இரண்டாம் உலகப்போரின் போது 'சுனாமி குண்டு' பரிசோதனை செய்த அமெரிக்கா, நியூசீலாந்து!

இரண்டாம் உலகப்போரின் போது 'சுனாமி குண்டு' பரிசோதனை செய்த அமெரிக்கா, நியூசீலாந்து!



கடல் நீருக்கு அடியில் சக்திவாய்ந்த வெடிகுண்டுகளை வெடிக்கச் செய்து அதன் மூலம் மிகப்பெரிய சுனாமி அலைகளைத் தோற்றுவித்து கடற்கரை நகரங்களை மூழ்க அடிக்கும் சதித் திட்டத்தை நியூசீலாந்தும் அமெரிக்காவும் இரண்டாம் உலகப் போர் காலக்கட்டத்தில் பரிசோதனை செய்ததாக பரபரப்பு தகவலை லண்டன் டெலிகிராப் இதழ் வெளியிட்டுள்ளது.

FILE

நியூசீலாந்தைச் சேர்ந்த எழுத்தாளரும் திரைப்பட இயக்குனருமான ரே வாரு (Ray Waru) தேசிய ஆவணக்காப்பகத்தில் புதைக்கப்பட்ட ஆவணங்களை ஒரு ஆராய்ச்சிக்காக பார்த்தபோது இந்த திடுக்கிடும் ஆவணங்களைக் கண்டதாக தெரிவித்துள்ளார்.

வாரு தனது புதிய புத்தகமான "ரகசியங்களும் பொக்கிஷங்களும்" என்ற புத்தகத்தில் இதுபோன்ற பல மூடி மறக்கப்பட்ட விஷயங்களை எடுத்த்கியம்பியுள்ளதாக டெலிகிராப் இதழ் கூறியுள்ளது.

சுனாமி குண்டு விஷயத்திற்கு வருவோம். நியூ கேலிடோனியா மற்றும் ஆக்லாந்து கடல்களில் இத்தகைய ஆபத்தான சோதனைகளை அமெரிக்காவும், நியூசீலாந்தும் இணைந்து அப்போது நடத்தியுள்ளது. இது போன்று ஒன்றை உருவாக்க முடிவதற்கான சாத்தியங்களும் இருந்துள்ளது. கடலுக்கு அடியில் 10 குண்டுகளை வெடிக்கச் செய்வதன் மூலம் 33 அடி உயர பேரலைகளை எழுப்ப முடியும் என்று நம்பப்பட்டது.

இரண்டாம் உலகப்போரின் முதன்மை ரகசியக் காப்பு ஆபரேஷனான இது "புராஜெக்ட் சீல்" என்று பெயரிடப்பட்டது. அணுகுண்டுக்கு எதிரிடையாக இத்தகைய நாசகார வெடிகுண்டை தயாரித்து பரிசோதனை செய்ய முடிவெடுக்கப்பட்டதாக தெரிகிறது.

சுமார் 3,700 குண்டுகள் இவ்வாறு வெடிக்கச்செய்யப்பட்டதாம்! "இது மிகவும் அதிர்ச்சிகரமான விஷயம், ஏனெனில் ஒரு நாடு இத்தகைய அபாய முடிவுக்கு வருகிறது என்ற கருத்தையே ஜீரணிக்க முடியவில்லை. சுனாமியை பயன்படுத்தி ஒரு நாசகார ஆயுதம் என்றால் அது பயங்கரம்தான். அதுவும் நியூசீலாந்து இதனை வெற்றிகரமாக நடத்த முடியும் அளவுக்கு இந்தத் திட்டத்தில் உதவி புரிந்துள்ளது!

1944ஆம் ஆண்டு இந்த நாசகார திட்டம் அறிமுகம் செய்யப்பட்டதாம். ஏற்கனவே அப்போதைய அமெரிக்க கடற்படை அதிகாரி கிப்சன், பவளப்பாறைகளை அகற்ற நடத்தப்பட்ட வெடிகுண்டு தாக்குதல்கள் ஓரளவுக்கு பெரிய அலைகளை எழுப்பியதாக கூறியிருந்தார். இதுதான் சுனாமி குண்டுகளை தயாரிக்க வித்திட்டுள்ளதாக வாரு தெரிவித்துள்ளார்.

முதல் டெஸ்டில் ஓரளவுக்கு வெற்றி கிடைத்ததாம், ஆனால் 1945 ஆம் ஆண்டில் இந்தத் திட்டம் முழுதும் கைவிடப்பட்டதாம்! ஆனாலும் நியூசீலாந்து தொடர்ந்து இந்தப் பரிசோதனையில் ஈடுபட்டு வந்து 1950 வரை ஆவணங்களை தயாரித்துள்ளதாக வாரு கூறுகிறார்.

அதாவது சுனாமி அலைகள் போன்று கடல் அலைகளை எழுப்ப இது போதாது என்று பிறகு தெரியவந்துள்ளது. நிபுணர்கள் கூறுகையில் கடற்கரையிலிருந்து கடலுக்குள்ளே 5 மைல் தொலைவு வரையிலும் 20 லட்சம் கிலோ வெடிகுண்டுகளை நிரப்பி வெடிக்கச் செய்தால்தான் பெரிய அலைகளை எழுப்பமுடியும் என்று கூறியுள்ளனர்.

"ஜேம்ஸ்பாண்ட் திரைப்படத்தில் இந்தக் காட்சியை வைத்தால் நாம் நல்ல கற்பனை என்போம் ஆனால் இது உண்மையில் சிந்திக்கப்பட்டு செயல்படுத்தும் அளவுக்கு சென்றுள்ளது என்பது மகா பயங்கரம், மேலும் இன்னமும் இதனை ஒருவர் பரிசீலித்து வருவதாகவே படுகிறது யாரோ ஒருவரின் டெஸ்கில் இந்த அறிக்கைகள் உள்ளன" என்கிறார் வாரு.

இவ்வளவு நெருக்கமாக இருந்த அமெரிக்க - நியூசீலாந்து உறவில் 1980ஆம் ஆண்டு முறிவு ஏற்பட்டது. அதாவது அமெரிக்காவின் அணு ஆயுத கப்பல்களுக்கு நியூசீலாந்து அனுமதி மறுத்ததையடுத்து உறவில் விரிசல் ஏற்பட்டாலும் நட்பு நாடாகவே உள்ளது.

நன்றி:வெப்தூனியா