நீங்க நல்லா வருவீங்க!

**Muthumohamed** · **Muthumohamed** Tue Jan 01, 2013 12:35 am

'டைம் பாஸில் உருப்படியான ஒரு விஷயம்கூட வராதா?’ என்று வருத்தப் பட்டிருந்தார் உளுந்தூர்பேட்டையில் இருந்து உலகநாதன். (அவரு உலகானந்தாங்க. இவரு வேற!). அதுக்கும் நல்ல காலம் பொறந்துடுச்சு. இதோ வாசகர்களுக்கான 2013 புத்தாண்டு ராசி பலன்கள்...

மேஷம்: பேச்சாற்றலால் அனைவரையும் கவரக்கூடியவர்கள் நீங்கள். எனவே இந்த வாரம் முழுக்க செல்போனில் அடிக்கடி மிஸ்டுகால் வந்து தொல்லை கொடுக்கும். கூடவே நண்பர்களின் மொக்கை எஸ்.எம்.எஸ்-கள் இன்பாக்ஸை நிரப்பலாம். மிஸ்டு கால்களுக்கு மிஸ்டுகால் கொடுத்து பேலன்ஸை பேலன்ஸ் செய்யவும்.

ரிஷபம்: கம்ப்யூட்டரில் கண்ட கண்ட வெப்சைட்டுக்குள் சென்று கலாட்டா செய்யும் கலகலப்பான பார்ட்டி நீங்கள். தொடர்ந்து முதல் இடத்தில் இருந்த பில்கேட்ஸ் இரண்டாம் இடத்துக்கு இடம் பெயர்வதாலும், ஆன்ட்டி வைரஸ் கம்பெனிகள் சாஃப்ட்வேர் துறையில் ஆதிக்கம் செலுத்துவதாலும் சற்று மோசமான நிலையை உங்கள் கம்ப்யூட்டர்கள் சந்திக்கக் கூடும். முடிந்தவரை ஒரிஜினல் ஆன்ட்டிகளை... மன்னிக்கவும், ஆன்டி-வைரஸ்களைப் பயன்படுத்தவும்.

மிதுனம்: எப்போதும் எதையாவது படிக்க வேண்டும் என்ற தாகத்தில் உள்ள மிதுன ராசிக்காரர்களே, இந்த வாரம் சனி உச்சத்தில் இருப்பதாலும் நத்தம் விஸ்வநாதன் அவருக்கு மிக மிக அருகில் இருப்பதாலும், வாரம் முழுக்கவே பவர்கட் தொல்லை உங்களை வாட்டி எடுக்கும். எப்போதும் இரண்டு ராந்தலில் மண்ணெண்ணை ஊற்றி வைத்துக்கொள்வது நல்லது. அத்துடன் ஒரு பாக்கெட் மெழுகுவத்தி வாங்கி வைத்துக்கொள்ளலாம்.

கடகம்: ஊரைச் சுற்றும் உல்லாச பார்ட்டி நீங்கள். இது உங்களுக்குச் சங்கடமான நேரம். மத்தியில் முதல் இடத்தில் மன்மோகனும், முக்கிய இடத்தில் வீரப்ப மொய்லியும் இருப்பதால், எதிர்பாராத பெட்ரோல் விலை யேற்றம் உங்களைச் சோர்வில் ஆழ்த்தும். இடர்ப்பாடுகளைத் தவிர்க்க ரயில், பேருந்து போன்றவற்றில் பயணங்களை மேற்கொள்ளலாம்.

சிம்மம்: வாய்க்கு ருசியாகச் சாப்பிட்டு வாழ்க்கையை வாழ நினைப்பவர்கள் நீங்கள். சின்ன வீட்டில் இருந்த சுக்கிரன் பெரிய வீட்டுக்கு வருவதால், இந்த வாரம் முழுக்கவே உங்களுக்கு மகிழ்ச்சியான வாரம்தான். அடிக்கடி நண்பர்களுடன் ஓசி ட்ரீட்களுக்குச் செல்ல நேரலாம். ஊசிப்போன பஜ்ஜி, வேகாத ஊத்தப்பம், காக்கா பிரியாணி போன்றவற்றைத் தவிர்ப்பது நல்லது.

