புலிகள் மீதான தடை அமெரிக்கா - கனடா பரிசீலனை?

வாஷிங்டன்: இலங்கையில் உடனடி போர்நிறுத்தம் செய்ய வேண்டுமென அமெரிக்கா, ஜெர்மனி மற்றும் ஐரோப்பிய கூட்டமைப்பு நாடுகளும், ஐநா சபையும் அறிவுறுத்திய பிறகும் பிடிவாதமாக தமிழர்களைக் கொன்று குவித்து வருகிறது, பக்சே பிரதர்ஸ் தலைமையிலான சிங்கள அரசு.

இந்த நிலையில் விடுதலைப் புலிகள் இயக்கம் மீதான தடையை நீக்க வேண்டும் என்று கோரி அமெரிக்க வெளியுறவு அமைச்சர் ஹில்லாரி கிளிண்டனுக்கு, அமெரிக்க தமிழர் அமைப்புகள் கூட்டாக கடிதம் எழுதியுள்ளன. அதிபர் ஒபாமாவுக்கு ஏற்கெனவே இதுகுறித்து கவன ஈர்ப்பு கடிதம் தரப்பட்டுவிட்டது.

கடிதத்தைப் பெற்றுக் கொண்டுள்ள ஹிலாரி, இலங்கையில் ராணுவத் தாக்குதலில் அப்பாவித் தமிழர்கள் பலியாகி வருவது குறித்து ஆழ்ந்த கவலை தெரிவித்துள்ளார். ராணுவம் - புலிகள் இருவருமே உடனடி போர்நிறுத்தம் அறிவிக்க வேண்டியதுதான் சரிவதேச சமுதாயத்தின் மீதான அவர்களது மதிப்பைக் காட்டும் என ஹிலாரி கூறியுள்ளார்.

தமிழர்களுக்கு அனைத்து உரிமைகளும் உறுதியாக்கப்படும் பட்சத்தில் பேச்சுவார்த்தைக்குத் தயார் என புலிகள் தரப்பில் கூறப்பட்டுள்ளது. ஆனால் இலங்கை பாதுகாப்புச் செயலாளர் கோத்தபயாவோ போர்நிறுத்தம் என்ற பேச்சுக்கே இடமில்லை என அறிவித்துள்ளார்.

எனவே இப்போதுள்ள சூழலில், தமிழர்களைக் காக்க விடுதலைப் புலிகள் மீதான தடையை உடனடியாக விலக்கிக் கொள்ள அமெரிக்கா பரிசீலனை செய்ய வேண்டும் என அமெரிக்காவில் உள்ள தமிழர் அமைப்புகள் ஹிலாரிக்கு கூட்டாக வேண்டுகோள் விடுத்துள்ளன.

இதுகுறித்த கடிதமும் ஹிலாரியிடம் அளிக்கப்பட்டுள்ளது. இந்தக் கோரிக்கையை அமெரிக்க அரசு பரிசீலித்து வருவதாக ஹிலாரி தர்ப்பிலிருந்து கூறப்பட்டதாக தமிழர் அமைப்புகள் தெரிவித்துள்ளன. ஆனால் அமெரிக்க வெளியுறவுத்துறை செய்தித் தொடர்பாளர் ராபர்ட் உட் இதை மறுத்துள்ளார்.

இதுகுறித்து அவர் கூறுகையில், அமெரிக்காவின் வெளிநாட்டு பயங்கரவாத அமைப்புகள் பட்டியலில் இப்போதும் விடுதலைப் புலிகள் இயக்கம் உள்ளது. அதே நிலை இப்போதும் நீடிக்கிறது. ஆனால் விடுதலைப்புலிகளை இந்தப் பட்டியலில் இருந்து நீக்க பரிசீலனை நடக்கிறதா என்பது குறித்து இப்போது எனக்குத் தெரியாது என்றார் அவர்.

இதேபோல இலங்கைத் தமிழர்கள் பெரும்பான்மையாக வசிக்கும் கனடா மற்றும் பிரிட்டனிலும் புலிகள் மீது தடையை நீக்க மனுக்கள் தரப்பட்டுள்ளன. கனடாவில் தடை நீக்கம் குறித்து பரிசீலிக்கப்படுவதாக கூறப்படுகிறது.