விளக்கு ஏற்றும் பொழுது பாட வேண்டிய மந்திரம்!

**சாமி** · **சாமி** Fri Dec 21, 2012 7:04 pm

விளக்கு ஏற்றும் பொழுது :
விளக்கினை ஏற்றி வெளியை அறிமின்
விளக்கினின் முன்னே வேதனை மாறும்
விளக்கை விளக்கும் விளக்குடையார்கள்
விளக்கில் விளங்கும் விளக்கவர்தாமே
(பத்தாம் திருமுறை / திருமந்திரம் / ஏழாம் தந்திரம் – 10 / அருளொளி - பாடல் எண் : 5)

விளக்கை ஏற்றியபின் மலர் சொரிந்து :
இல்லக விளக்கது இருள் கெடுப்பது
சொல்லக விளக்கது சோதி உள்ளது
பல்லக விளக்கது பலருங் காண்பது
நல்லக விளக்கது நமச்சி வாயவே.
(நான்காம் திருமுறை / அப்பர் தேவாரம் / 011 பொது / பாடல் எண் : 8)

கங...கங...கங...கங...கங...கங...கங...கங...கங...கங...கங...கங...கங...கங...கங...கங...கங...கங...கங...கங...கங...கங...

பொழிப்புரை :

விளக்கினை ஏற்றி வெளியை அறிமின்
விளக்கினின் முன்னே வேதனை மாறும்
விளக்கை விளக்கும் விளக்குடையார்கள்
விளக்கில் விளங்கும் விளக்கவர்தாமே

விளக்கம்:
அறிவு எனப்படும் விளக்கை ஏற்றி எல்லை அற்ற பரம்பொருளான சிவபெருமானை அறிந்து கொள்ளுங்கள். அப்பொழுது அந்தத் திருவருளின் ஒளியில், முன்பு உளவாகிய துன்பங்கள் யாவும் முழுதுமாக அற்றொழியும். இந்த விளக்கை அதாவது இந்த திருவருள் ஒளியை, விளங்கச் செய்யும் ஒளி உடையவர்களே அந்த விளக்கினுள்ளே விளங்கும் மற்றொரு விளக்காய் விளங்குவார்கள்; அதாவது சிவ ஒளியில் கலந்து நிற்பர்.

இல்லக விளக்கது இருள் கெடுப்பது
சொல்லக விளக்கது சோதி உள்ளது
பல்லக விளக்கது பலருங் காண்பது
நல்லக விளக்கது நமச்சி வாயவே.

விளக்கம்:
வீட்டில் ஏற்றி வைக்கப்படும் ஒளி விளக்கானது, புற இருளை அகற்றுகின்ற தன்மை உடையது. திருவைந்தெழுத்தாகிய ‘நமசிவாய’ என்பது அகவிளக்காக விளங்கி, மனத்தின் இருளை நீக்க வல்லது. அத்திருவைந்தெழுத்து சொல் வடிவிலும், சோதி வடிவிலும் விளங்கிப் பயில்வோரும் கேட்போரும் ஆகிய பலரது உள்ளங்களில் இருந்து விளங்கச் செய்கின்றது. பல சமயத்தாரும் தம்மை அறியாமலே காண நிற்பதாய், அறிவு நிறைந்த உள்ளத்திற்கு விளக்குப் போல ஒளியை நல்குவது திருவைந்தெழுத்து மந்திரமே.