கன்னி: ஃபிகர்களுக்காக எந்த நேரமும் காத்திருக்கும் கன்னி ராசிக்காரர்களே, இந்த வாரம் உங்களுக்கு அதிர்ஷ்டம் கைகொடுக்கும். ஃபிகர்களின் தகப்பன்கள் ஐயப்பனைச் சந்திக்கச் செல்வதால், அப்பன்களின் தொந்தரவு அதிகம் இருக்காது. ரயில், பேருந்து நிலையங்களில் மூணு மணி நேரம் காத்திருந்தால், மொக்கை ஃபிகரையாவது உஷார் பண்ணும் வாய்ப்பு உண்டு.

துலாம்: தத்துவங்கள் பேசி நண்பர்களைக் கவரும் துலாம் ராசிக்காரர்களே, கரன்ட் இல்லாததால் டாஸ் மாக்கில் பீர் கூலிங் இருக்காது. ஆகவே ஹாட் அடிக்கலாம். இரவு நேரங்களில் சரக்கு கிடைக்காமல், பிளாக்கில் அதிக ரேட் கொடுத்து வாங்க வேண்டிய அலைச்சல்கள் இருக்கும்.

விருச்சிகம்: அமைதியை விரும்பும் விருச்சிக ராசிக்காரர்களே, மூன்றாம் இடத்தில் இருந்த கேது ஒன்பதாம் இடத்தில் இடம் பெயர்வதால், ராத்திரி நேரங்களில் நாய் குரைத்து தூக்கத்தைக் கெடுக்கும், காது அருகே கொசு பறந்து எரிச்சலூட்டும். இதனால், பகலில் பஸ்ஸிலே தூங்கி பக்கத்து சீட்டில் உள்ளவர்கள் மீது விழுந்து திட்டு வாங்குவீர்கள். கூடங்குளம் அணு உலையைத் திறக்க பவர்ஸ்டார் தலைமையில், நாராயணசாமி அனைத்துக் கட்சிக் கூட்டம் கூட்டி ஆலோசனை நடத்துவதுபோல கெட்டக் கெட்டக் கனவுகள் வரும்.

தனுசு: தினுசு தினுசாக எதையாவது வாங்கிக் குவிக்கும் தனுசு ராசிக்காரர்களே, இந்த வாரம் முழுக்கவே கடன் தொல்லை கழுத்தை நெரிக்கும். அக்கம்பக்கத்தினரும் நண்பர்களும் கொடுத்த கடனைக் கேட்டு கதவைத் தட்டலாம். மாலை நேரங்களில் மாமியார் வீட்டிலிருந்து வரும் போன்கால்கள் உங்கள் நிம்மதியைக் கெடுக்கும். இதனால், வெளியூர் பயணங்களை மேற்கொள்வது நல்லது.

மகரம்: வாயைக் கொடுத்து வாங்கிக் கட்டிக்கொள்ளும் மகர ராசிக்காரர்களே, உங்கள் நாக்கில் சனி பகவான் சதா சஞ்சரிப்பதால், நீங்கள் சும்மா இருந் தாலும், உங்க வாய் சும்மா இருக்காது. சாப்பிடுவதைத் தவிர்த்து வாயை அதிகம் உபயோகப்படுத்த வேண்டாம்.

கும்பம்: ஜம்பமாகப் பொழுதைப் போக்கும் கும்பராசிக்காரர்களே, வழக்கம்போலவே இந்த வாரம் உங்களுக்குச் சிறப்பாக, வெட்டியாகவே அமையும். பெண்களுக்கு, உங்களின் அபிமான டி.வி. சீரியல்களில் அடிக்கடி பெண்கள் கண்ணைக் கசக்குவார்கள். வெள்ளிக்கிழமை சீரியல்களில் எதிர்பாராத திருப்பங் களை எதிர்பார்க்கலாம். கரன்ட் தொல்லை நீங்க கடன் வாங்கியாவது இன்வெர்ட்டர்கள் போட்டுக்கொள்வது நல்லது.

மீனம்: நீங்கள் ஒரு கெட்டிக்காரர்... பெண்ட் எடுப்பதிலும் வீல் நிமிர்த்துவதிலும் வல்லவர்... நல்லவர்.... என உங்களுக்கு நீங்களே சொல்லித் திரிவீர்கள். நீங்கள் இந்தியாவின் எந்தப் பகுதிக்குப் போனாலும் பிச்சைக்காரர்கள் பிச்சை கேட்டு தொந்தரவு செய்வார்கள். சரியான சில்லரையை எப் போதும் கையில் வைத்துக்கொள்வது நல்லது. 50 காசு, ஒரு ரூபாய் என பிச்சை போட்டுத் திட்டு வாங்கா தீர்கள்.

- பா.ஜெயவேல்(டைம் பாஸ்)