கல்வி கட்டணத்தை எதிர்த்து ஐகோர்ட்டில் மீண்டும் வழக்கு சிறுபான்மை பள்ளிகள் தொடர்ந்தன

தமிழ்நாட்டில் உள்ள தனியார் பள்ளிகளுக்கு கல்வி கட்டணம் நிர்ணயிக்க ஓய்வு பெற்ற ஐகோர்ட்டு நீதிபதி தலைமையில் கமிட்டி அமைக்கப்பட்டது. தற்போது அதன் தலைவராக நீதிபதி சிங்காரவேலு இருந்து வருகிறார். ஏற்கனவே நீதிபதி கோவிந்தராஜன் கமிட்டி கல்வி கட்டணம் நிர்ணயித்ததை எதிர்த்து 400-க்கும் மேற்பட்ட தனியார் பள்ளிகள் ஐகோர்ட்டில் வழக்கு தொடர்ந்தனர்.

வழக்கை விசாரித்த நீதிபதிகள் பானுமதி, விமலா ஆகியோர் கொண்ட டிவிசன் பெஞ்ச் கடந்த மே மாதம் தீர்ப்பு கூறியது. அதில், வழக்கு தொடர்ந்த பள்ளிகள் தங்கள் வரவு- செலவு கணக்குகளை மீண்டும் கமிட்டி முன்பு தாக்கல் செய்ய வேண்டும். கமிட்டி ஒவ்வொரு பள்ளிகளையும் அழைத்து அவர்களின் ஆவணங்களை பரிசீலித்து விசாரித்து கட்டணம் நிர்ணயிக்க வேண்டும் என உத்தரவிட்டனர்.

அதன் பேரில் வழக்கு தொடர்ந்த பள்ளிகளுக்கு நீதிபதி சிங்காரவேலு கமிட்டி கட்டணத்தை மறுநிர்ணயம் செய்தது. இதை எதிர்த்து சென்னை சாந்தோமில் உள்ள ரோசரி மெட்ரிக்குலேசன் பள்ளி உள்பட 7 சிறுபான்மை தனியார் பள்ளிகள் ஐகோர்ட்டில் மீண்டும் வழக்கு தொடர்ந்துள்ளனர். ரோசரி மெட்ரிக்குலேசன் பள்ளியில் தாக்கல் செய்த மனுவில் கூறியிருப்பதாவது:-

பள்ளிகள் தாக்கல் செய்யும் வரவு-செலவு கணக்குகளை கருத்தில் கொள்வதற்கு டிவிசன் பெஞ்ச் நிர்ணயித்த விதிமுறைகளை இந்த கமிட்டி கவனத்தில் கொள்ள வில்லை. சிறுபான்மை பள்ளிகளுக்கான செலவு கணக்குகளை ஏற்றுக் கொள்ளவில்லை. தன்னிச்சையாக கட்டணம் நிர்ணயித்துள்ளனர். எங்கள் தரப்பு கருத்துக்கு கமிட்டி செவிசாய்க்க வில்லை. எனவே அந்த கமிட்டி நிர்ணயித்த மறு கட்டண நிர்ணயத்தை ரத்து செய்ய வேண்டும்.

கமிட்டி முன்பு நாங்கள் வைத்த கணக்கு விவரங்களை கவனத்தில் எடுத்து கொள்ளும்படி உத்தரவிட வேண்டும் என கூறப்பட்டுள்ளது. இந்த வழக்கு நீதிபதிகள் பானுமதி, சசிதரன் ஆகியோர் கொண்ட பெஞ்ச் முன்பு இன்று விசாரணைக்கு வந்தது. அப்போது இதுபற்றி வருகிற ஜனவரி 23-ந்தேதிக்குள் விளக்கம் அளிக்கும்படி தமிழக அரசு மற்றும் கல்வி கட்டண சிறப்பு அதிகாரிக்கு நோட்டீசு அனுப்ப உத்தரவிட்டனர்.

மாலை மலர்

கல்வி என்பது கொள்ளை அடிக்கும் தொழிலாக மாறிவிட்டது. எவர் கட்டணம் நிர்ணயம் செய்தாலும் அதை விட அதிகம் வாங்குவது இவர்கள் வாடிக்கை.

கவிஞன் ஒருவன் சொன்னான், சரஸ்வதி வீணையை விற்று கல்வியை வாங்கினாள் என்று.