைகொடுக்கிறதோ, அதைப் போல் தான் ஜோதிடமும்,,நீங்கள் முதலீடு செய்வதில் லாபம் வந்தால் நீங்கள் அறிவாளி, இல்லையென்றால் ஏமாளி, ஜோதிடம் சொல்வது நடந்தால் அது உண்மை நடக்கவில்லை என்றால் பொய் என்ற எண்ணம் நிலவுகிறது....பங்குச் சந்தையில் லாஜிக் இருக்கும் போது அதில் கணிக்கப்படும் அனைத்தும் உண்மையாக நடப்பதில்லையே, உடனே கணித்தவர்கள் பித்தலாட்டக்காரர்கள், அறிவில்லாதவர்கள் என்று கூறலாமா ?

அருமையான வாதத்தை எடுத்து வைத்துள்ளீர்கள் சதாசிவம்...
இதுதான் நிஜம்-யதார்த்தம்...

மன்னிக்கவும் புன்னகை

.. இங்கே இந்த கட்டுரை எழுதப்பட்டது சொன்னது நடக்கவில்லை என்பதால் அல்ல.. எனக்கு ஆரம்பம் முதல் உடன்பாடு இருந்ததில்லை என்பதையும் மேற்கோள் காட்டியுள்ளேன். கவனிக்கவும்..