மின்சாரம் பாய்ச்சி தாய், மகளை கொல்ல முயற்சி *கடலூர் அருகே கிராம மக்கள் பீதி

வீட்டில் தனிமையில் இருந்த தாய், மகளை மின்சாரம் பாய்ச்சி கொலை செய்ய முயன்ற சம்பவம் பெரும் பரபரப்பை ஏற்படுத்தியுள்ளது.கடலூர் அடுத்த எஸ்.புதூரைச் சேர்ந்தவர் சண்முகம். இவரது மனைவி திரிபுரசுந்தரி. இவர்களது நான்கு மகள்களில் மூவருக்கு திருமணமாகிவிட்டது.


இந்நிலையில், சண்முகம் இறந்து விட்டார். திரிபுரசுந்தரியும், அவரது இளைய மகள் சிவசங்கரியும் தனியாக வசித்து வருகின்றனர். இருவரும் நேற்று முன்தினம் இரவு வீட்டில் தூங்கிக் கொண்டிருந்தனர்.நேற்று அதிகாலை 3.15 மணி அளவில் வீட்டில் மண்ணெண்ணெய் வாசம் வீசவே, சிவசங்கரி எழுந்து விளக்கை போட்டார்.


மின்சாரம் இல்லாததால், சிவசங்கரி தனது மொபைல் போன் வெளிச்சத்தைக் கொண்டு பார்த்தபோது ஜன்னல் வழியே அறையினுள் மண்ணெண்ணெய் ஊற்றப்பட்டிருந்தது. மேலும், வீட்டின் முற்றத்தை சுற்றியுள்ள தூண்கள், வாசற்படியில் கம்பிகள் சுற்றப்பட்டிருந்ததைக் கண்டு திடுக்கிட்டார்.


உடன் சிவசங்கரி, வெளியே வராமல் மொபைல் போன் மூலம் எதிர் வீட்டில் உள்ளவர்களுக்கு தகவலை தெரிவித்தார். அவர்கள் சிவசங்கரி வீட்டிற்கு வந்து பார்த்தபோது தூண்களில் சுற்றியிருந்த கம்பி தோட்டத்தில் உள்ள மோட்டார் கொட்டகைக்கு அருகில் உள்ள பியூஸ் கேரியர் வரை இழுத்து செல்லப்பட்டிருந்தது.


வீட்டின் தனியாக இருந்த சிவசங்கரி மற்றும் அவரது தாய் திரிபுரசுந்தரியையும் மின்சாரம் பாய்ச்சி கொலை செய்யும் நோக்கில் வீட்டை சுற்றிலும் கம்பியை சுற்றியிருப்பது தெரிய வந்தது. உடன் இதுகுறித்து திருப்பாதிரிப்புலியூர் போலீசாருக்கு தகவல் கொடுத்தனர். போலீசார் விரைந்து சென்று சம்பவ இடத்தை பார்வையிட்டனர். அதன்பிறகே வீட்டை சுற்றி கட்டியிருந்த மின்கம்பிகள் அகற்றப்பட்டன.


இச்சம்பவம் குறித்த போலீசார் வழக்கு பதிந்து, யார், எதற்காக இந்த செயலை செய்தனர் என்பது குறித்து தீவிரமாக விசாரித்து வருகின்றனர்.வீட்டில் தனிமையில் இருந்த தாய் மற்றும் மகளை மின்சாரத்தை பாய்ச்சி கொலை செய்ய முயன்ற சம்பவத்தால் எஸ்.புதூர் கிராம மக்கள் பீதியடைந்துள்ளனர்.


இரண்டாவது சம்பவம்:கடலூர் அடுத்த எம்.புதூர் கிராமத்தில் இரண்டு மாதத்திற்கு முன் நள்ளிரவில் ஒரு வீட்டில் ஜன்னல் கண்ணாடி உடையும் சத்தம் கேட்டது. திடுக்கிட்டு எழுந்த வாலிபர் விளக்கை போட முயன்றார். மின்சாரம் இல்லை. ஜன்னலை திறக்க முயன்றபோது மின்சாரம் தாக்கியது.


திடுக்கிட்ட அந்த வாலிபர் டார்ச் லைட் அடித்து பார்த்தபோது ஜன்னல் மற்றும் வீட்டின் மெயின் கேட்டிற்கும் அருகில் உள்ள மின் கம்பத்திலிருந்து மின் இணைப்பு கொடுத்திருந்ததை கண்டு திடுக்கிட்டார். பின், பொதுமக்கள் உதவியுடன் மின் இணைப்பை துண்டித்தார்.இதுகுறித்து திருப்பாதிரிப்புலியூர் போலீசார் வழக்கு பதிந்து விசாரித்து வந்தனர்.


இந்நிலையில், இந்த கிராமத்திற்கு அருகில் உள்ள எஸ்.புதூர் கிராமத்தில் இரு பெண்கள் தனியாக உள்ள வீட்டில் கம்பியை சுற்றி மின் இணைப்பு கொடுக்க முயற்சி நடந்துள்ளது. அடுத்தடுத்து நடந்துள்ள இந்த சம்பவங்களை யார், எதற்காக செய்கின்றனர் என்பதை போலீசார் கண்டு பிடித்து நடவடிக்கை எடுக்க வேண்டும்.