குடும்பத்தார் பகிர்ந்து கொண்ட டெல்லி மாணவியின் நினைவுகள்

by **Powenraj** Mon Dec 31, 2012 5:30 pm

சிங்கப்பூர் ஆஸ்பத்திரியில் சிகிச்சை பலனின்றி மரணமடைந்த டெல்லி மாணவியின் அகால மறைவு அளித்த அதிர்ச்சியில் அவரது குடும்பத்தினர் உறைந்து போய் உள்ளனர். ஆற்றவும் தேற்றவும் முடியாத பெரும் சோகத்துக்கிடையே அந்த மாணவியின் தம்பி நிருபர்களிடம் கூறியதாவது:-
:-
'அக்கா எங்கள் மீது மிகவும் அன்பும் பாசமும் வைத்திருந்தது. டெல்லி ஆஸ்பத்திரியில் சிகிச்சை பெற்று வந்தபோது, பேச முடியாத நிலையிலும் கடந்த செவ்வாய்க்கிழமை இரவு 9.30மணியளவில் 'அப்பா சாப்பிட்டாரா?' என்று அக்கா கேட்டது. அதுதான் அக்காவின் கடைசி பேச்சு. வீட்டின் அருகில் நான் வெட்டியாய் சுற்றிக் கொண்டிருப்பதை பார்க்கும்போதெல்லாம், என்னை திட்டி, படிப்பின் மீது கவனம் செலுத்தும்படி அக்கா கண்டிக்கும். அக்காவை இழந்தது, என்னையே இழந்து நிற்பது போல் உள்ளது' இவ்வாறு அவர் கூறினான்.
:-
ஐம்பதுகளை கடந்து, சோகக் கடலில் தத்தளிக்கும் தந்தை கூறியதாவது:-
எல்லா குழந்தைகளும் பள்ளிக்கு போகச் சொன்னால் தான் அழும். ஆனால், என் மகளோ... பள்ளிக்குப் போக வேண்டாம் என்று நாங்கள் சொன்னால் அழத் தொடங்கி விடுவாள். வகுப்பில் நன்றாக படிக்கும் மாணவிகளில் ஒருவளாக அவள் இருந்தாள். பத்தாம் வகுப்பு சி.பி.எஸ்.இ. தேர்வில் 95 சதவீதம் மதிப்பெண்களை அவள் பெற்றிருந்தாள். அவள் விரும்பியபடியே, டேராடூன் கல்லூரியில் இடமும் கிடைத்தது.
:-
மற்றவர்களின் காயத்தை குணப்படுத்தக்கூடிய படிப்பு தனக்கு கிடைத்ததை எண்ணி அவள் மிகவும் மகிழ்ச்சி அடைந்தாள். என் வயலை விற்று அவளை நான் படிக்க வைத்தேன். தனது மேல் கல்வி செலவின் பாரத்தை எங்கள் தலையில் சுமத்த அவள் விரும்பியதில்லை. காலை 10 மணியிலிருந்து மாலை 5 மணிவரை பிசியோதெரவி படித்து வந்த என் மகள், இரவு 9 மணியிலிருந்து அதிகாலை 5 மணி வரை ஒரு பி.பி.ஓ.வில் வேலை செய்து வந்தாள். அந்த வருமானத்தை வைத்து கல்லூரி செலவுகளை சமாளிக்க அவள் கடுமையாக உழைத்தாள்.
:-
1983 முதல் டெல்லியில் வாழ்ந்து வந்த மாணவியின் குடும்பம், 1988-ம் ஆண்டு தற்போது வசிக்கும் பகுதியில் குடியேறியது. குடும்ப செலவுகளை சமாளிக்க, மாணவியின் தந்தைபல வேளைகளில் 2 ஷிப்டுகள் வேலை செய்து, பிள்ளைகளின் படிப்பு செலவை கவனித்து வந்துள்ளார். தங்களின் சாப்பாட்டு செலவினங்களை எல்லாம் குறைத்துக் கொண்டு, பல வேளைகளில், வெறும் ரொட்டியில் உப்பை தொட்டுக் கொண்டு சாப்பிட்டு, மாணவியின் தாயார் குடும்பத்தை சிக்கனமாக நடத்தி வந்ததாக அக்கம்பக்கத்தினர் கூறுகின்றனர்.
:-
பிசியோதெரபி படிப்பு முடிந்ததும், தங்களின் மகள் நல்ல நிலைக்கு உயர்ந்து குடும்பத்தை உயர்த்துவாள் என்ற பெற்றோர் கண்ட கனவு, அந்த ஓர் இரவு பஸ் பயணத்தின் மூலம் பகல் கனவாகிப் போய்விட்டது என்று சிலர் கூறினர். மாணவியின் உடல் தகனம் செய்யப்படுவதற்குள், அவரது தாயார் சுமார் 10 முறை மயங்கி விழுந்ததாகவும், அவரை உள்ளூர் ஆஸ்பத்திரிக்கு அழைத்துச் சென்று சிகிச்சை அளித்ததாகவும் மரணமடைந்த மாணவியின் தம்பி நிருபர்களிடம் கூறினார்.
:-
குடும்பத்தாரிடம் துக்கம்விசாரிக்க வரும் கூட்டத்தைவிட, சுவாரஸ்யமான செய்திகளை சேகரிக்க அந்த வீட்டை வட்டமிரும் நிருபர்கள் கூட்டமே அங்கு அதிகமாக காணப்படுகின்றது.
:-
மாலை மலர்

by **Ahanya** Mon Dec 31, 2012 7:02 pm

என்னால் தாங்க இயலவில்லை..... அழுகை

இனிமேல் இப்படி ஒரு சம்பவத்தை என் கண்கள் பார்க்க கூடாது...

by **கரூர் கவியன்பன்** Mon Dec 31, 2012 8:22 pm

எவ்வளவு கனவுகள் கண்டிருக்கும்
அந்தக் கண்கள்
எத்தனை எண்ணங்கள் பூத்திருக்கும்
அந்த இதயத்தில்
எப்படியெல்லாம் சிந்தித்திருக்கும்
அந்த மூளை
எவ்வாறெல்லாம் சூளுரைத்திருக்கும்
அந்த உதடுகள்
அத்துனையும் இன்று தீயில் கருகி
கல்லறை பூண்டதே மேனியில்
ஐயகோ..........
இனியொரு விதி வேண்டாம் இவ்வுலகில்
இருக்கும் விதிகளை களைந்தெடுப்போம்
காவியம் படைப்போம்