கடைசி பந்தில் டெக்கான் "அவுட்'

சாம்பியன்ஸ் லீக் தொடரில் மிகப் பெரும் அதிர்ச்சி. நேற்றைய பரபரப்பான போட்டியில் ஐ.பி.எல்., சாம்பியனான டெக்கான் சார்ஜர்ஸ் அணி, டிரினிடாட் டுபாகோ அணியிடம் 3 ரன்கள் வித்தியாசத்தில் தோல்வி அடைந்து, வெளியேறியது. கடைசி பந்து வரை துணிச்சலாக போராடிய டிரினிடாட் டுபாகோ அணி "சூப்பர்-8' சுற்றில் நுழைந்தது. டெக்கான் கேப்டன் கில்கிறிஸ்டின் அதிரடி அரைசதம் வீணானது.

சாம்பியன்ஸ் லீக் "டுவென்டி-20' தொடர் இந்தியாவில் நடக்கிறது. நேற்று ஐதராபாத்தில் நடந்த "ஏ' பிரிவு லீக் போட்டியில் இந்தியாவின் டெக்கான் சார்ஜர்ஸ், வெஸ்ட் இண்டீசின் டிரினிடாட் டுபாகோ அணிகள் மோதின.

தவறான முடிவு:
இப்போட்டியில் வென்றாக வேண்டிய கட்டாயத்தில் டெக்கான் அணி களமிறங்கியது. டாஸ் வென்ற டெக்கான் கேப்டன் கில்கிறிஸ்ட், பீல்டிங் செய்வது என்று தவறான முடிவு எடுத்தார்.

பெர்கின்ஸ் அபாரம்:
டிரினிடாட் டுபாகோ அணிக்கு பெர்கின்ஸ் அசத்தல் துவக்கம் தந்தார். மறுமுனையில் சிம்மன்ஸ்(7) ஏமாற்றினார். டேரன் பிராவோ(14) விரைவில் நடையை கட்டினார். டேரன் கங்கா(0), டுவைன் பிராவோ(11) ரன் அவுட்டாகினர். பொறுப்பாக ஆடிய பெர்கின்ஸ் 32 பந்தில் 38 ரன்களுக்கு(6 பவுண்டரி) வெளியேறினார். ராம்தின் 15 ரன்கள் எடுத்தார்.

போலார்ட் அதிரடி:
கடைசி கட்டத்தில் போலார்ட் அதிடிரயாக ஆடினார். ஓஜா வீசிய 15வது ஓவரில் ஒரு சிக்சர், ஒரு பவுண்டரி அடித்தார். சுமன் வீசிய அடுத்த ஓவரில் இரண்டு இமாலய சிக்சர் விளாசினார். 14 பந்தில் 31 ரன்கள்(1 பவுண்டரி, 4 சிக்சர்) எடுத்த போலார்ட், எட்வர்ட்ஸ் "வேகத்தில்' போல்டானார். டிரினிடாட் டுபாகோ அணி 20 ஓவரில் 7 விக்கெட்டுக்கு 149 ரன்கள் எடுத்தது. ஷெர்வின் கங்கா(13), முகமது(2) அவுட்டாகாமல் இருந்தனர்.

கில்கிறிஸ்ட் அரைசதம்:
சவாலான இலக்கை விரட்டிய டெக்கான் சார்ஜர்ஸ் அணிக்கு கேப்டன் கில்கிறிஸ்ட் அதிரடி துவக்கம் தந்தார். ராம்பால் முதல் ஓவரிலேயே ஒரு சிக்சர், ஒரு பவுண்டரி அடித்தார். லட்சுமண்(4), அபினவ்(1), சைமண்ட்ஸ்(2) ஏமாற்றினார். ஒரு பக்கம் விக்கெட் சரிந்தாலும் மறுபக்கம் வாணவேடிக்கையை தொடர்ந்த கில்கிறிஸ்ட் அரைசதம் கடந்து அசத்தினார். இவர் 51 ரன்களுக்கு (6 பவுண்டரி, 2 சிக்சர்) சிம்மன்ஸ் பந்தில் அவுட்டானார். ஸ்டைரிஸ் 14 ரன்கள் எடுத்தார். இதற்கு பின் அதிரடியாக ஆடிய வேணுகோபால் ராவ் 19 பந்தில் 30 ரன்களுக்கு(2 பவுண்டரி, 2 சிக்சர்) வெளியேற, சிக்கல் ஆரம்பமானது.

6 பந்தில் 8 ரன்:
கடைசி ஓவரில் 8 ரன் எடுத்தால் வெற்றி என்ற நிலை ஏற்பட்டது. கைவசம் 3 விக்கெட்டுகள் இருந்தன. டுவைன் பிராவோ அருமையாக பந்துவீசினார். முதல் பந்தில் ஒரு ரன். இரண்டாவது பந்தில் இரண்டு ரன். 3வது பந்தில் ரன் இல்லை. 4வது பந்தில் ஆர்.பி.சிங்(5) போல்டானார். 5வது பந்தில் எட்வர்ட்ஸ்(0) ரன் அவுட்டானார். 6வது பந்தில் வெற்றிக்கு 5 ரன் தேவைப்பட்டது. ஆனால் ஒரு ரன் மட்டுமே எடுக்கப்பட, டெக்கான் சார்ஜர்ஸ் அணி 20 ஓவரில் 9 விக்கெட்டுக்கு 146 ரன்கள் எடுத்து தோல்வி அடைந்தது. இதன் மூலம் இத்தொடரில் இருந்து வெளியேறும் முதல் ஐ.பி.எல்., அணி என்ற அவப்பெயரை பெற்றது. டெக்கான் அணிக்கு தனது சொந்த ஊரான ஐதராபாத் ராசியில்லாதது. இங்கு தொடர்ந்து 9வது தோல்வியை சந்தித்தது.

இப்போட்டியில் 3 ரன்கள் வித்தியாசத்தில் "திரில்' வெற்றி டிரினிடாட் அணி 4 புள்ளிகளுடன் "சூப்பர்-8' சுற்றுக்கு முன்னேறியது. "ஏ' பிரிவில் 2 புள்ளி பெற்ற சாமர்சட் அணியும் "சூப்பர்-8' வாய்ப்பை பெற்றது. இரண்டு தோல்விகளுடன் டெக்கான் அணி பரிதாபமாக வெளியேறியது.

டிரினிடாட் அணியின் வெற்றிக்கு பக்கபலமாக இருந்த டுவைன் பிராவோ ஆட்ட நாயகன் விருதை வென்றார்.