டெல்லி போராட்டத்தில் காயம் அடைந்த போலீஸ்காரர் பலி

டெல்லி இந்தியா கேட் பகுதியில் நடந்த போராட்டத்தின்போது கல்வீச்சில் படுகாயம் அடைந்த போலீஸ்காரர் ஒருவர் சிகிச்சை பயன் இன்றி பலியானார். அவரை தாக்கியதாக 8 பேர் மீது கொலை வழக்குப் பதிவு செய்யப்பட்டு உள்ளது.

மருத்துவ மாணவி கற்பழிப்பு விவகாரத்தில் நீதி கேட்டு, தலைநகர் டெல்லியில் கடந்த ஒரு வாரத்திற்கு மேலாக தொடர் போராட்டம் நடைபெற்று வருகிறது.

போலீஸ்காரர் பலி

கடந்த ஞாயிற்றுக்கிழமை அன்று இந்த போராட்டம் மிகவும் தீவிரமாக இருந்தது. டெல்லி கேட் உள்ளிட்ட முக்கிய சாலைகளில் போலீசாருக்கும் பொது மக்களுக்கும் இடையே மோதல் ஏற்பட்டது. அன்று டெல்லி கேட் பகுதியில் பாதுகாப்பு பணியில் இருந்த போலீஸ்காரர் சுபாஷ்சந்த் தோமர் என்பவர், கல்வீச்சில் படுகாயம் அடைந்தார்.

சாலையில் மயங்கிய நிலையில் விழுந்து கிடந்த அவர், டெல்லியில் உள்ள ராம் மனோகர் லோகியா ஆஸ்பத்திரியில் சிகிச்சைக்காக சேர்க்கப்பட்டார். அங்கு தீவிர சிகிச்சை அளித்தும் பயன் இல்லாமல் இன்று காலை சுபாஷ் பரிதாபமாக இறந்துவிட்டார். டெல்லி போலீஸ் கமிஷனர் நீரஜ்குமார், இந்த தகவலை இன்று துயரத்துடன் நிருபர்களிடம் வெளியிட்டார்.

8 பேர் மீது கொலை வழக்கு

உத்தர பிரதேச மாநிலம் மீரட்டை சேர்ந்த சுபாஷ், பி.ஏ. பட்டம் பெற்றவர். கடந்த 1987–ம் ஆண்டில் போலீஸ் படையில் சேர்ந்த சுபாஷ், டெல்லி கால்வல் நகர் பகுதியில் பணியில் இருந்தார். பாதுகாப்பு பணிக்காக இந்தியா கேட் பகுதிக்கு சென்றபோது தாக்குதலில் படுகாயம் அடைந்து சிகிச்சை பயனின்றி பலியாகி விட்டார்.

போலீஸ்காரர் சுபாஷ் தாக்கப்பட்டது குறித்து அரவிந்த் கெஜ்ரிவாலின் ‘ஆம் ஆத்மி’ கட்சி பிரமுகர் ஒருவர் உள்ளிட்ட 8 பேர் ஏற்கனவே கைது செய்யப்பட்டு அவர்கள் மீது கொலை முயற்சி உள்ளிட்ட பல்வேறு பிரிவுகளில் வழக்குப் பதிவு செய்யப்பட்டு இருந்தது. சுபாஷ் இறந்ததைத் தொடர்ந்து 8 பேர் மீதும் கொலை வழக்காக மாற்றப்பட்டது.

போலீசாரின் ஒரு நாள் சம்பளம்

பலியான போலீஸ்காரர் சுபாஷுக்கு மரியாதை செலுத்தும் வகையில் டெல்லி போலீசார் அனைவருடைய ஒரு நாள் சம்பளத்தை சுபாஷின் குடும்பத்தினருக்கு வழங்கப்படும் என்று, போலீஸ் கமிஷனர் நீரஜ்குமார் தெரிவித்தார். சுபாஷின் மகன் தீபக் மற்றும் குடும்பத்தினர் போலீஸ்காரர் சுபாஷை பொது மக்கள் அடித்துக்கொன்றுவிட்டதாக புகார் கூறினார்கள்

கடமை தவறாமல் பணிபுரிந்த சுபாஷை கடந்த 3 நாட்களாக ஒரு முக்கிய பிரமுகர் கூட ஆஸ்பத்திரிக்கு வந்து பார்க்கவில்லை என்று குற்றம் சாட்டிய அவர்கள், சுபாஷின் குடும்பத்தில் சம்பாதிக்கும் உறுப்பினராக அவர் ஒருவர் மட்டுமே இருந்ததாகவும் தெரிவித்தனர்.

இதற்கிடையில், சுபாஷ் தாக்கப்பட்ட விவகாரத்தில் உண்மையான குற்றவாளிகளை தப்பவிட்டுவிட்டு, அப்பாவிகள் மீது வழக்கு பதிவு செய்து இருப்பதாக, ‘ஆம் ஆத்மி’ கட்சி தலைவர்கள் குற்றம் சாட்டி உள்ளனர்.

ஜனாதிபதி அனுதாபம்

ஜனாதிபதி பிரணாப் முகர்ஜி நேற்று டெல்லியில் நடைபெற்ற மோதிலால் நேரு தொழில் நுட்ப கழகத்தின் பட்டமளிப்பு விழாவில் கலந்து கொண்டு உரையாற்றினார். அப்போது அவர், டெல்லி போராட்டத்தில் உயிர் இழந்த போலீஸ்காரர் சுபாஷின் குடும்பத்தினருக்கு அனுதாபம் தெரிவித்தார்.

கொடூர குற்றங்களுக்கு வன்முறையில் ஈடுபடுவதால் தீர்வு காண முடியாது என்று இளைஞர்களுக்கு அறிவுரை வழங்கிய அவர், குற்றவாளிகள் மீது உரிய நடவடிக்கை மேற்கொள்ளப்பட்டு வருவதாக உறுதி அளித்தார்.

கற்பழிக்கப்பட்டு மருத்துவமனையில் சிகிச்சை பெற்றுவரும் ‘துணிச்சலான மாணவி’ பூரண குணம் அடைய பிரார்த்திப்பதாகவும் பிராணப் முகர்ஜி தெரிவித்தார்.
----------------------------------
தின தந்தியிலிருந்து

ஹூம் இன்னும் என்னவெல்லாம் நடக்கப் போவுதோ